EFESA YAABA 5

1Lanwani yin yaa ŋua mani wani U Tienu fuuli, nani o bibuadimu yeni. 2Yin yaa ye mani leni yiyaba leni mi buama nani Kilisiti n den bua ti maama ki puni o yuli U Tienu, ki tua yaa paabu leni yaa padili yaa nuulu n mani. 3Yin da tuo mi conconma maama leni majoagindi buoluba kuli, bi mi ŋaliŋabuama maama n ña yi siiga baa waamu, kelima laa dagidi yinba bi nigagidiŋanba po. 4Yin yaa kubi mani yi yula yi maama nni ki da maadi mi cancaginmaama leni mi gaadimaama leni o faajibiado kuli. Ama yin yaa tuondi mani U Tienu. 5Yin bandi mani ke baa niyendo yua n tie mi conconma daano leni yua n tiendi ti joagindi, leni o ŋaliŋabualo yaala n tie opo nani i buli ŋoadima, kan baa U Tienu leni Kilisiti diema ŋalimani. 6Oba kuli n da boandi yi leni mi mafanma. Li tie laa bonla yaa po yo ke U Tienu pabienli se yaaba n yie o kuli po. 7Lani yaa po yin da pia ŋantaadoba kuli leni ba. 8Yi den kpa tie li biigili yaaba, ama moala yi tie mi yenma yaaba o Diedo nni. Yi tagi n yaa tie nani mi yenma yaaba yeni. 9Kelima mi yenma n baa luoni yaa bonluonkaala tie li ŋanbili leni mi teginma leni i moamoani. 10Yin biigi ki bandi yaala n baa mani o Diedo po, 11ki da pia ŋantaadoba kuli leni li biigili tuona, ya n kaa pia fuoma, ama yin doagidi ke a bia. 12Kelima li pia i fe, baa ki maadi ban tiendi yaa bonla ŋasiili nni. 13Bi yaa doagidi laa niba n tiendi yaa bonbiadila mi yenma nni, mi yenma baa doagidi lan bia maama, kelima mi yenma doagidi likuli. 14Lani yaa po ke li yedi: “ Ŋan fundi, fini yua n goa, Ŋan fii bi tinkpiba siiga. Kilisiti baa yendi apo.” 15Lani yaa po yin yaa fangi mani yi yula leni yi tagi n tie maama. Yin da tie nani bi yanluodanba yeni, ama yin yaa tie nani bi yanfodanba. 16Yin da u yogunu, kelima yaa dana n tie na bia. 17Lani yaa po yin da tie yanluodanba, yin yaa fani mani ki moandi ki bandi o Diedo yanbuama. 18Yin da ñu mi daama ki gaadi, kelima li baa teni yin biidi yiba, ama yin yaa gbie leni U Tienu Fuoma. 19Lani, yi baa yaa maadi leni yiyaba ki togidi Pisominba, leni yaa yani n pagi U Tienu, leni U Tienu Fuoma n gobidi yi ke yi yini yaa yani. Yaa yiini mani ki pagi o Diedo leni yi pala kuli. 20Yaa tuondi mani U Tienu yua n tie Baa yogunu kuli li bonla kuli po ti Diedo Jesu Kilisiti yeli po. 21Yin yaa miindi mani yi yula yiyaba kani kelima yin pia Kilisiti po yaa fangili yaa po. 22Yinba bi puoba, yua kuli n yaa miindi o yuli o calo kani nani wan miindi o yuli o Diedo kani maama. 23Kelima o ja tie o pua yudaano nani Kilisiti n tie wan yini yaaba yudaano maama, yaaba n tie o gbanandi, wani n tie bi Candaano. 24Nani Kilisiti n yini yaaba n miindi bi yuli Kilisiti kani maama, li pundi ke bi puoba n yaa miindi bi yuli bi ciaba kani li bonla kuli nni. 25Yinba bi podanba, yua kuli n yaa bua o pua nani Kilisiti n den bua wan yini yaaba maama ki puni o yuli ki kpe bipo. 26O den tieni yeni ki baa ŋuudi ki ŋanbi ba leni mi ñima leni U Tienu maama, 27ki teni ban pundi ki sedi o kani ki pia ti kpiagidi, kaa pia joagindiba leni golimaba leni yaala n gundi kuli. Ama ban gagidi ki yaa ŋani cain, kaa pia ban baa fidi ki kuli ba leni yaala. 28Li pundi ke bi podanba moko n yaa bua bi puoba nani ban bua bi yula maama yeni. Yua n bua o pua kuli, bua o yuli. 29Kelima oba naa nani o gbanandi. Ama o dindi o ti ki kubi ti nani Kilisiti moko n kubi wan yini yaaba maama, 30kelima ti mo tie o yaa gbanandi buoli. 31Li diani: “ Li tie lani yaa po ke o ja baa ña o baa leni o naa kani ki taani leni o pua, bani niba lie yeni n tua gbananyendi.” 32Line n tie yaa bondoaginkaala n yaba. N maadi laa maama Kilisiti leni wan yini yaaba yaa po yo. 33Li mayuli yinba yaa po tie ke ja kuli n yaa bua o pua nani wan bua o yuceli maama, pua kuli mo n yaa fangi o calo.

will be added

X\