KOLOSA YAABA 3

1Lanwani yi yaa den fii leni Kilisiti bi tinkpiba siiga, yaa lingi mani yaa bonla n ye tanpoli po, Kilisiti n ka naankani U Tienu jienu. 2Yaa kuandi mani yi yama tanpoli bonla nni, ki da kuandi yi yama ŋanduna yaa bonla nni. 3Kelima yi kpe, ke yi miali mo wuo leni Kilisiti U Tienu kani. 4Kilisiti, yua n tie yi miali, yaa go cua ki doagidi o yuli yaa yogunu, yi moko baa taani ki doagidi leni o o kpiagidi nni. 5Lanwani yin kpa mani ŋanduna bonbuaka-biadila yaala n die yi gbananbuoli nni, mi conconma leni ti cagindi buoli kuli, leni ti gbanandi bonbuaka-biadila, leni yaala n joagini yaa buama kuli, leni mi ŋalimanbuama, yaala n tie nani i buli ŋoadima yeni. 6Kelima laa bonla yaa po ke U Tienu pabienli cuonu baa cua bi niyiekaaba po. 7Yi moko den tie yene yin den ye ti tuonbiadi nni yaa yogunu. 8Ama moala yin ŋa mani yaala n tie na kuli: li pabienli, li mutuoli, ki nanga, ku tuotabigu leni yaa majoagindi n ña yi ñoana nni kuli. 9Yin da pua faama leni yiyaba, kelima yi den landi u tagikpelu leni u bontienkaala, 10ki lani u tagipaanu, yu n pandi mi bandima nni cain yogunu kuli, nani yua n tagi u yaa nannanli yeni. 11Laa tagipaanu nni mi gagidima ki go ye bi nilanba leni Jufinba siiga, a junga leni a jifola siiga, yaaba n cogi leni yaaba n kaa cogi siiga, i yonbi leni yaaba n die bi yula siiga. Ama Kilisiti n tie likuli, ki go ye bikuli nni. 12Lanwani yinba U Tienu nigandikaaba, wan gagidi ki ŋanbi yaaba, ke yi tie o buakaaba, yin yaa laa mani mi niñingbadima leni li ŋanbili, li yumiinli leni mi dingima leni li juunli. 13Yin moandi ki juuni leni yiyaba ki yaa tiendi yiyaba po sugili. Li yaa tie ke nilo bii o lielo po, nani Kilisiti n den puni yi sugili maama, yi mo n yaa puuni yiyaba sugili yeni. 14Yi yaa tieni laa bonla kuli ki gbeni, yin laa mani mi buama yaama taani ki loli yikuli yenma nani lan dagidi maama. 15Kilisiti yanduanma n yaa die yi pala nni wan den yini yaa yanduanma po ke yin tua gbananyendi o yaa niinni yeni. 16Kilisiti maama n gbie yi pala nni leni man pia yaa ŋalimano kuli. Yaa bangi mani ki go tundi yiyaba leni mi yanfuoma. Yaa yiini mani Pisoma, leni U Tienu yani, leni yaa yani n doagidi mi Fuoma n bangi yi yaala, ki yiini ki pagi U Tienu leni i tuondi yi pala nni. 17Yin maadi yaa maama kuli leni yin tiendi yaala kuli, tieni mani likuli o Diedo Jesu yeli po, ki yaa tuondi U Tienu yua n tie Baa kelima wani Jesu yaa po. 18Yinba bi puoba, yin yaa miindi mani yi yula yi ciaba kani nani lan pundi o Diedo yaaba n yaa tiendi maama. 19Yinba bi podanba, yin yaa bua mani yi puoba, ki da pia bipo li mutuoli. 20Yinba a bila, yin yaa tuodi ki ŋua mani yi danba maama li bonla kuli nni kelima lani n mani o Diedo. 21Yinba bibaanba, yin da tiendi yaala n baa fiindi yi bila pala, ke lan da ti wudi bi gbani. 22Yinba i yonbi, yin yaa tuodi ki ŋua yi canbaanba ŋanduna nni li bonla kuli nni. Yin da tieni mani yeni ban nua yi yaa yogunu bebe, nani yi bua ki mangi bi pala yeni. Ama yin yaa tiendi yeni yogunu kuli leni li payenli, kelima yi fangi o Diedo. 23Yin tiendi yaala kuli, yin yaa tiendi mani leni li yankuali nani lan dagidi o Diedo po maama, ke laa tie bi nisaaliba po ka. 24Yi bani ke yi baa taani leni o bila kuli ki baa wan bili yipo yaa ŋalimani ke i tie yi panpaani, kelima yi tuuni o Diedo Kilisiti po. 25Yua n tieni yaala n bia kuli baa baa o biadima panpaani, kelima U Tienu naa gagidi bi niba leni biyaba.

will be added

X\