JESU TONDIBA TUONA TILI 9

1Ama Solo pali go den baa ki be o Diedo ŋoadikaaba po hali ke o den bua ki kpa ba. O den gedi bi kopadicianba bado kani, 2ki mia o wan diani a tila li balimaama bangima diena yudanba yaaba n ye Damasa po, ke o yaa ban laa lipo, ja bi pua kuli, ke bi ŋua laa sanu, wan loli ba ki cuani Jelusalema. 3Solo n den ye u sanu nni ki nagidi Damasa, yaa yenma n ñuliti boncianla den ñani tanpoli po ki jiidi ki lindi o yenma. 4O den baa tiipo ki gbadi ke u nialu maadi ki yedi o: “Solo, Solo, be yaa po ke a faligidi nni?” 5O den goa ki yedi: “N Daano, a tie ŋme?” O Diedo den yedi o: “N tie Jesu, ŋan faligidi yua. [Li baa pa apo ŋan yiadi u danbu ki pua li bonmuukaala.” Ti jawaandi leni li pakili den cuo Solo ke o digibi ki yedi: “N Diedo, a bua min tieni be?” O Diedo den yedi o:] 6“Fii ki kua u dogu nni, bi baa waani a ŋan baa tieni yaala tiladi.” 7Yaa jaba n den yegi leni Solo den sedi ki ŋmini suo kelima ti jawaandi po, bi den gba u nialu, ki naa nua oba kuli. 8Solo den fii ki sedi. Baa ke o nuni den ŋubidi waa den nua liba. Bi den cuo o nuu ki dia o ki gedini Damasa. 9O den tieni dana taa kaa nua, waa di, waa ñu mo. 10Li den sua ke Jesu ŋoadika ye Damasa ke bi yi o Ananiasa. O Diedo den yedi o li bonlekaala nni: “Ananiasa,” o den goa ki yedi: “N Diedo, mini nna.” 11O Diedo den yedi o: “Fii ki gedi yaa sanu n yi u Sansiedu ki pundi yua n yi Judasa diegu, ki lingi yaa nilo n yi Solo, Tasa dogu yua kelima o jaandi. 12O den laa li bonlekaala nni ke yua n yi Ananiasa kua wan ye naani ki maani opo o nii ke wan go yaa nua.” 13Ananiasa den goa ki yedi o: “N Diedo, bi niba boncianla waani nni o ja yeni maama, leni wan tieni a nigagidiŋanba yaaba n ye Jelusalema yaa biadima kuli. 14Bi kopadicianba yudanba puni o li bali u naa dogu nni moko wan cuo ki loli yaaba n jaandi a yeli nni kuli.” 15Ama o Diedo den goa ki yedi o: “Gedi, kelima n gandi laa ja ke wan yaa tuuni npo ki gedini n yeli i nilanbuoli po leni ŋanduna badicianba po leni Isalele yaaba kuli po. 16N baa waani o wan baa le yaa fala kuli kelima n yeli po.” 17Ananiasa den gedi. Wan den kua ku diegu yeni niinni, o den maani o nii Solo po ki yedi o: “N kpiilo Solo, o Diedo Jesu, yua n den doagidi apo o yuli ŋan den ye u sanu po ki kpendi yaa yogunu yeni, n soani nni a kani ke ŋan go noadi, ki go gbie leni o U Tienu Fuoma Yua moko.” 18Lanyogunu liga yaala n naani leni a poaga den ñani Solo nuni nni ki baa ke o go noadi. O den fii ke bi batisi o. 19Wan den dini, o go den baa u fidu. Solo go den tieni danaba leni bi ŋoadikaaba yaaba n ye Damasa. 20Lanyogunu o den cili ki caa li balimaama bangima diena nni ki wangi Jesu maama, ki tua ke o tie U Tienu Bijua. 21Li den paki yaaba n gba o maama kuli ke bi tua: “O naa ja ka tie yua n den faligidi yaaba n ye Jelusalema ki jaandi Jesu yeli nni? Waa den cua ne ki baa loli ba ki gedini Jelusalema bi kopadicianba yudanba po kaa?” 22Solo paalu o Diedo sanŋoadima nni den pugidipugidi, ke o doagidi ke Jesu tie U Tienu n Gandi Yua hali ki guli yaa Jufinba n ye Damasa kuli. 23Dana boncianla n den pendi, Jufinba den taani ki juogi ki baa kpa Solo, 24ama o den bandi bi juogibiadi yeni. Bi den gu o u dogu buliñoajala kani u yensiinu leni ku ñiagu kuli ki baa kpa o. 25Ñayengu bi ŋoadikaaba den kuani o ku baabuociangu nni ki jiini o u dogu bilinciamu puoli po. 26Solo n den pundi Jelusalema, o den moandi ki baa taani leni Jesu ŋoadikaaba, ama bikuli den jie ki naa daani ke o tua Jesu ŋoadika. 27Lani, Banabasa den gedini o Jesu tondiba kani, ki togidi ba Solo n den laa o Diedo u sanu po maama leni o Diedo n den maadi leni o maama, leni Solo n den wangi Jesu maama leni li papaali Damasa Jesu yeli po maama. 28Lanwani Solo den taani leni Jesu tondiba, ki goagoadi Jelusalema nni kuli ki maadi o Diedo Jesu yeli nni leni li papaali. 29O den maadi leni yaa Jufinba n maadi gileka maama moko ki niania leni ba, ama bi den moandi ki baa kpa o. 30Bi kpiiba n den bandi lani, bi den ciani Solo hali Sesale ki gedini o Tasa dogu po. 31Lani Kilisiti nitaanli den ye leni mi yanduanma Jude nni leni Galile nni leni Samali nni kuli. Li den fandi ki pugidi o Diedo sanŋoadima nni ki fangi o boncianla. U Tienu Fuoma Yua den paagidi li ke li niba coali pugidi. 32Pieli n den goadi ki lindi i kaani kuli, o den gedi ki ban fuondi bi nigagidiŋanba yaaba n ye Lida dogu nni. 33Lankani o den laa o ja ke bi yi o Ene. O gbanandi den kpe ke o dua ku kaagu po bina nii. 34Pieli den yedi o: “Ene, Jesu Kilisiti paagi a. Fii ki fiini a kaagu.” Lanyogunu Ene den fii. 35Lida yaaba leni Salono yaaba kuli den laa o ki lebidi ki ŋoadi o Diedo. 36O pua den ye Jafa dogu nni ke bi yi o Tabita, yaali n soagini ki yedi Dokasa lan tie o ñoago. O den tiendi a tuonŋama ki puuni a luoda mi todima boncianla. 37Laa dana nni o den yiagi ki kpe. Bi den wali o ki duoni o li dietuadili nni ki duani o likani. 38Li sua ke Lida kuu leni Jafa. Jesu yaaba yaaba n ye Jafa den gbadi ke Pieli ye Lida, ki soani jaba lie ban ban mia o ki yedi: “Jaligi ki cua ti kani.” 39Pieli den fii ki yegi leni ba. Wan pundi likani bi den ciani o li dietuadili yeni po. A kpepuona kuli den nagini o kani ki buudi, ki waani o Dokasa n den ye leni ba yaa yogunu wan den ŋali bipo yaa tiayiekaadi leni yaa tialakaadi. 40Pieli den ñani bikuli lienni ki gbaani ki jaandi. Lani o den pegidi ki diidi o kpiemo ki yedi: “Tabita, fii.” O pua yeni den ŋubidi ki laa Pieli ki fii ki kali. 41Pieli den cuo o nuu ki fiini o ke o sedi. O den yini bi nigagidiŋanba leni a kpepuona, ki taa o ki teni ba ke o fo. 42Jafa yaaba kuli n den gbadi laa laabaalo, bi siiga bi niba boncianla den daani o Diedo. 43Pieli go den tieni danaba Jafa ki ye o candeni o jabido Simono deni.

will be added

X\