JESU TONDIBA TUONA TILI 7

1Bi kopadicianba bado den buali Etiena ki yedi o: “Li tie yeni moamoani bi?” 2Etiena den yedi: “Yinba, n kpiiba leni n baanba, cengi mani! Ti kpiagidi Tienu den doagidi o yuli ti yaaja Abalahama po wan den ye Mesopotami diema nni yaa yogunu, hali ke o daa fii likani ki gedi ki ye Halana dogu. 3O den yedi o: ‹Fii ki ña a diema nni ki ŋa a deni yaaba, ki gedi min baa waani a yaa diema nni.› 4Lane Abalahama den ñani Kalide yaaba diema nni, ki gedi ki ban kali Halana. O baa n den kpe yaa yogunu, U Tienu den teni ke o fii ki ñani likani ki cua yaa diema n tie na, yin di ye naankani moala. 5U Tienu ki den puni o wan die naani mi naa diema nni, baa taapuogu n baa ŋmaa naani. Ama o den niani o ke o baa ti pa o mi diema yeni man tua wani leni o puoliŋuani n baa ti die yaama, baa ke waa den pia biga laa yogunu. 6U Tienu den yedi o yaala n tie na: ‹A puoliŋuani baa tie canbaa mi dielanma nni, bi nilanba yeni baa ti cuo ba ti yonbidi ki yaa wangi ba fala hali bina kobinaa. 7Ama mini U Tienu n baa bu leni yaa nilanbuolu n cuo ba ti yonbidi yeni. Lani yaa puoli n niba baa fii ki ña laa diema nni, ki go cua ki yaa kpiagidi nni mi naa diema nni.› 8Lani U Tienu den kuani yaa ŋantaado n tie ku koanciagu leni Abalahama. Lani yaa po, Abalahama n den mali Isaaka, o den kuani ku koanciagu o madi daniili daali. Wani Isaaka den mali Jakobo ki kuani o yeni. Jakobo den mali piiga n jaba lie, lani n tie ti yaajanba, ki kuani bani mo. 9Kelima ti yaajanba den pia li nunponbiadili bi waalo Josefi po, bi den kuadi o ke bi gedini o Ejipiti ti yonbidi. 10Ama U Tienu den ye leni o ki ga o wan ye yaa fala kuli nni. O go den puni o mi yanfomoanma ki teni ke Ejipiti bado Falono mani leni o, ki dini o li bali ke o tua Ejipiti gufeneeli ki go die wani Falono diegu nni kuli. 11Lani n pendi mi koncianma den baa Ejipiti nni kuli leni Kanana nni. Fala den ye boncianla. Ti yaajanba den luo li bonjekaala. 12Jakobo den gbadi ke mi jiema ye Ejipiti po, ki kpa soani ti yaajanba likani yenma. 13Ban guani likani mi liema, Josefi den waani o kpeliba wan tie yua, Falono moko den bandi Josefi n tie yaa nibuolu yua. 14Lani Josefi den soani ke bi yini o baa Jakobo leni o deni yaaba kuli yaaba n den pundi piilele n niba muu yeni, ke bi cua o kani. 15Jakobo den gedi Ejipiti, ki kpe lipo, wani leni ti yaajanba. 16Bi den tugi ba ki gedini ba Sikema ki ban piini ba Abalahama n den da yaa kuli nni Hamola bijaba kani. 17U Tienu n baa tieni wan den niani Abalahama yaa ñoanianu yaa yogunu n den nagidi, li sua ke ti buolu yaaba den yabidi pugidipugidi Ejipiti nni. 18Hali yaa yogu ke baditoa, yua n kaa bani Josefi po, den ti dini Ejipiti bali. 19O bado yeni den janbi ti buolu yaaba ki wangi ti yaajanba fala, ki teni ke bi lu bi canpandimu ke ban da ye. 20Laa yogunu bi den mali Musa, ke o ŋani U Tienu nintuali. Bi den kubi o o baa deni ŋmaali taa. 21Ban den ti luni o, Falono bisalo den taa o o yuceli po ki kubi o nani o bijacele yeni. 22Bi den bangi Musa Ejipiti yaaba cogu leni bi yanfobanma kuli. O den pia u paalu mi maama leni a tuona nni kuli. 23Wan den pia bina piinaa, li den kua o pali nni wan gedi ki ban le o buolu, Isalele yaaba. 24O den pundi ki laa ke Ejipiti yua faligidi Isalele yua. Lani o den ga Isalele yua koanli ki pua ki ku yua n waani o fala yeni ki tu o o panli. 25O den tama ke o kpiiba Isalele yaaba baa bandi ke U Tienu baa ga ba kelima wani yaa nuu yaa po, ama baa den bandi. 26Lan den fii ki fa o den laa Isalele yaaba siiga niba lie ke bi pua biyaba. O den moandi ki baa teni ban goa ki mangi leni biyaba, ki yedi ba: ‹Yinba yi tie buoyendu, be n teni ke yi faligidi yiyaba?› 27Yua n den faligidi o nisaalilielo den tudi Musa ki yedi o: ‹Ŋme dini a li bali ŋan tua ti yudaano leni ti bujialo? 28Naani a bua ki kpa nni nani wonli nni ŋan den ku Ejipiti yua maama yeni bi?› 29Laa maama po Musa den sani ki gedi ki ban ye Madiana diema nni. O den mali bonjala lie lipo. 30Bina piinaa n den pendi Musa den ye Sinayi juali fanpienma nni. O den laa yaa fatuugu n co ke maleki den doagidi o yuli opo u mupienu nni. 31Musa den laa laa bonla ke li paki o. Wan den nagidi ki baa diidi bonŋanla, o den gbadi o Diedo nialu ke o yedi: 32‹N tie a yaajanba Tienu, Abalahama, Isaaka leni Jakobo Tienu.› Ti jawaandi den cuo Musa ke o digibi kaa tuo ki baa diidi. 33O Diedo den yedi o: ‹Piti a cacaadi kelima ŋan se yaa kaanu yeni tie tingagidikaaga. 34N laa n niba fala Ejipiti nni, ki go gbadi bi dunli, ki jiidi ki baa faabi ba. Ŋan cua moala, n baa soani a Ejipiti.› 35Musa yeni tie ti yaajanba n den yie yua ki yedi o: ‹Ŋme dini a li bali ŋan tua ti yudaano leni ti bujialo?› Wane, ke U Tienu n den soani ke o tua bi yudaano leni bi faabika kelima yaa maleki n den doagidi o yuli opo ku fatuugu nni yaa paalu po. 36Wani Musa den tieni mi bancianma leni sinankeeninba Ejipiti nni leni mi ñincianmoanma nni, ki ñani Isalele yaaba, ki go tiendi mi bancianma leni sinankeeninba mi fanpiencianma nni hali bina piinaa. 37Wani Musa tie yua n den yedi Isalele buolu yaaba: ‹U Tienu baa fiini yi siiga o sawalipualo yua n tie nani mini.› 38O den ye leni Isalele yaaba nitaanli mi fanpiencianma po, leni ti yaajanba yeni, leni U Tienu maleki yua n den maadi leni o Sinayi juali kani. O den baa li miali maama, ki soagini ma tipo. 39Ama ti yaajanba naa den tuo ki ŋua Musa n den yedi ba yaala. Bi den yie o maama. Bi pala nni bi den bua ki goa ki gedi Ejipiti. 40Bi den yedi Alono: ‹Duadi tipo yaa buli n baa yaa cuoni ti nintuali, kelima Musa yaa ja n ñani ti Ejipiti diema nni yeni tii bani yaala n tieni o.› 41Laa dana nni bi den duadi yaa bulo n tie ki naabiga nannanli, ki padi opo a pada, ki mangi bi pala kelima bi nii n tieni yaala po. 42Lane U Tienu den lebidi ki ŋa ba, ki cedi ke bi kpiagidi tanpoli ŋmaali, nani lan diani bi sawalipuaba tila nni maama: ‹Yinba, Isalele buolu yaaba, Naani yi den padi npo ti yandi leni a pada buoli kuli Yin den ye mi fanpienma nni bina piinaa bi? 43Yi den tugi o bulo Moloko gbandieli Ki go tugi o bulo Lefana yaa ŋmabiga, Yin den tagi yaa buli nannana ki baa kpiagidi ŋa. Lani yaa po n baa teni ban gedini yi ti yonbidi hali Babilona diema liiga.› 44Ti yaajanba den pia siedi gbandieli mi fanpiencianma nni. Musa den tii li nani U Tienu n den puogi o maama, ke li tie yenma leni wan den waani o yaa nannanli. 45Lani yaa puoli, Josue n den gobidi ti yaajanba yaaba den kuani li gbandieli yeni mi naa diema nni. Bi den diedi yaa nibuoli n den ye ne kelima U Tienu den deli ki ñani ba bi nintuali. Li gbandieli yeni den ye ne hali ki pundi Dafidi yogunu. 46Dafidi den baa li ŋanbili U Tienu kani ki mia o ke wan pa o u sanu wan ŋanbi wani Jakobo Tienu po u yekaanu. 47Ama yua n den maa opo li dieli den tie Salomono. 48Leni lani kuli Tanpojoma Tienu naa ye bi nisaaliba n maa yaa dieli nni nani o sawalipualo n yedi maama: 49O Diedo yedi: ‹Tanpoli tie n bali kalikaanu, Ki tinga mo tie n taaŋmaakaanu. Yi baa maa npo be yaa diebuolu? Bi, le n baa tua n fuodikaanu? 50N yaa nuu ka tagi likuli?› 51Yinba u tupaalu danba, yi tie nani a jifola yeni yi pala nni leni yi tuba po. Yi yiedi U Tienu Fuoma Yua po yogunu kuli nani yi yaajanba n den tiendi maama. 52O laa sawalipuale ke yi yaajanba ki faligi o? Bi den ku yaaba n den tuodi ki wangi o Niteginka cuama. Moala, yi janbi o ki ku o. 53Yi den baa U Tienu balimaama, o malekinba n den soagini yi yaama, ama yii tuo ki kubi ma.” 54Bi cancannikpeliba taancianli yaaba n den gbadi Etiena maama yeni, bi pala den beni hali ke li kandi ke bi cegini bi ñina opo. 55Ama Etiena den gbie leni U Tienu Fuoma Yua ki den yaadi ki diidi tanpoli po ki laa U Tienu kpiagidi, ki go laa Jesu ke o se U Tienu jienu. 56O den yedi: “Diidi mani, n laa ke tanpoli luodi, ke o Ja Bijua se U Tienu jienu.” 57Lane bi den biini bi tuba ki tiani, ki taani ki bibi o yenma, 58ki ñani o u dogu nni ki ban lugidi o a tana. Bi siedinba den bili bi tiayiekaadi ban den yi yaa jawaalo Solo taana kani. 59Ban den lugidi Etiena a tana yaa yogunu, o den jaandi ki yedi: “N Diedo Jesu, ŋan ga n naano.” 60Lani o den gbaani ki kpaani ki yedi: “N Diedo, da tuni ba ti naa tuonbiadi.” O den yedi yeni ki kpe. Solo den saa moamoani ban ku Etiena yeni po.

will be added

X\