JESU TONDIBA TUONA TILI 6

1Laa dana nni Jesu ŋoadikaaba den pugidipugidi ke yaa Jufinba n maadi gileka maama den yenbidi kelima yaa Jufinba n tie dentieba yaa den boagidi daali kuli todima, bi yen kandi yaa Jufinba n maadi gileka maama yaa kpepuona kaa puuni ba. 2Bi piiga n niliediba den yini bi ŋoadikaaba kuli ki yedi ba: “Laa pundi tin cedi U Tienu maama wangima ki yaa tendi mi jiema. 3Lani yaa po, ti kpiiba, yin gandi yi siiga niba lele, bi niba n tiendi yaaba yaa po o siediŋamo, yaaba n gbie leni o U Tienu Fuoma, leni mi yanfuoma mo. Ti baa puogi ba laa tuonli, 4ama tinba wani baa pa ti yula i jaandi po leni U Tienu maama wangima po ki kan cedi.” 5Laa maama den mangi li nitaanli kuli. Bi den gandi Etiena, yua n gbie leni li dandanli o Diedo po leni U Tienu Fuoma Yua leni Filipi, Pilokolo, Nikanola, Timono, Pamenasa, leni Nikolasa yua n den tie nilamo, Antiosa yua, ki nan lebidi ŋoadi U Tienu. 6Bi den cuani laa jabe Jesu tondiba kani, ke bi jaandi ki mia U Tienu ki maani bipo bi nii. 7U Tienu maama den yayadi ki pugidi, Jesu ŋoadikaaba den pugidi hali boncianla Jelusalema, bi kopadicianba siiga mo boncianla den tuodi ki ŋua Jesu. 8Etiena den gbie leni U Tienu ŋanbili leni u paalu, ki tiendi bi niba siiga mi bancianma leni sinankeenciami. 9Bi nitianba yaaba n tie li balimaama bangima dieyenli yaaba, ban yi yaaba bi Nifaabikaaba, den fii ki nia leni Etiena. Bi den tie yaa Jufinba n ñani Silena leni Alesandili dogi nni, leni yaaba n ñani Silisi leni Asi yaa diema nni kuli. 10U Tienu Fuoma den puni Etiena mi yanfuoma ke o maadi ke bi kan den fidi ki nia leni o. 11Lane bi den suu bi jaba li suuli ke bi pua opo mi faama ki yedi: “Ti gbadi ke o maadi ti masugidi Musa po leni U Tienu po.” 12Bi den lengidi bi niba leni bi nikpeliba leni li balimaama bangikaaba yama. Lani bi den cua ki bibi Etiena ki cuo o ki gedini o bi cancannikpeliba taancianli po. 13Bi go den teni ke bi siedi-faadanba pua opo mi faama ki yedi: “O naa ja sugidi u naa kaangagidiŋamu, ki go sugidi li balimaama kaa cedi. 14Ti go den gbadi ke o yedi ke Jesu, Nasaleti yua yeni, baa bolini U Tienu diegu na ki lebidi Musa n den bili tipo yaa bogida.” 15Bi cancannikpeliba yaaba n ka bi taancianli kani kuli den diidi Etiena, ki laa ke o nunga tie nani maleki yaaga yeni.

will be added

X\