JESU TONDIBA TUONA TILI 3

1Pieli leni Jan den caa U Tienu diegu po i jaandi yogunu, li den tie li yenlebidili yogunu. 2Bi niba den yuani yaa ja n mali ki tie wabo. Daali kuli bi den yuani o ki kaandi o U Tienu diegu buliñoajabu yaabu n yi bu Buliñoaŋanbu kani, ke wan yaa miadi yaaba n kua U Tienu diegu nni. 3Wan den laa Pieli leni Jan ke bi baa kua U Tienu diegu nni, o den mia ba mi todima. 4Pieli leni Jan den nuali o ke Pieli yedi o: “Diidi ti.” 5O den diidi ba, ki tama ke o baa baa bikani liba. 6Pieli den yedi o: “Mii pia ŋanjilifa mii pia wula mo, ama min pia yaala, n puni a: Nasaleti yua Jesu Kilisiti yeli po, fii ki yaa cuoni.” 7Lani, o den cuo o jienu ki fiini o. Lanyogunu lanyogunu o taana leni o kpagima den paagi. 8O den fii yenma ki sedi ki di yaa cuoni. O den yegi leni ba ki kua U Tienu diegu nni ki cuoni ki yugi ki ciini ki pagi U Tienu. 9Bi niba kuli den laa o ke o cuoni ki pagi U Tienu. 10Bi den bandi ke o tie yua n den maani ki ka U Tienu diegu buliñoajabu yaabu n yi bu Buliñoaŋanbu kani ki miadi mi todima. Li den paki ba hali boncianla leni yaala n tieni o. 11O ja yeni n den taabi Pieli leni Jan, li pakili den cuo bi niba kuli ke bi sani ki gedi bikani Salomono janli kani. 12Pieli n den laa ba, o den yedi bikuli: “Yinba Isalele yaaba, be yaa po ke yaala n tieni na paki yi? Be yaa po ke yi nua ti nani li tie tinba n teni ke o ja na cuoni kelima ti banma po, yaaka kelima tin fangi U Tienu maama yaa po? 13Abalahama leni Isaaka leni Jakobo Tienu, wani, ti yaajanba Tienu, den kpiagi o naacemo Jesu. Yi den teni o li bali danba nuu nni, ki yie o Pilata bujiali kani, baa ke o den jagi ke o baa faabi o. 14Ama yi den yie o, wani o Nigagidiŋamo leni o Niteginka. Yi den mia ban faabi yipo o nikpalo. 15Yi den ku li miali yaa Diedo, U Tienu n den fiini yua bi tinkpiba siiga. Ti tie siedinba laa bonla kuli po. 16Li tie li dandanli wani Jesu yeli po n teni ke yaa ja n tie na, yin nua ki go bani yua, paagi kelima Jesu yeli po. Li tie li dandanli wani Jesu po n teni ke o ja na paagi cain yikuli nintuali. 17Moala, n kpiiba, n bani ke yinba leni yi yudanba den tieni lankuli kelima yii den bani yin tieni yaala. 18Ama U Tienu den kuani yeni wan den tuodi ki teni ke o sawalipuaba pua sawali ki waani yaama. Lani n tie ke wani Gandi Yua den baa le fala. 19Lani yaa po yin lebidi yi yama ki daani U Tienu ke wan n ŋuudi ki ñani yi tuonbiadi, 20lanwani o Diedo baa cuani mi fuodima yogini, ki soani Jesu Kilisiti wan den tuodi ki jagi ke o baa soani yipo yua. 21Wani Jesu baa ye tanpoli hali li yogunu n baa ti pundi ke U Tienu baa go ŋanbi li bonla kuli nani wan den tuodi ki teni ke o sawalipuaba yaaba n gagidi pua sawali ki yedi yaala hali yogu. 22Bi siiga Musa den yedi: ‹O Diedo yi Tienu baa gandi ki fiini yi buolu siiga o sawalipualo nani mini. Yin cengi mani wani n baa yedi yi yaala kuli. 23Yua n kan tuo ki cengi laa sawalipualo maama, bi baa ñani o U Tienu niba siiga ki bolini o.› 24Ki cili Samueli leni bi sawalipuaba yaaba n ŋoadi o ki soagini U Tienu maama kuli, bikuli den tuodi ki waani yaa dana n tie na maama fuuli. 25U Tienu n den teni ke o sawalipuaba maadi yaa maama yeni tie yinba yaa po. Wan go den kuani yaa ŋantaado leni ti yaajanba moko tie yinba yaa po. O ŋantaado yeni tie wan den kuani yua leni Abalahama ki yedi o: ‹Ŋanduna nibuoli kuli n baa li seli li kelima a puoliŋuani yaa po.› 26U Tienu den fiini o naacemo Jesu ki kpa soani o yinba yaa kani ke wan seligi yi ki teni yua kuli n lebidi ki ŋa o tuonbiadi.”

will be added

X\