JESU TONDIBA TUONA TILI 28

1Tin den pundi li jaali leni laafia, ti den bandi ke bi yi li kpendegili yeni Malita. 2Likani yaaba, den ŋanbi tipo ke li kandi. Ki taaga den mii, ti wadi mo den ye boncianla, ke bi cuoni tipo mi fantama, ki yini tikuli ke ti nagini ki yie. 3Polo den wodi ti dabidi ki baa tieni mi fantama nni. Ku muwuligu den tuogi li waalabili ke li ñani ti daadi nni ki joani Polo nuu. 4Laa dogu yaaba n den laa ke li juani Polo nuu yeni, bi den yedi biyaba: “Moamoani o naa ja baa tie nikpale. Baa ke o ciadi mi ñincianma nni, U Tienu teginma naa cedi o wan yaa ye.” 5Ama Polo den kpia o nuu ke o wa baa mi fantama nni ke liba kuli ki tieni Polo. 6Yaaba n ye likani den gu ki tama ke o nuu baa moali, yaaka ke o baa baa ki kpe lanyogunu. Ama ban den guudi ki sua ke liba kuli ki tieni o, bi den lebidi bi yantiali ki yedi ke o baa tie buloba yo. 7Li kpendegili yudaano den yi Pubiliyusa. O diegu den kuu leni tin ye naankani. O den cua ki biali ti ki gedini ti o denpo ki ga ti cangu hali dana taa leni ki nunmanga. 8Li den sua ke o baa dua ke o gbanandi beni ke o go pia puŋaankaaga. Polo den gedi o kani ki maani opo o nii ki jaandi ki paagi o. 9Lani yaa po li kpendegili yaaba, yaaba n yia kuli den cua o kani ke o paagi ba. 10Bi den jigini ti bonŋanla. Tin baa fii yaa yogunu, bi den puni ti tin luo yaala kuli. 11Li sua ke ñinbiatoagu den ñani Alesandili ki pundi tin ye yaa kpendegili hali u faalu n daa fii yaa yogunu, ki sedi ki gu hali ke u faalu yogunu n pendi. Bi den yi gu Diyosikuli. Tin den tieni ŋmaali taa likani, ti den kua ku niinni ki fii. 12Tin den duodi ki pundi Silakusa dogu, ti den tieni likani dana taa. 13Ti den suagi liiga ki balini mi ñincianma jaali ki pundi Lejiyo. Lan den fii ki fa, ganu po faagu den fii ki tudi ti ki teni ke ti pundi Pusoli li dalieli daali. 14Ti den lingi ki laa ti kpiiba likani ke bi mia ti ke ti kali leni ba dana lele. Ti sancenli den tientieni yene ke ti gedi Loma. 15Hali ke ti daa den pundi Loma, li den sua ke ti kpiiba yaaba n tie Loma yaaba den ga ti laabaalo ki tuogi ti Apiyusa daaga kani. Nitoaba mo den cua hali yaa candiegu n yi a Candietaada ki tuogi ti lankani. Polo n den laa ba o den tuondi U Tienu ki paagi o pali. 16Tin den pundi Loma, a minteela yudaano den teni a kpaada o yudanciamo nuu nni, ama bi den puni Polo ke o baa li dieli wan baa ye naankani obebe ke minteeli yenli gu o. 17Dana taa n den pendi, Polo den yini Jufinba nikpiaga kuli. Ban den taani, o den yedi ba: “N kpiiba, mii tieni liba ti buolu po, mii yie ti yaajanba bogida mo, baa yeni bi den kuani nni li kpaadidieli nni Jelusalema, ki go teni nni Loma yaaba nuu nni. 18Loma yaaba n den buali nni ki bua ki bandi min pia yaa tagili, bi den bua ki ŋa nni kelima baa laa ke n tieni liba yaala n pundi ban kpa nni. 19Ama Jufinba n den yie, n den sua ke li tie npo tiladi min soagini n buudi Sesa kani. Mii den tieni yeni kelima n bua ki tabi n buolu tuotabiguba kuli ka. 20Lani yaa po ke n mia ki bua ki le yi ki go maadi leni yi. Kelima li tie Isalele yaaba suginma po ke n luo leni i kuseseli na.” 21Bi den goa ki yedi o: “Tii baa tiliba kuli ke li ñani Jude diema po ki maadi a maama. Ti kpiiba siiga oba mo naa ñani lipo ki cua ki maadi apo yaala n bia. 22Die ti bua ki gbadi a kani ŋan sua yaala, kelima ti bani ke bi yie u naa jaanbuolu i kaani kuli.” 23Bi den bili ban baa goa ki taani yaa daali. Li daali n pundi bi tianba den taani wan cani naani ki yaba. Bi den cua ku tiŋaagu ke Polo den maadi leni ba ki yaa caa hali ku yenjuogu, ki bundi bipo ki tieni siedi ke U Tienu diema pundi. O den togidi ba yaala n diani Musa balimaama nni leni bi sawalipuaba yaa tila nni ki maadi Jesu maama fuuli, ki moandi ki baa dadi bi yama ban tuo ke Jesu maama tie moamoani. 24Bi nitianba den tuo ke wan maadi yaa maama tie moamoani, bi nitianba mo den yie baa tuo. 25Ban den ña o kani ki niania leni biyaba, Polo den maadi mayenma ki pugini ki yedi: “U Tienu Fuoma Yua den pia moamoani wan den teni ke o sawalipualo Esayi maadi leni yi yaajanba yaa maama ki yedi: 26Gedi u nibuolu na po ki yedi ba: Yi baa gbadi bonŋanla, ama ki nan kan bandi liba, Yi baa noanli bonŋanla, ama ki nan kan le liba. 27Kelima u nibuolu na pala juagi, Bi biini bi tuba ki go ŋubini bi nuni. Ke ban da ti le leni bi nuni, Ki da gbadi leni bi tuba, Ki da ga bi pala nni, Ke ban da lebidi bi yama min paagi ba.” 28Polo go den pugini ki yedi: “Lanwani yin bandi mani ke U Tienu di soani o tindima maama yeni bi nilanba po yo. Bani wani baa cengi.” [ 29Polo n den yedi yeni, Jufinba den ñani ki nia leni biyaba boncianla.] 30Lan pendi Polo den ye wan den pa i ligi ki ye yaa dieli nni obebe yeni binmuna lie. O den bialiti yaaba n kpendi o kani ki baa le o kuli. 31O den wangi ba U Tienu diema maama, ki go bangi ba o Diedo Jesu Kilisiti maama fuuli leni li papaali boncianla. Oba kuli ki den yie opo wan da maadi.

will be added

X\