JESU TONDIBA TUONA TILI 27

1Ban den jagi ki bili ke ti baa kua ku ñinbiagu nni ki gedi Itali diema nni, bi den teni a minteela yudaano ban yi yua Juliyusa n yaa ji Polo leni kpaaditoana. 2Ti den kua yaa ñinbiagu n ñani Adamita dogu nni, ki baa gedi yaa dogi n ye Asi ñinkunu. Ti den fii ki caa, ke Alisitaka, Maseduana diema Tesalonika dogu yua yegi leni ti. 3Lan den fii ki fa, ti den pundi Sidoni ki sedi. Juliyusa den kubi Polo leni mi buama, ki puni o ke o ñani ku ñinbiagu nni, ki gedi ki fuondi o danlinba ki baa mi todima bikani. 4Ti den fii lankani ki suagi liiga ki balini Sipila kpendegili kelima u faalu den togidi ti. 5Ti den suagi liiga ki poandi mi ñincianma, ki balini Silisi leni Panfili diema, ti den ban pundi Lisi diema, ki sedi Mila dogu nni. 6Lankani a minteela yudaano den laa ñinbiatoagu, yaagu n ñani Alesandili dogu nni ki baa gedi Itali, ki kuani ti ku niinni. 7Ti den suagi ki cuoni dindini danaba ki nagidi Sinida dogu leni fala. U faalu n go den togidi ti ke tii den fidi ki suagi liiga, ti den lebidi ki balini Kileta kpendegili ki teli Salimone po. 8Ti den suagi liiga leni fala hali ki ban balini ki pundi yaa dogu n yi ti ñinbiadi Sedikaanŋamu, yu n kuu leni Lase dogu ki sedi. 9Ti cenli den waagi hali ke li den ban pundi yaa yogunu ke ku ñinbiagu cenli biagidi kelima mi ñoalolima yogunu den pendi. Lane Polo den tuodi ki waani ba 10ki yedi: “N sua ke ti yaa suagi liiga, ku ñinbiagu cenli baa biagi. Laa tie ku ñinbiagu leni gun tugi yaa tuga bebe ka baa bodi, ti miana moko baa ti taani lienni.” 11Ama a minteela yudaano den dugi ku ñinbiagu gobidika leni ku daano maama po ki cie Polo yaa maama. 12Kelima ban den ye yaa ñinbiadi sedikaanu yeni naa den dagidi bipo ban yaa ye likani hali ku fawaagu. Lane ti siiga yaaba, yaaba n yaba ki cie den yedi ke li baa ŋani tin go fiini a cabiciama ki ña likani ki moandi ki le ti yaa baa fidi ki suagi ki pundi Fenikisi dogu ki sedi lankani hali ku fawaagu yogunu n pendi. Fenikisi yeni den tie Kileta ñinbiadi sedikaanu ki tiegi jienu ki goa nintuali po, leni ganu ki goa nintuali po. 13Yaa faagu n ñani ganu po den figi waamu waamu ke bi tama ke bi baa fidi ki tieni nani ban den jagi maama. Bi den fiini ku ñinbiagu kubikpiagili, yaali siendi gu, ki suagi ki balini Kileta kaa foagi leni li jaali. 14Ama lan den yen waamu puoli faaligu den ñani li kpendegili po ki figi boncianla. 15Ku faaligu yeni den taa ku ñinbiagu ke ku naa go fidi ki baa togidi gu. Lani, ti den cedi ke ku faagu taa gu ki gedini gu kun bua naani. 16Ti den balini kpendegili ke li wa ki yi Kiloda ganu po. Nani lin den sieni tipo ku faaligu waamu yeni, ti den fidi ki cuo ki ñinbiabiga, ama leni fala. 17Bi den yugidi ga ki kuani ga ku ñinbiagu nni. Li yaa puoli bi den soali i baabi ku ñinbiagu tiipo ki loli bonŋanla. Bi den jie ke u faalu baa tudi ki gedini ti Libi boanjaali yaa tanbi-tintingu po. Lani, bi den jiini ku dagbeegu, ki cedi ke u faalu tudi ki gedini ti. 18Kelima u faalu n go den waani ti fala boncianla maama po, lan den fii ki fa bi den cili ki luni a tugitiama mi ñima nni. 19Li dataali daali bani biba den taa ku ñinbiaciangu tuonsoantiadi ki luni mi ñima nni. 20Dana boncianla den pendi ke u yienu leni a ŋmabila naa den ñani. Ku faagu mo den figi ki bia hali boncianla ke tii go den daani ke ti go baa ye leni miana. 21Li den waagi danaba ke niloba kuli ki den dini. Lani Polo den sedi bi siiga ki yedi ba: “Li den baa ŋani yi yaa den cengi n maama kaa den fii Kileta. Ti kan bi lu ti tuga ki go le yaa fala n tie na. 22Moala n waani yi ke yin paagi mani yi pala, kelima yi siiga oba kuli kan bodi kali ku ñinbiagu bebe. 23Kelima U Tienu yua n die nni ke n tuuni opo yeni yaa maleki doagidi o yuli npo ku naa ñiagu, 24ki yedi nni: ‹Polo, ŋan da jie liba. Li tie tiladi ŋan pundi ki sedi Sesa nintuali. U Tienu go ŋanbi apo ki puni a ke yaaba n ye leni a ku ñinbiagu na niinni kuli siiga, baa yendo kan bodi.› 25Lanwani yin paagi mani yi pala, kelima n pia li dandanli U Tienu po ke li baa tua nani wan yedi nni maama. 26Die tiladi ti baa tuoni kpendegiliba jaali kani.” 27Li piiga n danaadili daali ñiagu, ku faagu den pengipengi ti ki caani ti ganu leni jienu Adiliatika yaa ñincianma nni. Ku yagisiigu ku ñinbiagu tuonsoanba den tama ke ti nagidi tingaba. 28Bi den luni mi ñinñuanma bonbiigikaala, ki sua ke mi ñima ñua ki pundi nukpanduna piiyia. Lan pendi waamu, bi go den biigi ki sua ke mi ñima ñua ki pundi piiluoba n nukpanduna muu. 29Bi den jie ke ku ñinbiaciangu baa kpaabi yaa tanciama n ye likani mi ñima nni, ke bi taa yaa kubikpiaginaada n ye ku juodima, ki jiini a mi ñima nni ke gun da go cuoni. Lani bi den miadi lan fa, ki ji leni mi yanjegibima. 30Ku ñinbiagu tuonsoanba den tieni nani bi baa jiini yaa kubikpiaga n ye ku yuli po yeni, ama bi go den jiini ki ñinbiabiga mi ñima nni ki baa kua ki niinni ki ŋa ku ñinbiaciangu ki sani ki cia. 31Polo den yedi a minteela yudaano leni a minteela kuli: “Bi jaba yeni yaa sedi ku ñinbiaciangu nni, yi kan cia.” 32Lanwani a minteela den jia yaa baabi n doali ki ñinbiabiga leni ku ñinbiaciangu, ki cedi ke ki baa, ke mi ñima taa ga ki gedini. 33Lan den bua ki fa Polo den mia bikuli ban je waamu, ki yedi ba: “Dinla n tie piiga n dana naa ke yi ji leni fala ki naa dini jiemaba kuli mo. 34N mia yi yin je mani, lan baa todi yi yin ciadi. Yi siiga baa niyendo yuyengu kan bodi.” 35Wan den yedi yeni, o den taa dupen ki tuondi U Tienu bikuli nintuali ki cabidi ki ŋmani. 36Lane bikuli den baa li papaali ki dini. 37Tinba yaaba n den ye ku ñinbiaciangu yeni niinni kuli den pundi kobilie n piilele n niba luoba. 38Ban den dini ki dagidi, bi den luni ban tugi yaa ŋalikama mi ñima nni ke ku ñinbiagu yuagi. 39Lan den fa, baa den bandi ban baali yaa tinga, ama bi den laa ku kpenkadigu ke ku jaali tie tanbi-tintingu. Bi den jagi ke li yaa baa tuo ban nagini ku ñinbiagu ki sieni ku lankani. 40Bi den jia yaa baabi n kubi a kubikpiaga kuli ki ŋa ŋa mi ñima nni, ki go loti yaa baabi n luo ku ñinbiagu bonpegidikaala. Lani bi den yugidi yaa cabicianli n ye ku ñinbiagu yuli kani ke u faalu tudi ku ñinbiagu ke gu teli li jaali po. 41Ban den pundi yaa tanbijuali n ye mi ñima nni, ku ñinbiagu den kpaabi li ki sedi. Ku ñoabu den feli mi tanbiima yeni niinni jinjini, a ñinguona den pua ku puoli po leni u paalu hali ki teni ke ku kuakua bonjenajena. 42A minteela den jagi ke bi baa kpa a kpaada, kelima baa den bua bi siiga baa yendo n kua mi ñima nni ki dugi ki cia. 43Ama bi yudaano yua n den bua ki ga Polo miali, den yie bipo ke ban da tieni yeni. O go den yedi ke yaaba n bani li ñindugili n kpia yugi ki baa mi ñima nni ki dugi ki pundi li jaali. 44O go den yedi yaaba n sieni mo, bi nitianba n cuo ti dapagidi, bi tianba mo n cuo ku ñinbiaciangu n mudi ki ŋa yaa dajena, ki ŋoadi ba. Bi den tieni yeni ke bikuli den pundi li jaali po leni laafia.

will be added

X\