JESU TONDIBA TUONA TILI 25

1Fesitusa n den cua ki tuuni o bali tuonli dana taa, o den fii Sesale ki gedi Jelusalema. 2Bi kopadicianba yudanba leni Jufinba niciama den cua o kani ki waani o ban pia yaa maama leni Polo. 3Bi den miadi o ki tigini o wan ŋanbi bipo ki soani ban yini Polo wan cua Jelusalema. Ama bi den jagi li jagibiadili ki baa kpa o u sanu po. 4Fesitusa den goa ki yedi ba ke bi ji Polo Sesale, ke wani oba baa goa lipo li kan waagi. 5O go den yedi ba: “Yi siiga yaaba n tugi li yuli n yegi leni nni lipo, o ja yeni yaa pia tagiliba ban maadi ban pia opo yaa maama.” 6Fesitusa naa den kali bi siiga ke li cie dana nii bi dana piiga, ki jiidi ki guani Sesale. Lan den fii ki fa, o den kali u bujiakaanu po, ki yedi ban cuani Polo. 7Polo n den cua, Jufinba, yaaba n ñani Jelusalema, den lindi o ki maadi opo ki kuliti o leni yaa maama n yaba ki bia boncianla, ban kan fidi ki doagidi ke yaama n tie moamoani. 8Polo den maadi ki baa ga o yuli ki yedi: “Mii tieni yaala n bia Jufinba balimaama po, yaaka U Tienu diegu po, yaaka Loma diema badiciamo Sesa po.” 9Fesitusa yua n den bua ki yaa mani leni Jufinba, den yedi Polo: “Naani a baa tuo ki do ki gedi Jelusalema min ban jia ban pia leni a yaa maama lankani bi?” 10Polo den yedi: “N se o badiciamo Sesa bujiakaanu kani, lan pundi ban jia n buudi naankani. Mii tieni tudimaba Jufinba po, nani a moko n bani hali bonŋanla maama. 11Li yaa tie ke n tieni yaala n bia ke li pundi kuuma, n kan yie ki kpe. Ama ban maadi npo yaa maama yaa tie faama, laa pundi oba kuli n teni nni bi nuu nni. N soagini n buudi Sesa po.” 12Fesitusa leni o nijuoginkaaba n den juogi laa maama po, o den goa ki yedi Polo: “A yedi ke a bua ki soagini a buudi Sesa po. To, a baa gedi Sesa kani.” 13Danaba n den pendi, o bado Agilipa leni Belenisa den cua Sesale ki baa fuondi Fesitusa. 14Ban den tieni likani danaba, Fesitusa den waani o bado Agilipa Polo maama fuuli ki yedi: “O ja ye ne ki tie kpaadili, Felisi n den fii ki ŋa yua. 15Min den gedi Jelusalema, bi kopadicianba yudanba leni Jufinba nikpeliba den waani nni ban pia opo yaa maama, ki mia nni ke min jia leni o ti buudi ki teni ban kpa o. 16N den waani ba ke laa tie Loma yaaba bogida, ki kpa nilo, kaa kpa cedi ke o taani ki sedi leni yaaba n kuliti o, ke wan maadi ki ga o yuli. 17Lane bi den cua n kani. Mii den waagi ki bu bi maama, lan den fii ki fa n den gedi ki kali u bujiakaanu kani ki teni ke bi cuani o ja yeni. 18Yaaba n den kuliti o n den sedi ki togidi, baa den maadi opo min tama ke bi baa maadi yaa tagili. 19Ban den nia leni o yaa maama po den tie bi yaa jaanma sanŋoadima maama fuuli, leni yaa nilo n yi Jesu yaa maama fuuli, yua n den kpe ke Polo yedi ke o go fo. 20Min kaa den bani min baa jia laa maama maama, n den buali Polo o yaa bua ki gedi Jelusalema, ban jia o maama lankani. 21Polo den soagini o buudi Sesa po ke wani o badiciamo n jia ti. Lanwani n teni ke bi ji o li kpaadidieli nni hali min baa fidi ki gedini o Sesa po.” 22Agilipa den yedi Fesitusa: “N bua o ja yeni n maadi, n mo n gbadi.” Fesitusa den goa ki yedi o: “Saala o baa maadi ŋan gbadi.” 23Lan den fii ki fa, Agilipa leni Belenisa den bobi bi tiadi yaadi n pia ti kpiagidi boncianla ki kua u bujiakaanu kani. A minteela yudanba leni u dogu nikpiaga den taani leni ba. Fesitusa den teni ke bi cuani Polo. 24Fesitusa den yedi: “O bado Agilipa leni yinba yaaba n taani ne kuli, yi nua o naa ja. Jufinba niligu kuli maadi n kani o maama Jelusalema leni nekanba kuli, ki tangi ki tua ke laa pundi wan go yaa ye leni miali. 25Mini yaa po, mii den laa ke o tieni liba yaala n pundi ban kpa o. Wani oba n den soagini o buudi Sesa kani, n den bili ke n baa gedini o. 26Mii laa min baa diani yaala o maama po ki soani ti badiciamo yeni po. Lani n teni ke n cuani o fini o bado Agilipa nintuali leni yikuli nintuali, ke ti yaa biigi o maama min baa min baa diani yaala. 27Kelima n sua ke li tie fanma fanma min soani li kpaadili kaa waani ban pia leni o yaa maama.”

will be added

X\