JESU TONDIBA TUONA TILI 24

1Dana muu n den pendi, bi kopadicianba bado Ananiasa den yegi leni bi nikpeliba leni maliiga daano yendo ke bi yi o Tetula ki jiidi ki cua Sesale. Bi den maadi gufeneeli ban pia yaa maama leni Polo. 2O den yini Polo, ke Tetula cili ki maadi ki kuliti o ki yedi: 3“Fini ti yudaano Felisi, tikuli ye leni mi yanduanma cain kelima a yaa po. Fini n teni ke ti diema lebidi ki ŋanbi. I kaani kuli leni i yogini kuli ti pala mani leni ŋan tieni yaala yeni ke ti jaandi a likuli po hali boncianla. 4Mii go bua ki pugini mi maama ki coagi a. N mia ŋa ŋan cengi ti u yogunu waamu bebe. 5Ti sua ke o naa ja tie nani u yianu yeni, ki fiindi mi janjanma Jufinba siiga ban ye naankani kuli ŋanduna nni. O tie Nasaleti yaaba jaanbuolu yudanba siiga yendo. 6O den moandi ki baa joagini U Tienu diegu, ke ti cuo o. [Ti den bua ki bu leni o nani ti yaa balimaama n bili maama. 7Ama a minteela yudanciamo Lisiasa den tieni u paalu ki fie o ti nuu nni, ki yedi ke yaaba n pia mi maama leni o n cua a yaa kani.] 8Fini aba baa fidi ki buali o ki bandi tin pia leni o yaa maama kuli yaa tie moamoani.” 9Yaa Jufinba n den ye likani den saa Tetula maama po i moamoani, ki yedi ke wan maadi Polo po yaala kuli tie yeni. 10Gufeneeli den yugidi o nuu ki puni Polo u sanu ke wan maadi, ke o den yedi: “N bani ke a tie ti nibuolu bujialo yaa bina n yaba. Lane n pali mani ke n ye a nintuali ki baa maadi ki ga n yuli. 11Laa cie piiga n dana lie ke n den gedi Jelusalema ki baan kpiagi U Tienu. A yaa bua a baa fidi ki buali ki bandi. 12Baa den laa ke n nia leni niloba U Tienu diegu nni, yaaka ke n fiini ku niligu pala li balimaama bangima diena nni leni u dogu nni kaanuba kuli. 13Bi kan fidi ki baa yaa siedi n baa doagidi ke ban maadi npo yaa maama a kani moala tie moamoani. 14Ama ban yini yaa jaanma jaanbuocaanu yeni, n tuo a nintuali ke n ŋua ma ki jaandi ti yaajanba Tienu, ki dugi yaala n diani li balimaama nni, leni bi sawalipuaba tila nni po. 15N sugini nani bani yaaba n ye ne n sugini maama, ke bi tinkpiba fiima ye, yaaba n tiegi leni yaaba n ki tiegi kuli po. 16Lani n teni ke n moandi yogunu kuli ke n pali siedi n da bu leni nni kelima tagiliba po U Tienu kani leni bi niba kani kuli. 17Min kaa den ye Jelusalema binaba, n den guani likani baa cuani mi todima n buolu yaaba po, ki pa U Tienu bu paabu. 18Min den tieni lani, yaa Jufinba n ñani Asi nni den laa nni U Tienu diegu nni. N den wali ki ŋanbi nba. 19Mii den taani niligu, mii tiendi fuugu mo. Jufinba yeni yaa pia npo liba, li pundi bani biba n yaa ye ne ki maadi laa maama a nintuali. 20Lani yaaka li pundi yaaba n ye ne n waani ban den laa ke n pia yaa tagili min den sedi bi cancannikpeliba taancianli kani. 21Li yaa tie min den kpaani bi siiga ki yedi: ‹Yi ja leni nni ti buudi dinla kelima bi tinkpiba fiima yaa po.› “ 22Lani Felisi, yua n bani Jesu sanŋoadima maama bonŋanla, den sieni mi maama yeni hali datoali, ki yedi Polo: “A minteela yudanciamo Lisiasa yaa cua, n baa jia a maama.” 23O den puogi minteela kobiga yudaano wan yaa ji Polo ki dingi opo, ki cedi o danlinba n yaa kpendi o kani ki todi o. 24Danaba n den pendi Felisi den cua leni o pua Dusila, yua n tie Jufi. O den teni ke bi cuani Polo o kani ki cengi Polo n maadi opo li dandanli Jesu Kilisiti nni n tie yaala. 25Ama Polo n den maadi mi teginma, li yukubili, leni U Tienu buudi yaadi n baa ti cua yaa maama fuuli yeni, ti jawaandi den cuo Felisi ke o yedi o: “Moala po, a baa fidi ki ña. N yaa go ti baa li lenli n baa yini a.” 26O go den sugini ke Polo baa pa o i ligi. Lani yaa po o den tuuni ki yi o boncianla ki maadi leni o. 27Bina lie n den pendi ke li tie yeni, Felisi den baa o lebidu ke bi yi o Posiyusa Fesitusa. Nani Felisi n den bua ki mangi Jufinba pala yeni, o den ŋa Polo ke o baa ye li kpaadidieli nni.

will be added

X\