JESU TONDIBA TUONA TILI 23

1Polo den noali bi cancannikpeliba taancianli ki yedi ba: “N kpiiba, n ye U Tienu nintuali leni yaa pali siedi n ŋani hali dinla.” 2Bi kopadicianba bado Ananiasa den yedi yaaba n nagi Polo n pua o ñoabu. 3Polo den yedi o: “U Tienu baa pua ŋa, fini u bilinpienu na. A ka u bujiakaanu po ki baa jia n buudi nani li balimaama n bili maama, ki nan miidi li balimaama ŋan teni ke bi pua nni yeni.” 4Yaaba n se likani den yedi Polo: “A sugidi bi kopadicianba bado yoo?” 5Polo den yedi: “N kpiiba, mii bi bani ke o tie bi kopadicianba bado. Li diani i Diani nni ki yedi: ‹Ŋan da maadi a buolu yudaano po yaala n bia.› “ 6Polo den bandi ke bi cancannikpeliba taancianli yeni siiga bine tie Sadusieninba, bine mo Falisieninba. Lane o den kpaani li taanli yeni niinni ki yedi: “N kpiiba, n tie Falisieni, n yaajanba mo den tie Falisieninba. Bi cuo nni ki baa bu leni nni kelima n sugini ke bi tinkpiba baa fii.” 7Wan den yedi yeni, Falisieninba leni Sadusieninba den cili ki nia leni biyaba, ke mi paadima den tieni li taancianli siiga. 8Sadusieninba yieni ke bi tinkpiba fiima ki ye, ki go yieni ke malekinba leni a cicila mo ki ye, ama Falisieninba wani yieni ke lankuli ye. 9Ku fuugu den tieni boncianla. Li balimaama bangikaaba bi tianba yaaba n tie Falisieninba den fii ki nia leni u paalu ki yedi: “Tii sua ke o ja na pia tagiliba. Daalinba ciciligaba yaaka malekoba n maadi leni o.” 10Mi niama yeni den biagidi ki pugidi hali ke a minteela yudanciamo den jie ke bi baa ti papadi Polo. Lani yaa po o den waani a minteela ban jiidi ki kua li nitaanli siiga, ki cuo Polo ki ñani o ki kuani o li diepaali nni. 11Yaa ñiagu n den ŋua o Diedo den cua ki sedi Polo kani ki yedi o: “Paagi a pali! Nani ŋan tieni npo siedi Jelusalema na maama, a go baa tieni npo yeni Loma po moko tiladi.” 12Lan den fii ki fa, Jufinba den taani ki juogi, ki poli ki yedi ke bi kan je, bi kan ño bi yaa ku Polo. 13Yaaba n den taani ki jagi ki bili yeni den cie niba piinaa. 14Bi den gedi bi kopadicianba yudanba leni bi nikpeliba kani ki yedi: “Ti taani ki poli ke jiema kan kua ti ñoana nni kali ti ku Polo. 15Lanwani, yin taani mani leni bi cancannikpeliba taancianli yaaba, ki soani a minteela yudanciamo kani ki mia o ke wan cuani Polo yikani nani yi bua ki bandi o maama fuuli ki pugini yeni. Tinba mo ti bogini ki baa kpa o hali ke o daa pundi yikani.” 16Ama Polo naataanpuoga bijua den gbadi ban jagi yaa jagibiadili ki gedi ki kua li diepaali nni ki waani Polo. 17Polo den yini minteela kobiga yudanba siiga yendo, ki yedi o: “Ciani o jawaalo na yi yudanciamo kani kelima o pia mi maama ki baa waani o.” 18Minteela kobiga yudaano den ciani o jawaalo yeni a minteela yudanciamo kani ki yedi o: “Yaa kpaadili n yi Polo yini nni ki mia nni min ciani o jawaalo na a kani, kelima o pia mi maama ki baa waani a.” 19A minteela yudanciamo den cuo o jawaalo nuu ki piadi o ki buali o: “A pia be maame ki baa waani nni?” 20O den yedi o: “Jufinba juogi ki bili ke bi baa mia ŋa ŋan cuani Polo saala bi cancannikpeliba taancianli kani nani bi bua ki buali o o maama fuuli ki pugini yeni. 21Ŋan da tuo bi miabu, kelima yaa niba n cie piinaa wuoni ki bua ki bibi o. Bi poli ke jiema yaaka bonñokaala kan kua bi ñoana nni kali bi ku o. Bi bogini ki di gu ke fini n tuo bipo bi miabu bebe.” 22O yudanciamo den tundi o jawaalo ke wan da maadi oba kuli wan cua ki waani o yaala, ki cabi o. 23Lani o den yini minteela kobiga kobiga yudanba bilie ki yedi ba: “Teni mani minteela kobilie leni tandanba piilele leni kpandanba kobilie n bogini, ke dinla u duanyogu yaa pendi waamu yi baa gedi Sesale. 24Yin bogini mani i taami Polo moko yaa po, ki gedini o gufeneeli Felisi po leni laafia.” 25O den diani yaa tili n tie na: 26“Mini Kiloda Lisiasa n fuondi a, fini ti yudaano gufeneeli Felisi. 27Jufinba den cuo o naa ja ki bua ki kpa o. N den cua leni a minteela ki ga o bi nuu nni kelima n den bandi ke o tie Loma yua. 28N den bua ki bandi bonŋanla ban den kuliti o yaala yaa po ke n gedini o bi cancannikpeliba taancianli kani. 29N den sua ke ban kuli o yaala po ŋua bi balimaama, ama ke waa tieni yaala n pundi ban kpa o, baa ki kuani o li kpaadidieli nni. 30Min den bandi ke Jufinba jagi opo li jagibiadili, n den jaligi ki soani o a kani, ki go waani yaaba n kuliti o, ban cuani ban kuliti o yaala po a kani. [U Tienu n waani ti tiyaba.]” 31A minteela den tieni wan puogi ba yaala. Ku ñiagu yeni bi den taa Polo ki gedini o Antipatilisa dogu nni. 32Lan den fii ki fa, a taacenda den lebidi ki guani Jelusalema li diepaali po, ke bi tandanba soagini Polo liiga. 33Bi den pundi Sesale ki teni gufeneeli li tili yeni, ki go teni o Polo moko. 34Gufeneeli n den cogi li tili, o den buali Polo n tie yaa diema yua. Wan den bandi ke o tie Silisi diema yua, 35o den yedi o: “Yaaba n kuliti a yaa cua, n baa cengi a maama.” O den puogi a minteela ban yaa ji Polo Elodo dieciangu nni.

will be added

X\