JESU TONDIBA TUONA TILI 22

1“N kpiiba leni n baanba, cengi mani min pia yaa maama moala na ki baa maadi yi ki ga n yuli.” 2Ban den gbadi ke o maadi Ebilu maama bi den ŋmini suo. Lani Polo den yedi ba: 3“N tie Jufi ki mali Silisi diema Tasa dogu nni. Ama n den fandi u naa dogu nni. N den kua Gamalieli cogidieli, ke o bangi nni ti yaajanba balimaama cap. N den pia li yankuali boncianla U Tienu po nani yikuli n tie maama dinla. 4N den waani yaaba n ŋua Jesu sanŋoadima na fala hali ki ku ba. N den loli bi jaba leni bi puoba kuli ki kuani ba a kpaadidiena nni. 5Bi kopadicianba bado leni bi cancannikpeliba taancianli kuli tie n siedinba ke n maadi moamoani. Bi den teni nni a tila min ban teni ti kpiiba Jufinba, yaaba n ye Damasa, min den gedi naanpo ki baan loli yaaba n ye lipo ki ŋua mi naa sanŋoadima ki cuani ba Jelusalema na ki baa teni ban waani ba fala. 6Min den ye u sanu nni ki nagidi Damasa ke li bua ki pundi u yensiinu, lanyogunu yaa yencianma n ñuliti boncianla den ñani tanpoli po ki jiidi ki lindi nni. 7N den baa tiipo ki gbadi u nialu ke u yedi nni: ‹Solo, Solo, be yaa po ke a faligidi nni?› 8N den goa ki yedi: ‹N Daano, a tie ŋme?› O den yedi nni: ‹N tie Jesu, Nasaleti yua, ŋan faligidi yua.› 9N yegininlieba den laa mi yenma yeni, ama baa den gbadi yua n maadi leni nni nialu. 10N den yedi o: ‹N Diedo, a bua min tieni lede?› O Diedo den yedi nni: ‹Fii ki pundi Damasa. Lankani bi baa waani a ŋan baa tieni yaala kuli.› 11Mi yenma yeni n den ñuliti maama den teni ke n juani, ke n yegininlieba den cuo n nuu ki dadi nni ke n pundi Damasa. 12O ja den ye Damasa ki yi Ananiasa. O den ŋua U Tienu ki fangi o ki kubi o balimaama. Yaa Jufinba n ye Damasa kuli den tiendi opo o siediŋamo. 13O den cua n kani ki yedi nni: ‹N kpiilo Solo, goa ki yaa nua.› Lanyogunu liga n den goa ki nua ki laa o. 14O go den yedi nni: ‹Ti yaajanba Tienu, tuodi ki gandi a ki bili ke ŋan bandi o yanbuama, ki le o Niteginka ki gbadi o ñoabu nni maama. 15Kelima a baa tie o siedo bi nisaaliba kuli po, ki waani ba ŋan laa ki go gbadi yaala. 16Moala a go ji be? Fii ki teni ban batisi a, a tuonbiadi n ŋuudi ki ña, kelima a jaandi o Diedo yeli nni.› 17Min den ti guani Jelusalema ki ye U Tienu diegu nni ki jaandi U Tienu, n den laa li bonlekaala. 18N den laa o Diedo ke o yedi nni: ‹Fii ki ña Jelusalema na tontoni kelima yaaba n ye ne kan ga ŋan tieni npo yaa siedi.› 19N den yedi o: ‹N Diedo, bi bani bonŋanla ke n den caa li balimaama bangima diena nni ki co bi siiga nni yaaba n tuo ki daani a, ki kuandi ba a kpaadidiena nni ki teni ke bi pua ba i gbiami. 20N den taa leni yaaba n den wuli a siedo Etiena soama ki ku o, ki saa bipo i moamoani ke li pundi, ki se ki gu yaaba n ku o tiayiekaadi.› 21Lani o Diedo den yedi nni: ‹Fii ki gedi, kelima n baa soani a hali foagima, bi nilanba po.› ” 22Bi den cengi Polo hali ke o maadi ki pundi laa maama. Lane bi den tangi ki tua: “Kpa o mani. Laa pundi yaa nibuolu n tie na n yaa ye leni miali.” 23Bi den tangi ki pugidi, ki yoagini bi tiadi ki yadi mi tama tanpoli. 24A minteela yudanciamo den yedi ke ban kuani Polo li diepaali nni, ki pua o i baliji ki buali o ki bandi yaala n teni ku niligu tangi yeni. 25Ban den luo o ki baa pua o yaa yogunu, Polo den yedi minteela kobiga yudaano yua n den se likani: “Naani yi pia u sanu ki pua Loma yua i baliji ki daa buni leni o?” 26Minteela kobiga yudaano yeni n den gbadi laa maama, o den gedi ki ban waani a minteela yudanciamo ki yedi: “A baa tieni be n yeni? O ja yeni tie Loma yua yo.” 27A minteela yudanciamo den cua Polo kani ki yedi o: “Waani nni! A tie Loma yua yoo?” O den goa ki yedi o: “Yeni de.” 28A minteela yudanciamo den yedi o: “N den pani ligiciame ki tua Loma yua.” Polo den goa ki yedi o: “Mini wani n mali ki tie yene.” 29Lanyogunu yaaba n den baa pua o wan maadi yeni den fuadi o kani. A minteela yudanciamo mo den jie boncianla kelima o teni ke bi loli o, wani yua n tie Loma yua, i kuseseli. 30A minteela yudanciamo den li bua ki bandi Jufinba n den kuliti Polo yaala yaa po. Lan den fii ki fa, o den teni ke bi loti Polo, ki go teni ke bi kopadicianba yudanba leni bi cancannikpeliba taancianli kuli n taani. Lani o den gedini Polo ki sieni o bi nintuali.

will be added

X\