JESU TONDIBA TUONA TILI 20

1Laa fuugu n den suoni, Polo go den yini bi ŋoadikaaba ki paagi bi pala ki cabi ba, ki fii ki gedi Maseduana. 2O den poandi mi diema yeni niinni, ki maadi ki paagidi bi niba pala boncianla, ki suagi ki gedi Gilesi diema nni. 3O den tieni likani ŋmaali taa. Wan den bogini ki baa kua ku ñinbiagu nni ki gedi Sili diema, o den bandi ke Jufinba luni o i janbi ki bua ki cuo o. Lani yaa po o den jagi ke o baa lebidi ki tagi Maseduana. 4Yaaba n yegi leni o den tie Bele yua Pilusa bijua Sopate, Tesalonika yaaba Alisitaka, Segondusi, Deba yua Gayusa, Timote, Asi yaaba Tikika leni Tilofima. 5Bi den ga ti liiga ki gedi Tilowasa ki guudi ti li kani. 6Yaa dupen n ki pia dabinli jaanma dana n den pendi, ti den kua ku ñinbiagu nni Filipa dogu nni, ki tieni dana muu ki nandi ti lieba yeni Tilowasa. Ti den tieni likani dana lele. 7A danleleeda cilima daali, ti den taani ki baa cabidi dupen kelima Polo den jagi ke o baa fa ki fii. Lani yaa po o den maadi ki waagi ki pundi hali ku yagisiigu. 8Mu fidisanmu den yaba boncianla tin den taani yaa dietuadili nni. 9O jawaalo den ye likani ki yi Yutikusa, ki ka li bonli po. Polo n den waagi ki maadi yeni, mi guama den gbadi o jawaalo yeni ke o ñani li dietuaditaali po ki baa tiipo. Bi den yua o ki sua ke o kpe. 10Polo den jiidi ki buani opo ki tandi o buadi ki soagi o ki yedi: “Da jie mani, o fo.” 11Lani Polo den goa ki doni li dietuadili po ki cabidi dupen ki dini, ki go waagi ki maadi leni ba hali ke li fandi. Lanwani o den cabi ba ki gedi. 12Bi den kunninni o jawaalo yeni o denpo ke o fo. Li den baagi ba boncianla. 13Ama tinba, ti den ga Polo liiga ki kua ku ñinbiagu nni ki gedi Asoso, tin den baa guudi Polo naankani kelima o den baa cuoni o taana. 14Polo n den nandi ti Asoso, o den kua tin ye yaa ñinbiagu nni ke ti yegi ki gedi Mitilena. 15Ti den suagi liiga ki duodi ki gedi. Lan den fii ki fa ti den bali Kiyosa ki pendi. Li dalieli ti go den bali Samoso. Li dataali ti den pundi Mile. 16Tin den pendi Efesa, tii sedi kelima Polo den jagi ke o kan go waagi Asi nni. O den jaligi yeni kelima o den bua ki pundi Jelusalema li Dapiimuuli jaanma yogunu, li yaa baa fidi. 17Polo n den ye Mile yeni, o den soani Efesa ban yini Kilisiti n yini yaaba nikpeliba. 18Ban den cua o kani o den yedi ba: “Yi bani n tagu n den tie maama kuli yi siiga hali min den kpa kua Asi nni yaa yogunu. 19Yi bani ke n den tuuni o Diedo po leni li yumiinli leni ti ninsiidi, ki go laa fala kelima Jufinba n den lu yaa janbi ki bua ki cuo nni yaa po. 20Yi go bani ke min wangi yi o Laabaaliŋamo ki go bangi yi a sala nni leni yi diedi nni kuli, mii den wuoni yi yaala n baa ŋani yipo kuli. 21N den wangi Jufinba leni Gilekinba kuli ke ban lebidi bi yama U Tienu po, ki tuo ki daani ti Diedo Jesu. 22Moala n tuo U Tienu Fuoma tigini, ki caani nni Jelusalema ki naa bani yaala n baan tieni nni lipo, 23kali bonyenla, min gedi yaa dogi kuli U Tienu Fuoma Yua yen wangi nni ke ti kpaadi leni fala bili ki gu nni. 24Ama mii nua n miali ke li tie bonmoanla, yaala n pia npo mayuli tie ke min fidi ki pundi n nuama bianu, ki dudi o Diedo Jesu n puogi nni yaa tuonli. Lani n tie, ki yaa wangi U Tienu ŋanbili yaa Laabaaliŋamo. 25Ama moala, yinba min den lindi yaaba siiga, ki wangi yi U Tienu diema maama yeni, n bani ke yi kan go le n nunga. 26Li tie lani yaa po ke n kadi ki waani yi dinla, ke yi siiga oba kuli soama ki go maa n yuli po, 27kelima n waani yi U Tienu yanjagili kuli, mii wuoni liba. 28Yin yaa fangi mani yi yula po ki go yaa gu u yankulu kuli, yu n tie Kilisiti n yini yaaba, U Tienu Fuoma Yua n kaani yi yaaba yaa siiga ke yin yaa tie bi gobidikaaba, ki tie nani bi yankpaaba ki yaa kpaa U Tienu nitaanli yaaba, wan da yaaba leni o soaceli. 29N bani ke n yaa fii, yaaba n tie nani i fuasangbanbiadi yeni baa kua yi siiga. Bi kan cedi u yankulu. 30Baa yi siiga bi nitianba baa ti fii ki golini mi mamoanma, ki bua ki dadi bi ŋoadikaaba bi yula po. 31Lani yaa po yin yaa gu mani ki yaa tiani ke hali bina taa banlu n tuodi ki tundi yi siiga nni yua kuli leni ti ninsiidi ku ñiagu leni u yensiinu kuli, mii cedi. 32Moala n taa yi ki piani U Tienu leni o ŋanbili maama, yaama n baa fidi ki teni yin yaa kpedi ki paagidi o sanŋoadima nni, ki go teni yin baa u biinu wan bili yaa ŋalimani o nigagidiŋanba kuli po. 33Mii den kuani n yama oba kuli ligi nni, yaaka o wula nni, yaaka o tiadi nni. 34Yinba yiba bani ke n den tuuni leni n nii na ki baadi min luo yaala kuli ki go baadi n yieninlieba n luo yaala. 35N den waani li bonla kuli nni ke yi baa tuuni yene ki todi a tadima, ki tiadi o Diedo Jesu n den maadi yaa maama: ‹Ki pa bu paabu pia li pamanli ki cie ki ga bu.› “ 36Polo n den yedi lani yeni, o den gbaani ki taani ki jaandi leni bikuli. 37Bikuli den buudi boncianla, ki gobini Polo leni mi buama. 38Yaala n den biidi bi pala ki cie tie ke o yedi ke bi kan go le o nunga. Bi den piadi o hali ku ñinbiagu kani.

will be added

X\