JESU TONDIBA TUONA TILI 2

1Li Danpiimuuli jaanma n pundi, Jesu ŋoadikaaba kuli den taa ki ye kaanyendu. 2Lanyogunu lanyogunu ku fuugu den ñani tanpoli po ki naani leni ku faaciangu, ki gbieni ban ka yaa dieli nni. 3Bi den laa yaa landi n naani leni mi fantanlanma yeni ke i paadipaadi ki maani yua kuli po. 4Bikuli den gbie leni U Tienu Fuoma Yua ki cili ki maadi mabotoe nni nani mi Fuoma n puni ba ban maadi maama. 5Li sua ke yaa Jufinba n fangi U Tienu ki ye ŋanduna nibuoli kuli siiga, den cua ki da ye Jelusalema. 6Ban den gbadi ku fuugu yeni, bi den taani ki yaba. Li den paki ba boncianla, kelima yua kuli den gba ke bi maadi o mabuocele nni. 7Ki yanlidiga leni li pakili den cuo ba ke bi tua: “Yaaba n maadi na kuli, baa tie Galile yaaba kaa? 8Li nan tie lede ke ti gba ke bi maadi ti siiga yua kuli mabuocele nni? 9Tinba yaaba n tie Pati, leni Medi yaaba, leni Elama yaaba, ki go tie yaaba n ka Mesopotami, leni Jude, leni Kapadosi, leni Ponita, leni Asi, 10leni Filiji, Panfili, Ejipiti, leni Libi diema nni Silena yaa tinbuoli kuli, leni ti siiga yaaba n ñani Loma ki cua ke bi tianba tie Jufinba, bi tianba mo tie nilanba yaaba n lebidi ki ŋoadi U Tienu, leni Kileta yaaba leni Alabi yaaba, 11li ga lede ke tikuli, yua kuli gba ke bi maadi o mabuolu, ki togidi U Tienu n tieni yaa bancianma.” 12Li pakili den cuo bikuli ke baa bani ban baa maali yaala. Bi den buali biyaba: “Line bua ki yedi be?” 13Bi tianba mo den ñuadi ba ki tua: “Bi ñuni duven ki gaade!” 14Lani, Pieli den sedi leni bi piiga n tondiyendiba ki kpaani ki yedi ku niligu: “Yinba Jufinba, leni yaaba n ye Jelusalema na kuli, cengi mani n maama bonŋanla, ki bandi line, 15duven ka cuo yaa jaba n tie na nani yin tama maama, kelima u yienu daa paagi. 16Line tie o sawalipualo Joeli n den maadi yaala yaa maama ki yedi: 17U Tienu yedi daa: ‹A juodidana yogunu n baa teni n Fuoma n jiidi Ki yayadi bi nisaaliba kuli po, Yi bijaba leni yi bisiaba baa pua sawali, Yi jawaaba baa baa li bonlekaala, Yi jakpela mo baa dangi ti dangidi. 18Yeni de, laa dana nni n baa teni n Fuoma n jiidi Ki yayadi n naacenba leni n potuada po, Ke ban pua sawali. 19N baa tieni li bonlidikaala tanpoli po, Ki go tieni sinankeeninba ki tinga nni, Mi soama leni mi fantama leni a muñiijuana. 20U yienu baa lebidi ki biigi, O ŋmaalo moko baa lebidi ki moandi nani mi soama yeni, Hali ke o Diedo daali, yaa dacianli n pia ti kpiagidi yeni, daa cua. 21Lane yua n jaandi ki mia Diedo Yaa yeli nni kuli, baa faabi.› 22Yinba Isalele yaaba, cengi mani mi naa maama. Nasaleti yua Jesu, U Tienu n den tieni yua yaa po siedi yikuli nintuali kelima wan den tiendi yaa bancianma leni yaa bonlidikaala leni yaa sinankeeninba yi siiga yeni, nani yinba yiba n bani maama. 23Bi den taa laa ja ki teni o yi nuu nni nani U Tienu n den jagi ki bili maama ki tuodi ki bani ke li baa tieni yeni. Yi den ku o, ki teni ke yaaba n kaa fangi U Tienu den joani o li dapoanpoanli po. 24U Tienu den fiini o bi tinkpiba siiga, ki faabi o leni mi kuuma lolima, li kan den tuo mi kuuma n yaa muubi o moko. 25Kelima Dafidi den yedi opo line: ‹N den nua o Diedo n kani yogunu kuli. O ye n jienu ke n yama n da yagini. 26Lani n teni ke n pali mani, Ke n lanbu maadi li pamanli maama, N gbanandi mo baa ye leni mi suginma, 27Kelima fini U Tienu kan ŋa nni bi tinkpiba diema nni, A kan tuo ke a nigagidiŋamo n le mi bedima. 28A teni ke n bandi li miali sani, A go baa teni n pali n yaa mani boncianla kelima a ye leni nni.› “ 29Pieli go den yedi: “N kpiiba, n baa fidi ki kadi ki waani yi ti yaaja Dafidi maama. O den kpe ke bi piini o, o kuli mo ye ti siiga hali dinla. 30Kelima o den tie sawalipualo ki pua sawali, ki bani ke U Tienu niani o o ñoanianu ki poli ke o baa teni o puoliŋuani siiga yendo n ti kali o gbandi po. 31Lani yaa po o den maadi ki tuodi ki waani U Tienu n Gandi Yua fiima bi tinkpiba siiga maama fuuli. Moamoani U Tienu ki den ŋa o bi tinkpiba diema nni, o gbanandi mo ki bedi. 32U Tienu den fiini o bi tinkpiba siiga. Tikuli tie lipo siedinba. 33U Tienu n den duoni o o jienu po ki kpiagi o, o den baa wani Baa kani U Tienu Fuoma Yua nani U Tienu n den niani maama, ki yayadi o tipo, nani yin nua ki go gba maama. 34Dafidi naa den doni ki gedi tanpoli po, ama o nan yedi: ‹O Diedo U Tienu den yedi n Diedo: Kali n jienu po, 35Hali min baa guli a yibalinba ŋan ŋmaa ba.›” 36Pieli go den yedi: “Lani yaa po yinba Isalele yaaba kuli, yin bandi mani bonŋanla ke U Tienu teni ke Jesu, yin den joani yua li dapoanpoanli po, tie o Diedo leni U Tienu n Gandi Yua.” 37Ban den gbadi mi naa maama, mi den cuo bi pala ke bi yedi Pieli leni o tondilieba: “Ti kpiiba, ti baa tieni lede?” 38Pieli den goa ki yedi ba: “Lebidi mani yi yama, yi siiga yua kuli n batisi Jesu Kilisiti yeli nni, ke yin baa sugili yi tuonbiadi po. Lane yi baa baa U Tienu paabu yaabu n tie o U Tienu Fuoma Yua. 39Kelima U Tienu ñoanianu yeni tie yinba yaa po leni yi bila yaa po, ki go tie yaaba n ye hali foagima yaa po, o Diedo ti Tienu n baa yini yaaba kuli.” 40Pieli den maadi matoama boncianla ki pugini, ki tiendi siedi Jesu po ki tundi ba ki yedi: “Sani mani ki faabi yi yula leni bi naa nibiadiba.” 41Bi den batisi yaaba n den ga o maama. Laa daali yaaba n den pugini bi ŋoadikaaba po den bua ki pundi niba tudataa (3,000). 42Bi den kuani bi yama ki gaani Jesu tondiba bangima, ki taagi li dandanli yaaba taanli nni, ki taandi ki taani dupen ki go jaandi yogunu kuli kaa cedi. 43Li fangili den cuo nilo kuli. Jesu tondiba den tiendi li bonlidikaala leni mi bancianma boncianla. 44Yaaba n den daani Jesu kuli den ye kaanyendu, ki taani bi bonpiakaala ke li tie bikuli yaala. 45Bi den yen kuadi bi kuani leni bi loagi, ki boagidi laa ligi bi siiga nani yua kuli n luo maama. 46Daali kuli bi den taagi U Tienu diegu nni leni yanyenma kaa cedi, ki caa biyaba deni ki taandi ki taani dupen, ki boagidi bi jiema leni biyaba leni li pamanli leni li padingili, 47ki pagi U Tienu, ki baadi li seli bi niba kuli nintuali. Daali kuli o Diedo go den faabidi nitoaba ki pugidi Kilisiti n yini yaaba.

will be added

X\