JESU TONDIBA TUONA TILI 19

1Apolosa n den ye Kolinta yaa yogunu, Polo den tagi ki poandi Asi diema yaama n pia a juana ki pundi Efesa. O den laa bi ŋoadikaaba bi tianba likani, 2ki buali ba: “Yin den daani yaa yogunu, naani yi den baa U Tienu Fuoma Yua bi?” Bi den goa ki yedi o: “Ti daa gbadi ke U Tienu Fuoma Yua ye moko.” 3O den yedi ba: “Bi nan den batisi yi mi laa batisime?” Bi den goa ki yedi o: “Jan yaa batisima.” 4Polo den yedi: “Jan den batisi yaaba n den lebidi bi yama, ki go yedi ban tuo ki daani yua n baa yuandi ki cua o puoli, lani n tie Jesu.” 5Ban den gbadi lani, bi den tuo ke bi batisi ba o Diedo Jesu yeli nni. 6Polo den maani bipo o nii, ke U Tienu Fuoma Yua jiidi bipo ke bi maadi mi malanma ki pua sawali. 7Bikuli den bua ki pundi piiga n jaba lie. 8Polo den caa li balimaama bangima dieli nni ki maadi ba leni li papaali hali ŋmaali taa, ki moandi ban tuo ki ga U Tienu diema maama fuuli. 9Ama bi tianba pala den juagi, baa tuo ki ga o maama ke mi tie moamoani. Bi go den sugidi o Diedo Jesu sanŋoadima bi niba kuli nintuali. Lani yaa po Polo den ŋa ba ki taa bi ŋoadikaaba ki piadi ki maadi leni ba Tilanusa cogidieli nni. 10Polo den caa likani daali kuli ki maadi leni bi niba hali bina lie hali ke yaaba n ye Asi nni kuli, Jufinba leni Gilekinba kuli, den gbadi o Diedo maama. 11U Tienu den teni ke Polo tiendi leni o nii bi niba siiga yaa bancianma n pia li pakili. 12Baa bi yaa den taa yaa tiayiekaadi yaaka yaa cabimu n sii Polo ki maani a yiama po, kali bi yiani n kagidi bipo. Mu cicibiadimu mo den ña ban ye yaaba yaa niinni. 13Jufinba bi tianba den ye ki goadi ki deli mu cicibiadimu bi niba kani. Bi den moandi ki baa taa o Diedo Jesu yeli ki maadi mu cicibiadimu danba ki yedi mu cicibiadimu: “Kelima Jesu yeli po, Polo n wangi yua yaa maama, n yedi yi yin ña bi naa niba niinni.” 14Yaaba n den tiendi yeni den tie bi kopadicianba yudanba siiga yendo ke bi yi o Sefa yaa bijaba. Bi den tie niba lele. 15Ki cicibiadiga den goa ki yedi ba: “N bani Jesu, n bani Polo mo n tie yua, ama yinba, yi tie ŋmenba?” 16Lani ki cicibiadiga n ye yaa ja niinni den bibi ba ki paadi bikuli leni u paalu, ki poagili ba ke bi ñani li dieli nni ki poagilipoagili ki sani mubima. 17Jufinba leni Gilekinba yaaba n ye Efesa kuli den gbadi li laabaalo ke ti jawaandi cuo bikuli boncianla. O Diedo Jesu yeli den baa ti kpiagiciandi. 18Yaaba n den tuo ki daani siiga boncianla den kpendi ki togidi bi niba nintuali ban den tieni yaala. 19Bi siiga, i ñoagibiadi danba boncianla den cuani bi tila ki sia ŋa mi fantama nni bi niba kuli nintuali. Bi den coadi a tila yeni kuli dunga ki sua ke li bua ki pundi kujapiena tudapiimuu (50,000). 20Yeni yaa po o Diedo maama den yayadi leni u paalu ki pugidi. 21Lani n den tieni ki pendi, Polo den jagi ki bili ke o baa tagi ki poandi Maseduana leni Akayi ki gedi Jelusalema. O den yedi: “N yaa gedi laa diema kuli, li tie tiladi min yuandi ki gedi ki ban le Loma moko.” 22O den soani o todikaaba siiga niba lie, Timote leni Elasita, Maseduana po, wani oba go den kali danaba Asi nni. 23Laa yogunu mi janjancianma den fii Efesa po kelima o Diedo sanŋoadima po. 24O maano den ye ki yi Demetilusa, ki duadi Atemisa jaandieli nannana leni ŋanjilifa, ki kuadi ki teni ke o tuonsoanba den baa li baali boncianla ku maagu yeni po. 25O den yini o tuonsoanba leni yaaba n tuuni ku maagu tuonli kuli, ki yedi ba: “Yikuli bani ke ti baali ña ku maagu na niinne. 26Yi nan laa ki go gbadi Polo yeni n tiendi yaala. O yedi ke bi niba n tagi yaa buli leni bi nii naa tie bonmoanla. O teni ke bi niba boncianla ga o maama ki yaadi, baa go ŋua i buli, laa tie nekanba Efesa niinni bebe ka, li bua ki yaa tie yene Asi kuli nni. 27Li fidi ke bi niba baa fali ti tuonli yaali n tie ti loagu na. Laa tie lani bebe ka, li go baa fidi ke ti bupua Atemisa yua n pia ti kpiagiciandi yaa dieli kpiagidi n bodi. Li go baa teni Asi yaaba leni ŋanduna yaaba kuli n jigindi wani yua yaa jigidi kuli n bodi.” 28Ban den gbadi laa maama, bi pala den beni ke bi cili ki tangi ki tua: “Efesa yaaba bupua Atemisa pia ti kpiagidi.” 29U dogu yaaba kuli yama den lengidi. Bi den cuo Gayusa leni Alisitaka, Polo yegininlieba, Maseduana yaaba yeni, ki fuli ba ki jaligi ki gedini ba u taankaanu kani. 30Polo den bua ki gedi likani ki maadi li nitaanli yeni, ama bi ŋoadikaaba den yie opo. 31Baa Asi bali danba siiga bi tianba yaaba n tie Polo danlinba den soani o kani ki tundi o ke wan da gedi li nitaanli yeni po. 32Li nitaanli yeni den tiendi ku fuugu, bine den pia bi yaa fuugu, ke bine mo pia bi yaagu, bi yama kuli den lengidi, boncianla ki den bani ban taani yaala yaa po. 33Bi nitianba den ñani Alesanda ku niligu siiga, ke Jufinba den tudi o ke wan sedi bikuli nintuali. O den tia baa o nuu ke ban cengi wan baa maadi yaala ki ga o yuli. 34Ban den bandi ke o tie Jufi, bikuli den taani mayenma, ki tangi ki tua: “Efesa yaaba bupua Atemisa n pia ti kpiagidi.” Bi den waagi ki tangi yeni hali leedo lie. 35Lanwani Efesa dogu yudaano ñoaliebu den teni ke li nitaanli suoni, ke o yedi ba: “Efesa yaaba, ŋme ye kaa bani ke u dociamu Efesa na kubi Atemisa yaa bupua n pia ti kpiagiciandi yaa dieli, leni o nannanli yaali den ñani tanpoli ki baa? 36Lan ki pia niama yeni, li ŋani yin jiini yi yama ki da tieni liba leni mi yanjegibima. 37Yi cuani yaa jaba n tie na, yaaba n kaa suni liba yi budiena nni, baa sugi yi bupua mo. 38Lanwani li yaa tie ke Demetilusa leni o tuonsoanlieba pia mi maama leni niloba, ti buudi dana ye, bi bujiaba mo ye. Ban maadi ban pia yaa maama leni biyaba bi nintuali. 39Yi yaa go pia matoama, mi baa jia yaa nitaanli n pia li sanu kani. 40Li baa fidi ban ti jaligi ti ki yedi ke dinla fuugu na tie bali yiema, kelima ti kan fidi ki waani yin taani yaala yaa po.” Wan den yedi yeni, o den cabi li nitaanli.

will be added

X\