JESU TONDIBA TUONA TILI 18

1Lani yaa puoli Polo den fii Atena ki gedi Kolinta. 2Lankani o den laa Jufi yendo ke bi yi o Akilasa. O den mali Ponta diema nni ama Polo n laa o yaa yogunu li sua ke o ñani Itali diema nni, wani leni o pua Pilisila, ki cua Kolinta kelima Loma badiciamo Kiloda den bili ke Jufinba kuli n ña Loma. Polo den gedi ki ye bi deni 3ki taani leni ba ki tuuni, kelima bikuli den taa tuonyenli ki tie a gbandiena yaa jabida. 4U Tienu fuodima daali kuli Polo den caa li balimaama bangima dieli nni ki maadi leni Jufinba leni Gilekinba kuli, ki moandi ke ban tuo ke o Laabaaliŋamo tie moamoani. 5Ama Silasa leni Timote n den ñani Maseduana ki cua, Polo den cedi wan tuuni yaa tuonli kuli ki taa o yogunu kuli ki wangi U Tienu maama, ki tiendi Jufinba po siedi ke Jesu tie U Tienu n Gandi Yua. 6Ama Jufinba n den nia Polo maama ki sugidi o, o den yoagi o tiadi ki yedi ba: “Yi soama n goa ki wuli yi yula po. Mii pia lienni tagiliba kuli. Dinla liiga n baa caa ki wangi bi nilanbe o Laabaaliŋamo.” 7O den ñani li balimaama bangima dieli nni, ki gedi ki kua ban yi yua Titusa Jusitusa dieli nni, yaali n baali li balimaama bangima dieli. Jusitusa yeni den tie yua n fangi U Tienu. 8Li balimaama bangima dieli yudaano, ban yi yua Kilisipusa, leni o deni yaaba kuli, den tuo ki daani o Diedo. Kolinta yaaba boncianla moko den cengi Polo maama, ki tuo ki daani ke bi batisi ba. 9Ñayengu o Diedo den yedi Polo ti dangidi nni: “Da jie liba, ŋan yaa maadi ki da ŋmini, 10kelima n ye leni a. Oba kan sii ŋa ki tieni a yaala n bia, kelima n pia bi niba boncianla yaa dogu n tie na niinni.” 11Lane Polo den tieni Kolinta yaaba siiga binli leni ŋmaali luoba ki bangi bi niba U Tienu maama. 12Galiyo n den tie Akayi diema gufeneeli yaa yogunu, Jufinba den taani ki tu ñoabu ki yie Polo po ki gedini o gufeneeli yeni bujiakaanu kani ki yedi: 13“Yaa ja n tie na bangi bi niba ki go tigini ba ke ban lebidi ki ŋoadi U Tienu nani li balimaama n ki bili maama.” 14Polo n den bua ki yaadi ki maadi yaa yogunu, Galiyo den yedi Jufinba: “Li yaa bi tie ke yi maadi tagili maama yaaka biicianliba maama ki cuani n kani, n bi baa juuni ki cengi yi maama. 15Ama li yaa tie ke yi nia mi maama po leni a yela po leni yin ŋua yaa balimaama po, li ŋua yinba, mii bua ki bu ti buudi laa maama po.” 16Wan den yedi yeni o den deli ki ñani ba u bujiakaanu kani. 17Lani bikuli den cuo Sositena, li balimaama bangima dieli yudaano, ki pua o u bujiakaanu kani. Galiyo yama naa den yagini lipo. 18Polo go den kali Kolinta ke li waagi. Lani n pendi o den cabi o kpiiba ki fii, wani leni Pilisila leni Akilasa, ki kua ku ñinbiagu nni ki caa Sili diema. O den cedi ke bi kuo o Sankile dogu nni, kelima o den niani U Tienu u ñoanianu. 19Bi den kpa pundi Efesa, Polo n den baa ŋa Pilisila leni Akilasa naani. O den kua li balimaama bangima dieli nni ki maadi leni Jufinba. 20Bi den mia o wan sedi leni ba yogunuba, ama waa den tuo. 21O den cabi ba ki yedi: [ “Mi jaanma yogunu bua ki pundi ke li tie tiladi min yaa ye Jelusalema ki jaani yaa jaanma n kpendi na.] Li yaa tie ke U Tienu bua, n baa goa ki cua yikani.” 22Lani o go den kua ku ñinbiagu nni ki ñani Efesa ki suagi ki duodi ki gedi Sesale. Wan den pundi Sesale o den ñani ku ñinbiagu nni ki do ki gedi ki fuondi Kilisiti n yini yaaba, ki jiidi ki gedi Antiosa. 23Polo n den tieni likani yogunuba, o den fii ki goagoadi Galati leni Filiji diema nni, ki paagi bi ŋoadikaaba pala li dandanli nni. 24Laa yogunu Jufi yendo yua den tie Alesandili dogu yua ke bi yi o Apolosa den cua Efesa. O den bani mi maama, ki go bani i Diani hali bonŋanla. 25Bi den bangi o o Diedo Jesu sanŋoadima ke o maadi leni li yankuali ki bangi Jesu maama ke li tiegi. Leni lankuli waa den bani batisitoama maama, kali Jan yaama. 26Wan den cua Efesa yeni o den cili ki maadi li balimaama bangima dieli nni leni li papaali. Akilasa leni Pilisila n den gbadi o maama, bi den taa o ki gedini o bi denpo, ki doagidi opo U Tienu sanŋoadima maama ke o bandi ma ki pugini. 27Wan den bua ki gedi Akayi diema, o kpiiba yaaba n ye Efesa den waani o wan moandi. Bi go den diani li tili bi ŋoadikaaba yaaba n ye Akayi po, ke ban ga o cangu bonŋanla. Apolosa n den pundi Akayi, o den todi hali boncianla yaaba n tuo ki daani Jesu kelima U Tienu ŋanbili po. 28O den nia leni Jufinba leni u paalu bi niba kuli nintuali ki waani i Diani nni ke Jesu tie U Tienu n Gandi Yua.

will be added

X\