JESU TONDIBA TUONA TILI 17

1Bi den tagini ki ñani Amifipolisi dogu nni, leni Apoloni dogu nni, ki ban pundi Tesalonika. Jufinba den pia li balimaama bangima dieli likani. 2Polo den kua lienni ki taani leni ba nani wan den maani ki tiendi maama. Mi fuodima dana, dana taa o den boe leni ba yaala n diani i Diani nni. 3O den bundi ki doagidi ke li tie tiladi ke U Tienu n Gandi Yua n le fala ki kpe ki go fii bi tinkpiba siiga. O den yedi ba: “Min wangi yi Jesu yua yaa maama na, wani n tie U Tienu n Gandi Yua yeni.” 4Bi siiga bi tianba den tuo ki ga laa maama ki taani Polo leni Silasa po. Gileka yaaba siiga moko yaaba n fangi U Tienu leni yaa puoba n den pia ti kpiagidi yaa siiga, boncianla den tuo ki ga laa maama. 5Ama li nunponli den cuo Jufinba ke bi taani bi nibiadiba yaaba n puagi kaa pia fuoma, ke bi fiini ku niligu pala ke bi fiini ku fuugu u dogu nni. Bi den gedi Jasono denpo ki baa woli Polo leni Silasa, ki bua ki ñani ba ki sieni ku niligu nintuali. 6Ban kaa den laa ba, bi den cuo Jasono leni ti kpiiba bi tianba ki fuli ki gedini ba u dogu yudanba po ki tiani ki yedi: “Bi jaba na yaaba n yagini ŋanduna kuli yama cua ne, ke Jasono ga bi cangu. 7Bikuli yie Sesa balimaama, ki yedi ke baditoa ye ke bi yi o Jesu.” 8Laa maama den yagi ku niligu leni u dogu yudanba kuli yama. 9U dogu yudanba den teni ke Jasono leni o lieba pani i ligi ke bi ŋa ba. 10Ku ñiagu n den bii yaa yogunu, ti kpiiba den gedini Polo leni Silasa Bele dogu po. Ban den pundi likani, bi den gedi Jufinba n taagi yaa balimaama bangima dieli kani. 11Yaa Jufinba n ye laa dogu nni den tie nimoanba ki cie Tesalonika yaaba. Bi den kuani bi yama ki ga U Tienu maama, ki lingilingi daali kuli i Diani nni ki baa le ban wangi ba yaala yaa tie moamoani. 12Bi siiga boncianla leni Gileka yaaba siiga moko yaa puoba n pia ti kpiagidi leni bi jaba boncianla den tuo ki daani. 13Ama Tesalonika yaa Jufinba n den gbadi ke Polo wangi Bele yaaba moko U Tienu maama, bi den cua likani ki yagi ku niligu yama ki fiini bi pala. 14Lanwani ti kpiiba den gedini Polo lanyogunu mi ñincianma po. Ama Silasa leni Timote den sedi Bele. 15Yaaba n piadi Polo den pundi o Atena dogu nni ki lebidi ki guani Bele ki ban waani Silasa leni Timote ke Polo yedi ban ŋoadi o tontoni. 16Polo n den gu o lieba Atena, o den laa ke laa dogu nni gbie i buli nannana ke o yama den yagi boncianla. 17Lani yaa po o den yen kua li balimaama bangima dieli nni ki boe leni Jufinba leni yaa nilanba n fangi U Tienu. Daali kuli o go den boe ki daaga nni mo leni wan togidi yaaba likani kuli. 18Yaa yanfodanba n den ŋua Epikule bangima bi tianba, leni yaaba n den ŋua bangitoama ke bi yi ba Sitoyisieninba bi tianba den taani ki nia leni Polo. Bine den tua: “O maciandaano na bua ki yedi be?” Bine mo n yaa tua: “Li naani ke o bua ki maadi bucaaniba yaa maama.” Bi den yedi yeni kelima Polo den wangi ba Jesu Laabaaliŋamo leni bi tinkpiba fiima yaa maama. 19Lane bi den taa Polo ki gedini o u dogu nikpeliba nitaanli po, yaala n maani ki taagi Aleyopaja juali kani. Bi den yedi o: “Naani ti baa baa ki bandi ŋan maadi yaa bangipanma yeni bi? 20A teni ke ti gbadi li boncanla. Lanwani ti bua ki bandi laa maama n bua ki yedi yaala.” 21Li den sua ke Atena dotieba leni yaa canba n ye likani kuli, naa den tiendi bontoala kali ki maadi yaaka ki cengi li boncanla bi lieba kani. 22Polo den fii ki sedi Aleyopaja nitaanli siiga ki yedi: “Atena yaaba, n laa ke yi kuani yi yama mi jaanma nni hali boncianla. 23Min goagoadi u naa dogu nni, n laa yin pia yaa buli kuli ki padi a pada ki kpiagidi yi. N go laa baa padibinbinyenli po yaa diani n tie na: ‹Line n tie tin kaa bani yaa Tienu po.› To, yin kpiagi yua kaa bani o yeni, n wangi yi o yaa maame. 24U Tienu yua n den tagi tanpoli leni ŋanduna leni yaala n ye lienni kuli, wani yua n die tanpoli po leni ki tinga nni kuli, o yekaanu naa tie bi nisaaliba n maa yaa jaandiena nni ka. 25Waa pia yaaba n tuuni opo nani o luo bonlaba ka, kelima wani n puuni bi niba kuli ke bi ye ki fo ki pia ban pia yaala kuli. 26O den tagi jayendo ki teni ke ŋanduna nibuoli kuli ñani o kani, ki go teni ke bi yayadi ki ye ki tinga kuli nni. Hali ban daa den ye, o den bili ban baa ye yaa yogunu leni ban baa ye naankani. 27O den tieni yeni kelima o bua ban lingi wani o Diedo, ke daalinba, bi yaa baaliti ki lingi o, bi baa le o. Moamoani waa foagi leni ti siiga oba kuli. 28Kelima ‹ti fuoma leni ti cenli leni ti yema kuli ye kelima wani U Tienu yaa po.› Yi yaa baantiadi moko bi tianba yedi line: ‹Ti moko tie o bila.› 29Lani yaa po, kelima ti tie U Tienu bila, laa pundi tin yaa tama ke wani U Tienu naani leni bi nisaaliba n fidi ki taa wula, yaaka ŋanjilifa, yaaka li tanli ki tagi yaa nannanli kelima bi banma leni bi yanfuoma po. 30U yogunkpelu U Tienu ki den coadi bi niba yanpiima, ama moala o wangi bi niba kuli i kaani kuli ke bikuli n lebidi bi yama. 31Kelima wani U Tienu bili ti buudi daali, wan baa bu leni ŋanduna yaaba kuli yaa daali leni mi teginma. O gandi o nilo ki bili ke o baa jia laa buudi. O saa i moamoani ke li baa tieni yeni leni wan fiini laa nilo bi tinkpiba siiga yeni.” 32Atena yaaba n den gbadi ke Polo maadi bi tinkpiba fiima maama, bine den ñuadi o, bine mo n yedi: “Ti go baa cengi a cima datoali.” 33Lani Polo den ñani bi nitaanli siiga. 34Bi nitianba den taani Polo po ki tuo ki daani. Bi siiga yendo den tie Aleyopaja nitaanli yua ki yi Denisa, yendo mo den tie pua ki yi Damalisa. Nitoaba moko den ye.

will be added

X\