JESU TONDIBA TUONA TILI 14

1Ikoniyuma po moko, Polo leni Banabasa den kua Jufinba yaa balimaama bangima dieli nni. Ban maadi maama den teni ke Jufinba leni bi nilanba boncianla tuo ki daani. 2Ama Jufinba siiga yaaba n den yie kaa tuo ki daani, den fiini bi nilanba pala ki teni ke baa go mani leni li dandanli yaaba yeni. 3Polo leni Banabasa den kali ki waagi Ikoniyuma ki maadi leni li papaali ki dugi o Diedo po. Wani o Diedo den saagi o ŋanbili maama yeni po moamoani ki teni ke bi tiendi li bonlidikaala leni mi bancianma. 4U dogu yeni niba den paadi leni biyaba, bine den taa Jufinba po, bine mo n yaa taa Jesu tondiba po. 5Bi nilanba leni Jufinba den juogi leni bi yudanba ki baa faligi Polo leni Banabasa ki lugidi ba a tana ki kpa ba. 6Polo leni Banabasa n den bandi laa bonla, bi den sani ki gedi Likaoni, Lisita leni Deba yaa tinkundogi po ki cia. 7Bi den ban wangi o Laabaaliŋamo i dogi yeni kuli nni. 8O ja den ye Lisita dogu nni ki tie wabo kaa fidi ki cuoni hali wan mali. 9O den cengi Polo n maadi yaala. Polo den nuali o ki laa ke o pia yaa dandanli n baa teni wan paagi. 10O den kpaani ki yedi o: “Fii ki sedi a taana po.” O ja yeni den fii yenma ki cuoni. 11Ku niligu n den laa Polo n tieni yaala, bi den maadi bi mabuolu, lani n tie Likaoni yaaba maama, ki kpaani: “Tin ŋua ki kpiagidi yaa buli kpandi ki tua nani bi nisaaliba yeni ki jiidi ki cua tikani.” 12Bi den yini Banabasa "Seyusa", ki cili Polo mo yaa yeli "Elimesa", kelima Polo n den maani ki maadi. 13Seyusa jaandieli den ye u dogu buliñoajabu kani. Seyusa kopadiciamo den lani a naatona mi puuma ki cuani a bu buliñoajabu kani, ki bua ki taani leni ku niligu ki padi a bipo li padili. 14Bani Banabasa leni Polo n den gbadi lani, bi den cuo bani biba tiadi ki papadi ki doagidi bi pabiidili, ki sani ki kua ku niligu siiga, ki kpaani ki yedi: 15” Be yaa po ke yi tiendi yeni? Ti moko tie nisaaliba nani yinba n tie maama. Ti wangi yi o Laabaaliŋamo ke yin lebidi ki ŋa yaa jaanma n tie fanma fanma na ki ŋoadi U Tienu yua n fo, wani yua n den tagi tanpoli leni ki tinga leni mi ñincianma leni yaala n ye lienni kuli. 16Hali u yogunkpelu o cedi ke i nibuoli kuli ŋua bi yuceli jaanbuolu. 17Baa yeni o tiendi siedi o yuli po kaa cedi leni wan ŋanbidi maama ki puuni yi ku siagu leni u jetaagu yogini kuli, ki go puuni yi mi jiema ke li kandi, ki go puuni yi li pamancianli yeni.” 18Baa ke bi den maadi yeni, li den sieni waamu ke ku niligu padi li padili ki kpiagi ba. 19Lani yaa puoli Jufinba bi tianba den ñani Pisidi yaa Antiosa ki taani leni Ikoniyuma yaaba ki maadi leni ku niligu ki dadi bi yama hali ke bi taani leni ba ki lugidi Polo a tana ki fuli ki ñani o u dogu nni ki tama ke o kpe. 20Jesu ŋoadikaaba n den sedi ki lindi o, o den fii ki go kua u dogu nni. Lan den fii ki fa, o den yegi leni Banabasa ki gedi Deba dogu nni. 21Ban den wangi U Tienu Laabaaliŋamo Deba ki baa bi ŋoadikaaba boncianla, bi den guani Lisita leni Ikoniyuma leni Pisidi yaa Antiosa. 22I kaani kuli bi den paagidi yaaba n daani pala, ki tundi ba ke ban yaa se bonŋanla li dandanli nni, ki tua ba: “Li tie tiladi tin kpa le fala boncianla ki baa ki kua U Tienu diema nni.” 23Kilisiti nitaana yenli yenli kuli nni Polo leni Banabasa den gandi ki puogi yaaba n baa tie taanli kuli nikpeliba. Ban den loli bu ñoabu, ki jaandi ki mia U Tienu, bi den taa bikuli ki piani o Diedo ban den daani yua, ke wan yaa kubi ba. 24Lani yaa puoli bi den poandi Pisidi diema nni ki pundi Panfili yaa diema nni. 25Ban den waani Peja dogu yaaba U Tienu maama, bi den suagi liiga ki jigidi ki gedi Atali dogu nni. 26Lankani bi den kua ku ñinbiagu nni ki duodi ki baa goa Sili yaa Antiosa, ban den kpa ñani naankani. Lankane yaaba n den daani den mia ke U Tienu n yaa ŋanbidi bipo kelima ban soani ki dudi o tuonli yaali moala yeni po. 27Ban den goa ki pundi likani, bi den taani Kilisiti n yini yaaba ki togidi ba U Tienu n den tuuni leni ba ki tieni yaala kuli, leni wan den luodi li dandanli buliñoabu bi nilanba mo yaa po maama. 28Bi den waagi ki ye likani leni bi ŋoadikaaba.

will be added

X\