1 Kilisiti n yini yaaba yaaba n ye Antiosa siiga den pia bi sawalipuaba leni bi bangikaaba. Bi yela den tie Banabasa, Simeyono ke bi go yi o Nijeli, (lani n tie o niboano), leni Silena yua Lusiyusa, leni Manayena yua n den taani ki fandi leni Elodo leni Solo. 2 Ban den taani ki jaandi o Diedo yaa yogunu ki luo bu ñoabu U Tienu Fuoma Yua den yedi: “Gagidi mani npo Banabasa leni Solo ke ban yaa tuuni min yini ba yaa tuonli po.” 3 Lane, ban go den loli bu ñoabu ki jaandi ki mia U Tienu, bi den maani bi nii bi jaba yeni po ki cabi ba ke bi gedi. 4 U Tienu Fuoma Yua den soani Banabasa leni Solo yeni ke bi gedi Selusi dogu nni ki kua ku ñinbiagu nni ki duodi ki gedi Sipila kpendegili po. 5 Ban den pundi Salamina dogu nni, bi den wangi U Tienu maama li balimaama bangima diena nni, Jufinba n den taagi naankani. Jan Maka den tie bi todika. 6 Bi den goagoadi li kpendegili yeni nni kuli hali ki ban pundi Pafoso dogu nni. Lankani bi den laa o lingido, yua n tie Jufi ke bi yi o Bali-Jesu, yua n tie sawalipua-faadaano. 7 O den ye gufeneeli ban yi yua Sejiyusa Polusa kani. Gufeneeli yeni den tie yanfodaano. O den yini Banabasa leni Solo kelima o bua ki gbadi U Tienu maama. 8 O lingido yeni ban go yi yua Elimasa, (lani n tie o lingido), den yie bipo, ki moandi ke gufeneeli n da tuo li dandanli. 9 Lane Solo, ban go yi yua Polo, yua n gbie leni U Tienu Fuoma, den noali o lingido yeni 10 ki yedi o: “Fini yua n gbie leni bu nunfanbiadibu kuli leni i janbi buoli kuli, ki tie Sutaani bijua, ki tie mi teginma kuli yibali, a kan cedi ki da go moandi ke a baa golini o Diedo yanjaga? 11 Moala o Diedo baa pua ŋa ŋan tua juamo ki kan le u yienu hali danaba.” Lanyogunu liga Elimasa nuni den biigi ke o juani cain. O di den baaliti ki lingi yaaba n baa dadi o. 12 Gufeneeli n den laa yaala n tieni yeni, o den daani kelima o Diedo maama bangima n den cuo o pali maama po. 13 Polo leni o lieba den ñani Pafoso ki kua ku ñinbiagu nni ki duodi ki gedi Panfili diema ki pundi mi dogu Peja. Ama Jan Maka den paadi leni ba ki guani Jelusalema. 14 Bi den fii Peja ki suagi ki pundi Pisidi yaa Antiosa. Mi fuodima daali bi den kua U Tienu balimaama bangima dieli nni ki kali. 15 Bi yudanba n den cogi li balimaama leni bi sawalipuaba maama ki gbeni, bi den soani Polo leni o lieba kani ki yedi ba: “Ti kpiiba Jufinba, yi yaa pia tundiba bi niba po, yin maadi mani.” 16 Polo den fii ki tia ba o nuu ke bi suoni, ke o yedi ba: “Isalele yaaba leni yinba yaa nilanba n ŋoadi U Tienu ki fangi o kuli, cengi mani! 17 Isalele yaaba Tienu den gandi ti yaajanba, ki teni ke bi yabidi ban den ye Ejipiti diema nni yaa yogunu. O den ñani ba mi niinni leni o paaciamu, 18 ki juuni leni ba mi fanpienma nni ke li bua ki pundi bina piinaa. 19 Lani yaa puoli o den bolini nilanbuoli lele Kanana diema nni ki puni o nibuolu ke u diedi bi diema. 20 Laa bina kuli coali den bua ki yaa tie kobinaa n bina piimuu. Lani yaa puoli U Tienu den teni ke bi bujiaba diedi ba hali ki pundi o sawalipualo Samueli yogunu. 21 Lani bi den mia o bado, ke U Tienu den dini bipo Kisa bijua Sayula, Benjamina buolu yua, ke o tua bi bado ki die ba bina piinaa. 22 U Tienu den dindi o ki gandi bipo Dafidi ki dini o li bali, ki tieni opo yaa siedi n tie na: ‹N laa ke Isayi bijua Dafidi tie yaa ja n mani n pali ki baa tiendi n yanbuama kuli.› 23 U Tienu den tieni wan den niani yaa ñoanianu ki teni ke bi mali Jesu ke o tie Dafidi puoliŋuanu ki tie Candaano Isalele buolu yaaba po. 24 Hali ke Jesu daa cua, Jan den wangi Isalele yaaba kuli ban lebidi bi yama ke wan batisi ba. 25 Jan tuonli n den yoa mi gbenma, o den yedi: ‹Mii tie yin tama yua ka, diidi ki le mani, o baa cua n puoli. Mii pundi baa yua n baa loti o cacaagbansiama.› 26 N kpiiba, yinba Abalahama puoliŋuani leni yi siiga yaa nilanba n ŋoadi U Tienu ki fangi o kuli, li tie tinba yaa po yo ke U Tienu soani o tondu, yu n tie o tindima maama fuuli. 27 Jelusalema dotieba leni bi yudanba naa den bandi Jesu n tie yua, baa go den ga bi sawalipuaba maama, ban maani ki cogi yaama mi fuodima daali kuli moko. Ban den jia Jesu buudi bi den kuani laa maama n den yedi yaala ki dudi. 28 Baa ke baa den laa ke Jesu tieni yaala n bia ki pundi mi kuuma, bi den mia Pilata wan teni ban kpa o. 29 Ban den kuani i Diani n den maadi opo yaa maama kuli ki dudi, bi den joandi o ku daagu po, ki ban duani o li kuli nni. 30 Ama U Tienu den fiini o bi tinkpiba siiga. 31 O den doagidi o yuli dana boncianla yaaba n den taani leni o ki ñani Galile ki yegi ki gedi Jelusalema po. Moala bi tie o siedinba Isalele yaaba po. 32 Tinba tiba wangi yi laa Laabaaliŋamo. U Tienu n den niani ti yaajanba yaa ñoanianu, o kuani u tinba yaaba n tie bi puoliŋuani yeni po, ki fiini Jesu bi tinkpiba siiga. Li diani Pisoma tili nni diani lie kani yaa maama n tie na: ‹A tie n Bijua, Mini n mali a dinla.› 34 O den fiini Jesu bi tinkpiba siiga ke o kan bedi hali abada. O den maadi lani yaa po yo wan den yedi: ‹N baa pa yi min den niani Dafidi yaa sela, Yaa n gagidi ki ŋani, ki kan gbali tienma.› 35 Lani yaa po o go yedi kaanto: ‹A kan tuo ke a Nigagidiŋamo n bedi.› 36 To, Dafidi n den tieni U Tienu n den jagi ki bili opo yaala o nifiima siiga, o den kpe ke bi den piini o ke o taani leni o baanba ki bedi. 37 Ama U Tienu n den fiini yua bi tinkpiba siiga yeni, waa bedi. 38 Lanwani n kpiiba, yin bandi cain ke li tie wani Jesu yaa po ke bi wangi yi ti tuonbiadi sugili maama. Musa balimaama naa den fidi ki teni ke yi baa li moamoansaali. Ama kelima Jesu yaa po, yua n tuo ki daani kuli pia i moamoansaali. 40 Lani yaa po fangi mani yi yula ke bi sawalipuaba n den yedi yaama n da baa yipo: 41 ‹Diidi mani, yinba li ñuali danba, Li pakili n cuo yi, yin bodi mani, Kelima n baa tieni li bonla yi dana nni, Yaa bonla ke yi kan bi tuo ki ga ke li tie moamoani. Baa bi yaa togidi yi la.› “ 42 Polo leni Banabasa n den ñani, bi niba den mia ba ke ban goa ki maadi bipo laa maama buolu mi fuodima daali yaali n ŋua. 43 Li nitaanli yeni yaaba n den yadi, Jufinba boncianla leni yaa nilanba n den lebidi ki ŋoadi U Tienu nani Jufinba yeni den ŋoadi Polo leni Banabasa. Bi go den maadi leni ba ki tundi ba ke ban yaa se U Tienu ŋanbili nni. 44 U Tienu fuodima daali yaali n ŋua, li den bua ki tua u dogu yaaba kuli, yaaba n den taani ki baa gbadi o Diedo maama. 45 Jufinba n den laa ku niligu yeni, li nunponli den cuo ba boncianla ke bi sugidi Polo ki nia wan yedi yaala. 46 Polo leni Banabasa den paagi bi pala ki yedi ba: “Li den tie tiladi ke U Tienu maama n kpa pundi yinba yaa kani, ama kelima yi yie yii ga ma, yi nua yi yula ke yii pundi ki baa yaa miali n kan gbeni. Lani yaa po ti baa lebidi ki gedi bi nilanba po. 47 Kelima o Diedo puogi ti ki yedi yaa maama n tie na: ‹N ganda a ke ŋan tua mi yenma i nibuoli po. Ke ŋan yaa caani mi faabima yaaba n ye hali ŋanduna banlu kuli po.› “ 48 Bi nilanba n den gbadi mi naa maama, bi pala den mangi ke bi pagi o Diedo maama. U Tienu n den gandi yaaba ke ban baa yaa miali n kan gbeni kuli den tuo ki daani. 49 O Diedo maama den yayadi laa diema nni kuli. 50 Ama Jufinba den moandi ki fiini yaa puoba n tie nilanba ki pia ti kpiagidi pala, bani yaaba n lebidi bi sanŋoadima ki ŋoadi U Tienu nani Jufinba yeni, leni u dogu nicianba kuli pala. Bi den fiini bi niba ke bi faligi Polo leni Banabasa ki deli ki ñani ba bi diema nni. 51 Polo leni Banabasa den kpia bipo bi taatama lan tua siedi bi tudima po, ki fii ki gedi Ikoniyuma dogu nni. 52 Yaa ŋoadikaaba den ye Antiosa po den ye leni li pamancianli ki go gbie leni U Tienu Fuoma Yua.
