JESU TONDIBA TUONA TILI 12

1Laa yogunu o bado Elodo den cili ki waani Kilisiti nitaanli yaaba bi tianba fala. 2O den teni ke bi ku Jan kpelo Jaka leni ki jugisiega. 3Wan den laa ke li mangi Jufinba, o go den cuo Pieli. Li den tie yaa dupen ki pia dabinli jaanma dana. 4Wan den cuo Pieli, o den kuani o li kpaadidieli nni ki puogi a minteela caga naa ban yaa gu o. Cagiyenli kuli den pia niba naa ke bi guudi ki lebidi. Elodo den jagi ke mi Pendima jaanma n yaa pendi, o baa jia Pieli buudi bi niba kuli nintuali. 5Lane bi den ji Pieli li kpaadidieli nni, ama Kilisiti nitaanli den miadi opo U Tienu, kaa cedi. 6Yaa ñiagu ke li baa fa Elodo n jia Pieli buudi bi niba nintuali, Pieli den luo leni kuseseli lie, ki dua ki goa minteela lie siiga. Yaa minteela n se ki ji mo den ye li kpaadidieli buliñoajabu kani. 7O Diedo maleki den ludi ki cua Pieli kani ke mi yenma yendi li kpaadidieli nni. Maleki den maa Pieli kalu ki fundi o ki yedi: “Fii tontoni.” Lanyogunu i kuseseli den piti o nii kani ki baa. 8Maleki go den yedi o: “Ñagini a gbanñagidigu ki pili a cacaadi.” Pieli den tieni yeni. Maleki go den yedi o: “Goli a kpalibu ki ŋoadi nni.” 9Pieli den ŋua o ki ñani li kpaadidieli nni kaa bani maleki n tieni yaala yaa tie moamoani. O den tama ke li tua opo nani ti dangidi ke o laa li bonlekaala yeni. 10Bi den pendi o jiidikpialo, leni yua n ŋua, ki pundi yaa buliñoajabu n lo ti kuboandi bonluodigu, ki tiegi u dociamu. Bu den luodi bipo buba, ke bi ñani ki tagi u sanu. Lanyogunu maleki den ŋa Pieli. 11O yama n den guani, o den yedi: “N bandi moala bonŋanla ke moamoani n Diedo soani o maleki ki ga nni Elodo nuu nni leni Jufinba n bua ki tieni nni yaala kuli po.” 12Wan den bungi yaala n tieni yeni, o den gedi Jan ban go yi yua Maka yaa naa Maliyama denpo. Li den sua ke bi niba boncianla taani likani ki miadi U Tienu. 13Pieli n den pua bu buliñoajabu kani, yaa jafaano n tuuni ku diegu nni ke bi yi o Loda den nagini ki cengi. 14O den bandi Pieli nialu, ama o pali n den mangi maama po, waa luodi bu buliñoajabu. O den sani ki ban waani yaaba n ye ku diegu tugu nni ke Pieli se bu buliñoajabu po. 15Bi den yedi o: “A gaadi.” Ama o den ñi ke wan yedi yaala tie moamoani. Lani bi den yedi: “Li baa tie o maleki yo.” 16Ama Pieli n den baa pua bu buliñoajabu kani, bi den luodi ki laa o ke li paki ba. 17Pieli den tia ba o nuu ban suo, ki togidi ba o Diedo n ñani o li kpaadidieli nni maama. O go den yedi ba: “Yin waani mani Jaka leni ti kpiiba yaala n tieni.” Lani o den ñani ki gedi potogu. 18Lan den fii ki fa a minteela yama den yagi boncianla, ke bi den bungi ki bua ki bandi yaala n den tieni Pieli. 19Elodo n den teni ke bi lingi o kaa laa o, o den buni ti buudi leni li kpaadidieli jiidikaaba, ki jia ke ban ñani ba ki kpa ba. Lani n pendi Elodo den ñani Jude nni ki gedi Sesale ki ban ye. 20Elodo pali den beni leni Tili yaaba leni Sidoni yaaba. Bi den taani ki cua o kani. Ban den boadi ku danligu leni Elodo badibaanlo, yua n yi Balatusu, bi den mia Elodo ke wan goa ki mangi leni ba kelima bi diema jiema den ña Elodo yaa diema nne. 21Elodo n den bili yaa daali mi taanma po n den pundi, o den bobi o baditiadi ki kali o bali kalikaanu po ki maadi ke li waagi. 22Ku niligu den cengi o ki kpaani: “Laa tie nisaalo ka maadi, li tie yua n tie nani U Tienu n maadi.” 23Lanyogunu o Diedo maleki den pua o kelima waa den teni U Tienu ti kpiagidi. A sidibila den lugi o ke o kpe. 24U Tienu maama den pugidipugidi, ki yayadi i kaani kuli. 25Banabasa leni Solo n den caa Antiosa yaaba tondu, bi den taa Jan ban go yi yua Maka ke o yegi leni ba ki fii Jelusalema ki goa ki kuni.

will be added

X\