JESU TONDIBA TUONA TILI 11

1Jesu tondiba leni bi kpiiba yaaba n sieni ki ye Jude nni den gbadi ke bi nilanba tuo ki ŋoadi U Tienu maama. 2Pieli n den guani Jelusalema po, yaaba n den daani siiga, yaaba n ñii ku koanciagu maama den funi leni o 3ki yedi o: “A den cani a jifola ki go dini leni ba.” 4Pieli den doagidi bipo yaala n tientieni kuli 5ki yedi: “N den ye Jafa ki jaandi ke li ti tua npo nani ti dangidi yeni, ke n laa li bonlekaala nni ke yaala n tie nani bu kpalicianbu yeni ñani tanpoli po ke bi muubi bu ñoakunnaadi kuli ki jiini hali ke li pundi n kani. 6N den diidi bu niinni bonŋanla ki laa ŋanduna yandi, ti fuayandi, yaala n balini leni ti bonyugiditi. 7N den gbadi u nialu ke u yedi nni: ‹Pieli, fii ki kpa ki ŋmani.› 8Ama n den goa ki yedi: ‹N Diedo, n kan tieni yeni kelima yaala n tie kuali bi yaala n joagini kuli daa kua n ñoabu nni baa yenma.› 9U nialu go den maadi tanpoli po mi liema ki yedi: ‹U Tienu n yedi ke yaala n ŋani, ŋan da nua la ke li joagini.› 10Li den tieni yeni hali figilima taa. Li yaa puoli likuli den goa ki doni tanpoli po. 11Lanyogunu lanyogunu niba taa den cua min ye yaa diegu nni. Bi den soani ba ke bi ñani Sesale ki cua n kani. 12Mi Fuoma den waani nni ke min yegi leni ba ki da bangi liba. Ti kpiiba yaa niluobidiba n tie na den yegi leni nni ke ti pundi ki kua Koneya diegu nni. 13O den togidi ti wan mo n laa yaala, ke maleki den doagidi opo o yuli o dieli nni, ki yedi o: ‹Soani Jafa ban ban yini ban yi yua Simono Pieli ke wan cua a kani. 14O baa waani a yaa maama n baa tua yipo mi tindima fini leni a deni yaaba kuli.› 15To, min den cili ki maadi yaa yogunu, U Tienu Fuoma Yua den jiidi bipo nani wan den kpa jiidi tipo maama yeni. 16Lane n den tiadi ti Diedo maama yaama n tie na: ‹Jan den batisi yi leni mi ñima, ama U Tienu baa batisi yi leni U Tienu Fuoma Yua.› 17To, U Tienu yaa den puni bani moko yaa paabu n de leni wan den puni ti yaabu, tin den daani o Diedo Jesu Kilisiti yaa yogunu, n mo tie ŋme ki baa yie U Tienu po?” 18Yaaba n den funi leni o yeni n den gbadi li maama fuuli bi den cedi, ki kpiagi U Tienu ki yedi: “Lanwani U Tienu puni bi nilanba moko ke bi baa u sanu ki lebidi bi yama, ki baa li miali.” 19Yaaba n den yayadi kelima yaa falabiado n den tieni Etiena kuuma yogunu yeni, den gedi hali Fenisi diema leni Sipila kpendegili leni Antiosa nni kuli. Baa den wangi nitoaba kuli U Tienu maama, kali Jufinba bebe. 20Ama bi siiga bi tianba, yaaba n tie Sipila yaaba leni Silena yaaba, den gedi Antiosa, ki maadi leni yaaba n kaa tie Jufinba moko ki wangi ba o Diedo Jesu Laabaaliŋamo maama fuuli. 21O Diedo paaciamu den ye leni ba ke bi niba boncianla den tuo ki lebidi ki daani o Diedo. 22Li laabaalo den pundi Kilisiti n yini yaaba kani Jelusalema, ke bi soani Banabasa Antiosa. 23Wan den pundi ki laa U Tienu ŋanbili, o pali den mangi. O den tundi bikuli ke ban yaa ŋua o Diedo leni payenli. 24O den tie niŋamo, ki gbie leni U Tienu Fuoma Yua leni li dandanli moko. Bi niba boncianla den lebidi ki tuo ki ŋoadi o Diedo. 25Lani n pendi Banabasa den fii ki gedi Tasa dogu ki baan lingi Solo. 26Wan den laa o, o den cuani o Antiosa. Hali binmunli bi den taagi leni Kilisiti n yini yaaba taanli likani, ki bangi bi niba boncianla. Li den tie Antiosa ke bi cili ki yini bi ŋoadikaaba Kilisiti yaaba. 27Laa yogunu bi sawalipuaba den ñani Jelusalema ki cua Antiosa. 28Bi siiga nni yendo ke bi yi o Agabusa den fii ki pua sawali kelima U Tienu Fuoma paalu po, ki yedi ke mi koncianma baa baa ŋanduna kuli. Mi den baa Kiloda n den tie badiciamo yaa yogunu. 29Jesu ŋoadikaaba den jagi ki bili ke bi siiga yua kuli baa todi wan fidi maama, ban taani ki soani bi kpiiba yaaba n ye Jude nni po. 30Bi den tieni yeni ki soani Banabasa leni Solo, ke bi gedini mi todima yeni ki ban teni Jude nikpeliba.

will be added

X\