JESU TONDIBA TUONA TILI 10

1O ja den ye Sesale dogu nni ke bi yi o Koneya. O den tie minteela kobiga yudaano, Itali minteela kobiluoba cagiyenli nni. 2O ja yeni den ŋua U Tienu ki fangi o, wani leni o diegu nni yaaba kuli. O den puuni Jufinba boncianla mi todima ki go jaandi U Tienu yogunu kuli. 3Dayenli, li yenlebidili yogunu, o den laa li bonlekaala nni ke U Tienu maleki kua o kani ki yedi o: “Koneya.” 4O den noanli maleki ke ti jawaandi cuo o ke o yedi o: “N Daano, a yedi be?” Maleki den goa ki yedi o: “A jaandi leni a ŋanma a luoda po pundi U Tienu kani ke waa sundi lipo. 5Moala ŋan soani bi jaba ban gedi Jafa ki ban yini Simono, ban go yi yua Pieli, wan cua a kani. 6O cani o jabido Simono, yua yaa diegu n baali mi ñincianma.” 7Maleki n den ñani o kani, o den yini o naacenba siiga niba lie, leni yaa minteela n gu o siiga yendo, yua n fangi U Tienu ki ŋua o. 8O den togidi ba yaala n tieni kuli, ki soani ba Jafa. 9Lan den fii ki fa ki bua ki pundi u yensiinu, bi jaba yeni den ye u sanu nni ki nagidi Jafa, Pieli mo den doni ku doangu yuli po ki baa jaandi. 10Mi koma den cuo o ke o bua ki je. Ban den ŋanbidi opo mi jiema yaa yogunu, o den laa li bonlekaala. 11O den laa ke tanpoli luodi, ke yaa bonla n tie nani bu kpalicianbu yeni ñani tanpoli po ke bi muubi bu ñoakunnaadi kuli ki jiini hali tiipo, 12ke ki tinga yandi buoli kuli leni li bonbalinkaala buoli kuli leni ti bonyugiditi buoli kuli ye bu kpalicianbu yeni niinni. 13U nialu den yedi o: “Pieli, fii ki kpa ki ŋmani.” 14Pieli den yedi: “O Diedo, n kan tieni lani, kelima n daa ŋmani yaala n tie kuali leni yaala n joagini baa yenma.” 15U nialu yeni go den maadi mi liema ki yedi o: “U Tienu yaa yedi ke yaala n ŋani ŋan da nua la ke li joagini.” 16Li den tieni yeni figilima taa. Lanyogunu li den goa ki doni tanpoli. 17Pieli n da den kpaagi ki bua ki bandi wan bi laa yaa bonlekaala yeni n bua ki yedi yaala, lanyogunu Koneya n soani yaa jaba den buali ki bandi Simono diegu n ye naankani, ki sedi bu buliñoajabu kani. 18Bi den kpaani ki buali Simono ban go yi yua Pieli yaa cani lankane. 19Laa yogunu, Pieli n da bungi li bonlekaala yeni n bua ki yedi yaala, U Tienu Fuoma den yedi o: “Cengi, niba taa cua ki lingi a. 20Fii ki jiidi, ki yegi leni ba ki da bangi liba, kelima mini n soani ba.” 21Pieli den jiidi, ki yedi bi jaba yeni: “Mini n tie yin lingi yua. Be cuani yi ne?” 22Bi den yedi o: “A minteela kobiga yudaano Koneya n soani ti a kani. O tie niteginka ki go fangi U Tienu. Jufinba nibuolu yaaba kuli tieni opo yaa siedi n ŋani. U Tienu soani maleki o kani ki waani o ke wan yini a ŋan cua o denpo, wan gbadi ŋan baa yedi yaala.” 23Pieli den kuani ba li dieli nni ki ga bi cangu. Lan den fii ki fa o den fii ki yegi leni ba. Bi kpiiba yaaba n ye Jafa siiga bi tianba den ciani o. 24Li dalieli daali bi den pundi Sesale. Li sua ke Koneya den yini o kpiiba leni o buakaaba ke bi taani ki ji ba. 25Pieli n den kua yaa yogunu, Koneya den tuogi o ki biali o ki gbaani o taana kani. 26Pieli den fiini o ki yedi o: “Fii, n moko tie nisaalo.” 27Pieli leni Koneya n den boe ki kua o dieli nni, Pieli den laa ke bi niba taani boncianla. 28O den yedi ba: “Yi bani ke li kua ke Jufi n taani leni o nilamo, yaaka ki kua o dieli nni. Ama U Tienu doagidi npo ke min da go nua oba kuli ke o joagini U Tienu po. 29Lani n teni ke yin den soani ke bi yini nni yaa yogunu, n den fii ki cua kaa bangi liba. Lanwani n buali yi, be yaa po ke yi soani ki yini nni?” 30Koneya den goa ki yedi: “Dinla dana taa, li yenlebidili yogunu, n den ye n dieli nni ki jaandi. Lanyogunu yaa ja n laa yaa tiadi n ñuliti den doagidi o yuli nkani ki yedi nni: 31‹Koneya, U Tienu gbadi a jaandi ki go tiani a todima a luoda po. 32Ŋan soani Jafa po, ban ban yini Simono ban go yi yua Pieli. O cani o jabido Simono, yua yaa diegu n kuu leni mi ñincianma.› 33Lanyogunu n den soani ke ban yini a. A ŋanbi leni ŋan cua. Moala tikuli ye U Tienu nintuali ki bua ki gbadi wani o Diedo n yedi a yaala kuli.” 34Pieli den yaadi ki yedi: “Moamoani n bandi moala ke U Tienu ki gagidi bi niba leni biyaba. 35Yua n fangi o ki tiendi yaala n tiegi, wan tie yaa nibuolu yua kuli, baa fidi ki cua o kani. 36U Tienu den soani u tondu Isalele yaaba po ki waani ba mi yanduanma Laabaaliŋamo, kelima Jesu Kilisiti yaa po, wani yua n tie bi niba kuli Diedo. 37Yi bani ke Jan den wangi bi niba ban lebidi bi yama ke wan batisi ba. Yi go bani yaala n den cili ki tieni laa yogunu Galile nni ki yuandi ki tieni Jude kuli nni. 38U Tienu den teni ke U Tienu Fuoma Yua jiidi Nasaleti yua Jesu po ki gbie o niinni maama, ki puni o u paalu. Yi go bani ke o den caa i kaani kuli ki ŋanbidi bi niba po, ki faabidi Sutaani n den miabi yaaba kuli ki paagidi ba kelima U Tienu den ye leni o. 39Ti tie siedinba wan den tieni yaala Jufinba diema nni leni Jelusalema nni kuli. Bi den joani o ku daagu po ki ku o. 40Ama li dataali daali U Tienu den fiini o bi tinkpiba siiga ki teni ke o doagidi o yuli tipo. 41Waa den doagidi o yuli Jufinba kuli po ka, kali U Tienu n den tuodi ki gandi yaa siedinba po, tinba yaaba n den taani ki di ki go ñu leni o wan den fii bi tinkpiba siiga yaa yogu. 42Wani Jesu den puogi ti ke tin yaa wangi bi niba o Laabaaliŋamo, ki yaa tiendi siedi ke U Tienu dini wani Jesu li bali ke wan yaa tie o bujialo yaa niba n fo leni bi tinkpiba kuli po. 43Bi sawalipuaba kuli maadi o maama ki yedi ke yua n tuo ki daani o kuli baa baa sugili o tuonbiadi po kelima o yaa yeli po.” 44Pieli n da den maadi yaa yogunu, U Tienu Fuoma Yua den jiidi yaaba n cengi o maama kuli po. 45Li den paki yaaba n den daani ki tie Jufinba ki yegi leni Pieli kuli, ban laa ke U Tienu puni bi nilanba o paabu yaabu n tie U Tienu Fuoma Yua, ke o jiidi bipo. 46Bi den bandi ke U Tienu puni ba o paabu yeni kelima bi den gba ke bi maadi mi malanma ki kpiagidi U Tienu. 47Lani Pieli den yedi: “Yaa niba n tie na baa U Tienu Fuoma Yua nani ti moko n den baa maama. Ŋme baa fidi ki yie bipo ke tin da batisi ba mi ñima nni?” 48O den teni li ñoabonli ke ban batisi ba Jesu Kilisiti yeli nni. Bi den mia o wan sedi leni ba danaba.

will be added

X\