2 TIMOTE 4

1N teni a yaa ñoabonli n tie na U Tienu nintuali leni Jesu Kilisiti yua n baa jia ti buudi leni yaaba n fo leni yaaba n kpe kuli nintuali, ki puogi a kelima o cuama leni o diema kuli po, 2ŋan yaa wangi U Tienu maama, tieni ania ki moandi li yaa pa leni li yaa dingi kuli. Ŋan maadi ki guli yaaba n pia mi niama, ki fu leni yaaba n tudi, ki yaa tundi bi niba, ki go bangi ba leni li juunmoanli. 3Kelima u yogunu baa ti cua ke bi niba kan go tuo ki yaa ŋua mi bangiŋanma, ama bi baa bua yaala n mani bipo bebe, ki lingi bi bangikaaba ki pugidipugidi, bani yaaba n baa bangi ba ban bua ki yaa gba yaala. 4Bi go baa lebidi ki ŋa i moamoani cengima ki yaa cengi a togidifana. 5Ama fini wani, ŋan kubi a yuli li bonla kuli nni, ki tuo ki yaa laadi fala ki juuni lienni, ki tuuni o Laabaaliŋamo wangika yaa tuonli, ki soani a tuonli bonŋanla. 6Mini yaa po, bi wuli nni nani mi padiñima yeni, n kuuma yogunu pundi. 7N moani li muaŋanli ki gbeni, n sani mi nuama ki gbeni, n kubi li dandanli. 8Baa moala bi bili npo mi teginma badifogiliga, o Diedo yua n tie o bujiateginka n baa pa nni yaaga o goacuama daali. O kan pa mini n bebe ka, ama yaaba n den bua o goacuama kuli. 9Ŋan moandi ki cua n kani tontoni 10kelima Demasa den ŋa nni kelima o bua yaa jamaano tie na yaa bonla, ki gedi Tesalonika. Kilesa fii ki gedi Galati, Tita mo fii ki gedi Dalimati diema. 11Luka bebe n ye leni nni. A yaa kpendi ŋan taa Maka wan yegi leni a, kelima o baa pia npo mi fuoma boncianla li tuonli po. 12N den soani Tikika Efesa. 13A yaa kpendi ŋan cuani npo min den ŋa yaa kpalibu Tilowasa Kalipusa deni. Ŋan cuani npo a tila moko, min bua yaa ki cie tie ya n tie ti gbandi. 14O maano Alesanda den tieni nni mi biadima boncianla. O Diedo baa guani o nani o tuona n tie maama. 15A moko n fangi a yuli leni o kelima o den yie ti maama boncianla. 16Min den kpa sedi ki baa maadi ki ga n yuli u bujiakaanu kani, oba kuli ki den todi nni, bikuli den ŋa nni. O Diedo n da guani ba la. 17Wani o Diedo den todi nni ki puni nni u fidu ke n fidi ki waani o Laabaaliŋamo kuli cain, ke bi nilanba kuli n gbadi. O den ga nni o yangbanlo ñoabu nni. 18Wani o Diedo n go baa ga nni leni bonbiadila kuli po, ki faabi nni ki kuani nni o diema tanpoli po. Wani n yaa baadi ti kpiagidi hali yaa yogunu kuli. Amina. 19Ŋan fuondi Pilisika leni Akilasa, leni Onesifola deni yaaba. 20Elasita sedi Kolinta dogu nni. Tilofima yia ke n ŋa o Mile. 21Ŋan moandi ki cua n kani ke ku fawaagu daa pundi. Yubulusa leni Puda leni Linusa leni Kilodia leni ti kpiiba yaaba n sieni kuli fuondi a. 22O Diedo n yaa ye leni a. U Tienu ŋanbili n yaa ye leni yikuli. Amina.

will be added

X\