2 TESALONIKA YAABA 1

1Mini Polo leni Silasa leni Timote n diani li tili yinba Kilisiti n yini yaaba, yaaba n ye Tesalonika ki ye U Tienu ti Baa leni o Diedo Jesu Kilisiti nni. 2U Tienu yua n tie Baa leni o Diedo Jesu Kilisiti n pa yi li ŋanbili leni mi yanduanma. 3Ti kpiiba, li pundi tin yaa tuondi U Tienu kelima yipo yogunu kuli. Li dagidi tin yaa tiendi yeni, kelima yi dandanli yabidi ki pugidi boncianla, yi buama yiyaba po mo yabidi ki pugidi. 4Ti kpiagidi ti yula U Tienu n yini yaaba nitaana nni kelima yi juunli leni yi dandanli po, baa yin laadi yaa fala leni yaa yebiadima kuli. 5Likuli tie siedi ke U Tienu buudi tiegi. O sua ke yi dagidi U Tienu diema po, yin laadi fala yaama yaa po moala na yeni. 6U Tienu nua ke li tiegi ke wan faligi yaaba faligidi yi moala, 7ki taani ki pa tinba leni yinba yaaba n laadi fala mi fuodima o Diedo Jesu yaa ñani tanpoli po leni o malekinba yaaba n pia u paaciamu, ki doagidi o yuli yaa daali. 8O baa doagidi u mupienu nni ki tu yaaba n kaa bani U Tienu leni yaaba n kaa tuo ki ŋoadi ti Diedo Jesu yaa Laabaaliŋamo, bi biadima panpaani. 9Bi buudi baa tie yaa bolinma n kaa pia gbenma. Bi baa paadi cain leni o Diedo nunga leni o kpiagidi paalu, 10wan cua yaa daali ki baa baa ti kpiagidi o nigagidiŋanba siiga, ke yaaba n daani o kuli mo n ñuadi o ŋamu. Yi moko baa ye bi siiga kelima yi den daani ti siedi. 11Li tie lani yaa po ke ti miadi U Tienu yipo yogunu kuli ke wan teni yin dagidi wan yini yi yaala yaa po. Ti go miadi o ke wan teni yin yaa tiendi wan jagi yin tieni yaa ŋanma kuli leni li dandanli tuonli kelima o paalu yaa po. 12Yeni ti Diedo Jesu yeli baa baa ti kpiagidi yi siiga, ke yi mo n baa ti kpiagidi kelima o yaa po, nani ti Tienu leni ti Diedo Jesu Kilisiti ŋanbili n tie maama.

will be added

X\