2 PIELI 3

1N buakaaba, line n tie min diani yipo yaa tilieli. A tilieda yeni kuli nni n moandi ki tiadi yi yaala n baa tigini yi yantiana yin yaa tia yaala n tiegi bonŋanla. 2Yin yaa tiadi bi sawalipuaba yaaba n gagidi ki ŋani n den soagindi yaa maama hali yogu po, ki go yaa tiadi o Diedo ti Candaano balimaama, yi tondiba n den wangi yaama. 3Yin tuodi ki bandi ke mi juodima yogunu, li ñuali danba baa cua leni bi ñuali, bani yaaba n ŋua bi gbanandi bonbuakaala. 4Bi baa tua yi: “Waa den niani u ñoanianu ke o baa goa ki cua te? O nan ye le? Kelima hali ti yaajanba n kpe, ki taa ki pundi hali moala, li bonla kuli tie nani lan den tie maama mi tagima cilima yogunu yeni.” 5Baa ke bi bani, bi yen sundi bi yama po ke hali yogu U Tienu den maadi o maama ke tanpoli tagi, ke ki tinga mo ñani mi ñima nni, ke mi lindi ki cebini ga. 6Li tie laa bonla po ke o ŋandunkpialo den bodi kelima mi ñima den milini o cain. 7U Tienu maama yeni baa kubi yaa tanpoli leni yaa tinga n ye moala, ki sieni la mi fantama po hali ti buudi daali leni U Tienu yiekaaba bolinma daali. 8N buakaaba, yaa bonyenla n ye na, laa pundi yin sundi la, o Diedo po dayenli tie nani bina tudili, ke bina tudili mo tie nani dayenli yeni. 9O Diedo baa kuani o ñoanianu li kan waagi, baa ke bi nitianba nua ke o waagidi. Li tie ke o pia yipo li juunle, kelima waa bua baa niyendo n bodi, ama ke bi niba kuli n lebidi bi yama. 10O Diedo daali baa cua ki ludi bi niba nani li conconli yeni. Laa daali tanpoli baa bodi leni ku fuciangu. Yaala n ye lienni kuli baa cuo mi fantama ki nandi. Ki tinga leni yaala n ye lienni kuli mo baa cuo ki buodi. 11Lanwani, nani laa bonla kuli n baa nandi ki bodi yeni, li pundi yi tagu n gagidi ki yaa ŋani, ki go tuo U Tienu n yaa die yi cain. 12Yin yaa gu wani U Tienu daali cuama, ki yaa tiendi yaala n baa teni li daali yeni n jaligi ki cua. Laa daali tanpoli kuli baa cuo ki buodi, yaala n go ye kuli mo baa nandi. 13Ama ti guudi o tanpopaano leni ki tinpanga, mi teginma n baa ye naankani, nani o ñoanianu n yedi maama. 14Lanwani n buakaaba, kelima yi gu laa bonla kuli, yin yaa moandi ke o yaa cua, wan sua ke yii pia joagindiba leni tagiliba kuli, ama ke yi pia mi yanduanma leni o. 15Yin yaa nua mani ke ti Diedo n pia yaa juunli tie yi tindima po, nani ti kpibuado Polo moko n den diani yipo maama ki ŋua U Tienu n den puni o yaa yanfuoma. 16O dangi yeni o tila kuli nni o yaa maadi laa bonla maama, baa ke lienni pia yaa maama yaa gbadima n pa. Bi nitianba, yaaba n tie yanboandanba ki naa go se ke li pa, ŋmiagidi ki golindi li bundima nani ban tiendi maama leni yaa Diani n sieni bi bodima po. 17Lanwani n buakaaba, kelima yi tuodi ki bani laa bonla kuli, yin yaa fangi mani yi yula ke U Tienu yiekaaba n da dadi yi bi yaadima nni, ke yi kan go yaa se ke li pa. 18Ama yin yaa suagi liiga ti Diedo leni ti Candaano Jesu Kilisiti yaa ŋanbili nni leni o yaa bandima nni ki pugidi. Wani n yaa baadi ti kpiagidi moala leni hali yaa yogunu kuli. Amina.

will be added

X\