JAN N DIANI YA TILIELI 1

1Mini o nikpelo n diani li tili fini Cannaa po, U Tienu n gandi yua, leni a bila kuli po, min bua yinba yaaba leni i moamoani. Laa tie mini bebe ka bua yi, yaaba n bani i moamoani kuli bua yi. 2Ti bua yi kelima i moamoani yaa po, yi n ye ti niinni ki go baa ye leni ti hali yaa yogunu kuli. 3U Tienu yua n tie Baa leni Jesu Kilisiti yua n tie Baa bijua n pa ti li ŋanbili ki yaa gba tipo mi niñima, ki go yaa puuni ti mi yanduanma, i moamoani nni leni mi buama nni. 4N pali den mangi boncianla min den laa ke a bila siiga bi tianba cuoni i moamoani nni nani Baa n bili tipo li balimaama maama. 5Lanwani moala, Cannaa, min mia ŋa yaala tie line: Tin yaa bua tiyaba. Min diani apo yaama yeni naa tie balimapanma ka, ama li tie tin den pia yaama hali mi cilima. 6Mi buama yeni tie tin yaa cuoni nani U Tienu balimaama n bili maama. Lani n tie yin baa ŋua yaa balimaama tiladi nani yin den bandi maama hali mi cilima. 7Kelima mi tulinma danba boncianla cua ki yayadi ŋanduna nni, yaaba n naa tuo ke Jesu Kilisiti den cua ki tua nisaalo. Laa nibuolu n tie mi tulinma daano leni Kilisiti-yieka. 8Fangi mani yi yula ke ti tuonli bonluonkaala n da bodi, ama ke yin baa yi panpaani kuli. 9Yua n suagi liiga ki naa ye Kilisiti yaa bangima nni kuli, waa pia U Tienu. Ama yua n se mi bangima yeni niinni, wani n pia Baa leni Bijua kuli. 10O nilo yaa cua yikani ki naa kubi laa bangima, yin da ga o cangu, ki da yedi o: «Biala biala.» 11Kelima yua n yedi o: «Biala biala,» taani leni o o tuonbiada nni. 12N go pia mi maama boncianla ki bua ki diani yipo. Die mii bua ki diani leni mi tidianñima li tili nni ka. Ama n sugini ke n baa cua yikani tin le tiyaba ki boe, ke ti pamanli n dagidi cain. 13A kpiilo, U Tienu n gandi yaa pua yaa bila fuondi a.

will be added

X\