2 KOLINTA YAABA 9

1Mii nua ke li tie tiladi min diani yipo mi todima bi nigagidiŋanba po yaa maama. 2N bani yin pia yaa yankuali laa todima po, ki pagi n yuli lipo Maseduana yaaba kani, ki wangi ba ke Akayi diema yaaba bogini laa todima po hali yaa binli n pendi. Yi yankuali yeni den tigini bi siiga bi niba boncianla. 3N soani ti kpiiba yikani kelima mii bua min pagi yi maama laa bonla nni n tua fanma fanma. N bua ke yin bogini ki gbeni, nani min yedi maama. 4Maseduana yaaba yaa yegi leni nni ki sua ke yii bogini ki gbeni, ti baa le i fe leni tin den pia yipo yaa dugidi yeni, mii go maadi yi yaa fe maama wani. 5Lani yaa po n den sua ke li tie tiladi min mia ti kpiiba, ban ga n liiga ki gedi yikani, ki taani yin den niani ke yi baa pa yaa todima. Lanwani laa todima baa bogini min cua yaa yogunu, ki tie yin puni yaama leni ti bulicindi, ki naa tie mundibu. 6Yin bandi mani ke yua n buli waamu baa yendi waamu, yua n buli boncianla mo baa yendi boncianla. 7Nilo kuli n pa nani wan den jagi ki bili o pali nni maama, ki da pa leni pabiidili, yaaka kelima paalu po, kelima U Tienu bua yua n puuni leni li pamanli. 8U Tienu baa fidi ki teni o ŋanbili n yaa wuli yipo li bonla kuli nni, ke yogunu kuli yin yaa pia ke li kandi ki fidi ki soani tuonŋanli kuli, 9nani lan diani maama: «O yadi o sela a luoda po, O teginma ye hali yaa yogunu kuli.» 10Wani yua n puuni o kpakpaalo i bonbuoli, ki go puuni o o bonjekaala, baa pa yi yin fidi ki buli yi bonbuoli ki pugini, ki go teni yi bulicindi yeni bonluonkaala n yabidi. 11Yeni yi baa yaa pia ke li dagidi li bonla kuli nni, ki yaa puuni leni ti bulicindi yogunu kuli, ke yin soani ti tin teni yaaba yi todima yeni baa tuondi U Tienu. 12Kelima yin tieni yaa todima yeni baa todi bi nigagidiŋanba, ki go teni i tuondi n yabidi boncianla U Tienu po. 13Laa tuonli n pia yaa ñuadi po teni ke bi pagi yi leni yin tuo ki go ŋua Kilisiti Laabaaliŋamo maama, leni yin puni bu paabu leni ti bulicindi maama bani yaa po leni bi niba kuli po. 14Bi go jaandi U Tienu ki miadi o yipo leni mi buama boncianla kelima wan puni yi yaa ŋanbicianli. 15U Tienu n baa i tuondi o paabu yaabu n ki pia maama yeni po.

will be added

X\