2 KOLINTA YAABA 7

1N buakaaba, kelima ti pia laa ñoaniani, tin yaa ŋanbidi mani ti yula ki ñandi ti gbanandi leni ti yantiali kuli joagindi, ki yaa tiendi ania ki suagi liiga leni mi gagidiŋanma hali ki pundi li bianu U Tienu fangili nni. 2Pa ti mani u kaanu yi pala nni. Tii biidi oba kuli po, tii guli oba kuli, tii dini oba kuli liba. 3Mii maadi yeni ki bua ki jaligi yi ka, ama nani min den kpa yedi maama, yi ye ti pala nni, tin ye leni tin kpe kuli. 4N dugi yipo boncianla, n jigini n yuli yipo boncianla, n baa i baagi ke li dagidi. Baa ti falabiado kuli nni, n pia li pamankandikaali. 5Moamoani, hali tin den pundi Maseduana tii den baa fuodima baa waamu. Ti den laa fala buoli kuli, a koana den lindi ti, i jeje mo ti pala nni. 6Ama U Tienu, yua n baagidi yaaba n ye fala nni, den baagi ti leni Tita cuama. 7Laa tie ke o cuama bebe ka den baagi ti, ama wan den baa yikani yaa baagi den baagi ti. O den togidi ti yin bua ki goa ki le nni maama, leni yi pabiidili, leni yi yankuali npo n yaba maama, ki teni ke lankuli mangi n pali ki pugini. 8Baa ke n den biidi yi pala leni min den diani yipo yaa tili, mii mua ke n yaa den diani li. Baa n yaa den mua lipo, li tie kelima n laa ke laa tili n biidi yi pala u yogunu waamu po maama, 9n pali mani moala. Laa mangi n pali kelima n biidi yi pala ka, ama kelima yi pabiidili den teni ke yi lebidi yi yama. Kelima yi pabiidili yeni tie U Tienu n bua yaa pabiidili buolu. Lanwani tii biidi yipo liba kuli. 10Yeni de, U Tienu n bua yaa pabiidili buolu yeni baa cuani yaa yanlebidima n kpendinni mi tindima, ki kan teni wan di fa ki mua lipo. Ama ŋanduna yaa pabiidili baa cuani mi kuuma. 11Diidi mani laa pabiidili, U Tienu n bua yaali yaa buolu yeni, n cuani yaala: Li tigini yi ke yi moandi. Li go cie yeni kelima li teni ke yi mia sugili, yi pala mo biidi lipo. Li go teni ke ti jawaandi cuo yi, ki teni ke yi go bua ki le nni, ki go teni ke yi baa li yankuali, ki tundi i tagili daano leni tundifala. Yi doagidi li bonla kuli nni ke yii pia tagili laa bonla nni. 12Lanwani, baa ke n den diani yipo li tili yeni, laa tie yua n tudi yaa po, laa tie wan den tudi yua po yaa po mo, ama ke yin puni yi yula tipo maama n doagidi yi siiga, U Tienu nintuali. 13Lankuli baagi ti. Laa tie ke li baagi ti bebe ka, ama ti pala go den mangi boncianla kelima ti laa Tita yaa pamanli kelima yikuli n den duani o yama maama. 14Baa n yaa pagi n yuli waamu yipo Tita kani, mii laa i fe lipo kelima li doagidi ke min den pagi yi o kani maama tie moamoani, nani tin den yen maadi yi yaa maama kuli n tie moamoani maama. 15O yaa tiadi yikuli n den ga o cangu leni li fangili leni mi digibima ki go tuo ki ŋua o maama maama, o buama yipo yabidi ki pugini. 16N pali mani ke n baa fidi ki dugi yipo li bonla kuli nni.

will be added

X\