2 KOLINTA YAABA 13

1Min baa cua yikani yaama na n tie mi tataama. Maama kuli baa kadi siedinba lie bi siedinba taa yaa ñoana nni. 2Min den ye yikani mi liema yaa yogunu ki yedi yaala, n go tuodi ki yedi la moala baa ke mii ye yikani ke yaaba n den kpa tiendi ti tuonbiadi leni yaaba n sieni kuli, ke n yaa go cua yikani n kan cedi oba kuli. 3Yi lingi yaala n doagidi ke Kilisiti maadi n ñoabu nni. Wani Kilisiti naa tie tadimo yinba yaa po, o ye yi siiga leni u paalu. 4Moamoani o den ye leni o tadingu ban den kpaa o li dapoanpoanli po yaa yogunu. Ama o ye ki fo kelima U Tienu paaciamu po. Ti moko taani leni o o tadingu nni, ki go baa fo leni o kelima U Tienu paaciamu po tin tiendi yaala yi siiga po. 5Yinba yiba, yin kpaagikpaagi ki le yi yaa ye li dandanli nni. Biigi mani yi yula yiba. Naani yii bani ke Jesu Kilisiti ye yi niinni yoo? Li yaa tie ke yi biigi yi yula, yi baa sua ke yi poadi. 6N sugini ke yi baa bandi ke bi yaa biigi tinba, bi kan sua ke ti poadi. 7Tin miadi U Tienu yaala tie ke yin da tiendi yaala n bia baa waamu. Laa tie ti bua ki yaa tie nani ban biigi ki pagi yaaba ka, ama ti bua ke yin yaa tiendi yaala n tiegi, baa li yaa naani ke bi biigi ti ki sua ke ti poadi. 8Kelima tii pia yaa paalu n baa yie i moamoani po, se ki yaa ŋua i moamoani bebe. 9Ti mangidi ti pala tin tadi ke yi mo pa yaa yogunu. Tin miadi yaala ti jaandi nni tie ke yin ŋanbi ki dagidi cain. 10Li tie lani yaa po ke n diani yipo laa maama kuli min ki ye yikani yaa yogunu, ke n yaa ti cua yikani, min da mabini yi leni o Diedo n dini nni yaa bali yaala n tie yi ŋamu po, kaa tie yi tingbali po. 11N kpiiba, n majuodikaama tie mine: Yin yaa mangidi mani yi pala. Moandi mani ki ŋanbi ki dagidi cain, baagi mani yiyaba, ki yaa pia mani yantiayenli, ki yaa mani leni yiyaba. Lanwani mi buama leni mi yanduanma Tienu baa ye leni yi. 12Gobini mani yiyaba leni mi buamoanma. Bi nigagidiŋanba kuli fuondi yi. 13O Diedo Jesu Kilisiti ŋanbili leni U Tienu buama leni U Tienu Fuoma Yua yanyenma n yaa ye leni yikuli.

will be added

X\