2 KOLINTA YAABA 11

1N bi bua yin juuni leni nni min maadi yipo mi yanluomaama waamu. Lanwani, juuni mani leni nni. 2N pia yipo U Tienu nunponli buolu, kelima n den bua ki caa yi jayendo nani yaa powandiali n ŋani cain yeni ke min teni yi Kilisiti. 3Ama n jie ke nani o wa n den boandi Awa leni o nunfanbiadibu maama, ke ban da ti biidi yi yantiana yin yaadi ki ŋa Kilisiti, yin bua yua leni payenli yeni. 4Kelima niloba yaa cua yikani ki wangi yi Jesutoa, tin kaa waani yi yua, bi yantiatoali yin ki den kpa baa U Tienu Fuoma kani yaali yeni, bi ki ŋua yaa laabaaliŋamo n ki taa leni yin den kpa ŋua yua, yi yen juuni ki tuo ki ga lankuli bonŋanla. 5To, mii tama ke yaaba n nua bi yula ke bi tie bi tondicianba yeni cie nni baa waamu. 6N yaa tie mabanlo, n pia mi bandima wani. Ti den doagidi yipo lani u yogunu kuli li bonla kuli nni. 7Naani n den tudi leni min jiini n yuli ki fiini yinba min den wangi yi U Tienu Laabaaliŋamo fanma kaa ga panpaani yeni? 8N den fie Kilisiti n yini yaaba taana kaanto yaaba kani ki tuuni yipo. Ama min den ye yi siiga leni mi luoma, mii den tie oba kuli po tugili. 9Ti kpiiba, yaaba n den ñani Maseduana ki cua Kolinta, den puni nni yaala n poadi npo kuli. N den kubi n yuli kaa tua yipo tugili bonlaba kuli nni. N go baa tiendi yeni. 10Kelima Kilisiti moamoani yi n ye n niinni yaa po, oba kuli kan fidi ki yie npo ke n kan kpiagi n yuli lipo Akayi diema nni. 11Be yaa po ke n yedi yeni? Kelima mii bua yi bi? U Tienu bani ke n bua yi. 12N go baa tiendi nani min tiendi maama moala, ke yaaba n bua ki kpiagi bi yula, ki go bua bi niba n yedi ke bi da leni tinba n da pia magbaali. 13Laa niba tie bi tondifaadanba, yaaba n tuuni ki boandi bi niba, ki moandi ki naani leni Kilisiti tondiba. 14Ban tiendi yaala yeni naa pia pakili, kelima Sutaani oba moandi ki naani leni mi yenma maleki. 15Lanwani laa pia pakili o tuonsoanba moko yaa moandi ki naani leni mi teginma tuonsoanba. Bi juodima baa tua nani bi tuona n tie maama. 16N go yedi ke niloba n da nua ke n tie yanluodaano. Baa yeni mo, tuo mani ke n tie yanluodaano, ke min baa ki kpiagi n yuli waamu. 17Min maadi maama ki pagi n yuli leni li papaali yeni, mii maadi nani o Diedo n baa maadi maama ka, n maadi nani o yanluodaano yeni. 18Kelima niba boncianla kpiagidi bi yula nani bi nisaaliba n nua maama, lani yaa po n moko baa kpiagidi n yuli. 19Yinba yaaba n tie bi yanfodanba, yi tuo ki juuni leni bi yanluodanba. 20Yi tuo ban kuani yi ti yonbidi nni, ki je yi, ki fagi yi, ki fali yi, ki pabi yi. 21Li pia npo i fe min yedi yeni: Tin den ye yi siiga, ti den dingi ki kan fidi laa bonla. Ama o nilo n baa tuo ki kpiagi o yuli yaala yaa po kuli, n maadi nani o yanluodaano yeni, n moko baa fidi ki kpiagi n yuli lani yaa po. 22Bani bi tie Ebilunba ka? N moko tie yeni. Bi tie Isalele yaaba ka? N moko tie yeni. Bi tie Abalahama puoliŋuani ka? N moko tie yeni. 23Bi tie Kilisiti naacenba ka? N maadi nani o gaado yeni, n moko tie yeni ki cie ba. Li tuonli po, N cie ba boncianla, A kpaadidiena kuama po, N cie ba boncianla, Ti puadi po, N cie ba boncianla. I yogini boncianla Mini leni mi kuuma ki den foagi. 24Jufinba den pua nni piitaa n puadi yia yia taalima muu. 25Taalima taa bi den pua nni leni i baliji. Yenma bi den lugidi nni a tana ki bua ki kpa nni. Taalima taa n den ye yaa ñinbiaciangu n mia mi ñincianma nni. Yenma n den ye mi ñincianma nni yentunmunli leni li ñiagu. 26N den cuoni a sancena boncianla, ki nagini mi kuuma i kpenciami nni, ki go nagini mi kuuma kelima bi sanjiaba po, ki go nagini mi kuuma kelima n buolu Jufinba po leni bi nilanba po kuli, ki go nagini mi kuuma u dociamu nni, leni mi fanpienma nni, leni mi ñincianma nni kuli, ki go nagini mi kuuma yaa tuofaadanba n yedi ke bi tie ti kpiiba ki naa tie yaa po. 27N den tuuni li tuonli leni li tuonpaali kuli, n den yen ye leni mi duanoanlima, leni mi koma leni u ñunñuunu, yaa yogini n yaba n den ye leni ti jepoadi, ki ye leni ti wadi, ki yen luo ti tiayiekaadi. 28Lani kuli daa taa lienni, yaala n tugi npo mayuli lan tie Kilisiti n yini yaaba nitaana kuli yanyagidi mabini nni daali kuli. 29Bi siiga nni ŋme n tadi ke mini mo naa tadi? Ŋme n baa ti tuonbiadi nni ke laa juni n pali? 30Li yaa tie tiladi min kpiagi n yuli, n baa kpiagi li kelima n tadingu po. 31U Tienu yua n tie o Diedo Jesu Baa, wani yua n pia ti pagidi hali yaa yogunu kuli, bani ke mii pua faama. 32Min den ye Damasa dogu nni, Aleta o badiciamo n den dini yua laa dogu bali den teni ke bi gu u dogu buliñoajala kuli ki baa cuo nni. 33Ama n lieba den teni ke n kua ku baabuogu nni ke bi ñani nni li dieli bonli u dogu bilinciamu puoli po, ki jiini nni, ke n sani ki cia o nuu nni.

will be added

X\