1 TIMOTE 5

1Ŋan da tundi o nikpelo leni ku fuugu. Ama ŋan tundi o nani o tie a baa yeni. Ŋan tundi bi jawaaba nani bi tie a waamu yeni, 2ki tundi a pociana nani bi tie a naanba yeni, bi jafanba mo nani bi tie a naataanpola yeni leni ku yantugupiengu kuli. 3Ŋan yaa jigindi yaa kpepuona n kaa go pia kubikaaba. 4Li kpepuoli yaa pia a bila, yaaka a yaabila, li pundi ban bandi ki yaa tiendi yaala n pundi yua n ŋua U Tienu n yaa tiendi yaala o danba po, ki guani bi danba bi ŋanma. Kelima lani n tie yaala n mani U Tienu po. 5Yaa kpepuoli n ye obebe kaa pia kubika bili o suginma U Tienu kani ki miadi o u yensiinu leni ku ñiagu kuli ke wan yaa todi o. 6Yaa kpepuoli n puni o yuli ŋanduna jeligu po kpe, baa ke o da fo. 7Ŋan yaa wangi ba lankuli, ki tundi ba ke ban da pia ban baa fidi ki kuli ba leni yaala. 8O nilo yaa kubi o niba, yaala n tugi li yuli tie o dieceli niba, o nia li dandanli, o go bia ki cie yua n kaa daani. 9Ŋan da diani kpepuoli yeli a kpepuona tili nni kali o pundi bina piiluoba, ki den pia jayendo, 10ki tie bi niba n pagi yua o tuonŋama po, ki go tie yua n den wubi a bila, ki gaani bi canba cangu leni mi buama, ki nigidi bi nigagidiŋanba taana, ki todi yaaba n ye leni fala, ki tieni a tuonŋama buoli kuli. 11Ŋan da tuo ki diani yaa kpepuoli n da paani kelima o gbanandi yaa paadi o ke o bua ki kuni o ja, o baa lebidi ki ŋa Kilisiti, 12ki baa i tagili nni ki ŋa wan den kpa niani yaa ñoanianu. 13Bi go tua bi kpadijedanba yaaba n goadi ki tuadi ti diedi. Laa tie lani bebe, bi go tua bi lanpaadanba leni a tingbangbaaba, ki maadi lan kaa pundi ban maadi yaa maama. 14Lani yaa po, n bua ke yaa kpepuona n da paani n kuni bi jaba, ki maa a bila, ki kubi bi diegu ŋantaadi, ki da pa yibali u sanu ban sugi ba. 15Kelima baa moala a kpepotiama lebidi ki ŋua Sutaani. 16Yaa pua bi yaa ja n daani yaa pia o danba ke bi tie kpepuona, wan yaa todi ba, ki da tuni Kilisiti n yini yaaba laa tugili, ke bi baa fidi ki todi yaa kpepuona n kaa pia kubikaaba. 17Li pundi ke Kilisiti n yini yaaba nikpeliba yaaba n gobidi bonŋanla n baa ti jigidi ki cie. Lan pundi yaaba n baa yeni ki cie tie yaaba n kuandi bi yama U Tienu maama wangima nni leni U Tienu maama bangima nni. 18Kelima li diani i Diani nni ki yedi: «Ŋan da yilini o nua ñoabu takunkumi wan ŋmaadi ki suodi ti siandi yaa yogunu.» Li go diani ki yedi: «Li pundi o tuonsoanlo n baa o panpaani.» 19Ŋan da ga makuligaba kuli Kilisiti n yini yaaba nikpelo po, li yaa tie siedinba lie yaaka siedinba taa yaa ñoana nni. 20Ŋan fu leni yaaba n tieni ti tuonbiadi bi niba kuli nintuali, ke yaaba n sieni n jie. 21N teni a yaa ñoabonli n tie na U Tienu nintuali leni Jesu Kilisiti nintuali, leni bi maleki-gandikaaba yaa nintuali, ke ŋan yaa ŋua laa maama kuli ki da gagidi bi niba leni biyaba, ŋan tieni bikuli po yenma. 22Ŋan da jaligi ki maani a nii niloba po, ki da taani leni nitoa o tuonbiadi nni. Fini aba mo n kubi a yuli ki yaa ŋani. 23Ŋan da go ñu mi ñima bebe, ŋan yaa ñu duven waamu waamu, yaala n baa todi a a tugukoanu po leni yaa yiani n lindi ki co ŋa po. 24Bi nitianba tuonbiadi doagidi bi niba kuli po baa ke bi daa biigi ba. Ama nitianba yaa tuonbiadi kan doagidi kali bi biigi ba. 25Li go tie yeni leni a tuonŋama, ya n doagidi bonŋanla bi niba kuli po ye, ya n duagi mo kan yaa wuo hali yaa yogunu kuli.

will be added

X\