1 TIMOTE 4

1U Tienu Fuoma maadi bonŋanla ki yedi ke mi juodima yogunu yaa nagini, bi nitianba baa ŋa li dandanli Kilisiti po sanŋoadima, ki tuo ki ŋoadi i bilisinba yaa boandi leni mu cicibiadimu yaa bangima. 2Kelima bi baa ŋua bi bangi-faadanba yaa palieda, bani yaaba yaa pala siedi n kpe nani ban sia yaala leni yaa kudi n tuoni yeni. 3Bi bangi ke ja n da taa pua, ki go bangi ke ban da di jetianma U Tienu n tagi yaama ke yaaba n tie bi nidugikaaba ki go bani i moamoani n yaa di ki tuondi U Tienu. 4Kelima U Tienu tagima kuli ŋani, laa pundi o nilo n fali jiemaba kuli, wan je ki tuondi U Tienu mipo, 5kelima U Tienu Maama leni i jaandi gagidi ki ŋanbi likuli. 6A yaa tundi ti kpiiba laa tundi kuli, a baa tie Jesu Kilisiti naacenŋamo, yua n dindi o yuli leni li dandanli maama leni mi bangiŋanma ŋan ŋoadi yaama cain yeni. 7Ama ŋan yie yaa togida n tie fanma fanma ki nia li dandanli. Ŋan moandi ki yaa se ki pa U Tienu sanŋoadima nni. 8Ti gbanandi tuonli pia mayuli waamu bebe, die ki bua ki yaa suagi liiga U Tienu sanŋoadima nni, lani n pia mayuli li bonla kuli po, kelima li niani u ñoanianu yaa miali n tie na po leni yaa miali n baa cua moko yaa po. 9Laa maama tie mi madugikaama, ki pundi bi niba kuli n ga ma. 10Ti tuuni ki moa kelima ti bili ti suginma U Tienu yua n fo kani, wani yua n tie bi niba kuli Candaano, ama o tie yaaba n daani o yaa po yo ki cie. 11Ŋan tundi ba, ki bangi ba laa bonla. 12Ŋan da tuo ke niloba kuli n fali a kelima a tie jawaalo. Ama ŋan tua li bontogidikaala bi nidugikaaba po a maama nni, a tagu nni, a buama nni, a dandanli nni leni a yantugupiengu nni kuli. 13Hali min baa cua, ŋan tieni ania ki yaa cogi U Tienu maama ki yaa tundi ba ki go bangi ba. 14Ŋan da yie ŋan den baa yaa paabu, U Tienu den puni a yaabu ban den pua sawali ke Kilisiti n yini yaaba nikpeliba maani apo bi nii yaa yogunu. 15Ŋan pa a yuli cain laa bonla kuli po ki kuani a yama lienni bonŋanla, bi niba kuli n le ŋan suagi liiga maama. 16Ŋan kubi a yuli, ki go kubi a bangima, ki yaa se ke li pa likuli nni. Kelima a yaa tiendi yeni, a baa faabi a yuli ki go faabi yaaba n cengi a bangima kuli.

will be added

X\