1 Yaa maama n tie na tie mi madugikaama. O nilo yaa lingi ki bua ki tua gobidika Kilisiti n yini yaaba siiga, o bua yaa tuonli n ŋani. 2 Li tie tiladi ke yua n tie o gobidika Kilisiti n yini yaaba siiga n da pia ban baa fidi ki kuli o leni yaala. Wan yaa pia poyendo bebe, ki pia mi yansoangima leni u tagiŋamu, ki kubi o yuli, ki gaani bi niba cangu leni mi buama, ki go tie yua n fidi mi bangima. 3 Wan da tie yua n puni o yuli li dañoli, wan da tie yua n bua janjanma, wan yaa tie yua n dingi kaa bua koanli, kaa bua ligi ke li pendi. 4 Ama wan yaa tie yua n gobidi o diegu bonŋanla, o bila mo n tuo o maama bonŋanla ki yaa fangi o. 5 Kelima o nilo yaa bani ki gobidi wani oba yaa diegu, o baa ga lede ki fidi ki yaa gu U Tienu n yini yaaba? 6 Wan da tie yua n daani ke li daa waagi, ke ti japaadi n da ti diedi o, wan da ti baa Sutaani n den baa yaa cuonu nni. 7 Li go tie tiladi yaaba n kaa tie Kilisiti n yini yaaba n yaa tiendi opo yaa siedi n ŋani, ke wan da ti le i fe, ki baa Sutaani jogidu nni. 8 Li go tie tiladi Kilisiti n yini yaaba todikaaba moko n yaa tie bi niba n jigindi yaaba, ban da pia pala lie, ki da kuani bi yama li dañoli nni, ki da kuani bi yama yaa ñuadi n pia i fe moko nni. 9 Ban yaa kubi li dandanli moamoani yi n doagidi leni yaa pali siedi n ŋani. 10 Ban kpa biigi ba bi yaa sua ke baa pia ban baa fidi ki kuli ba leni yaala, lanwani ban kua bi tuonli nni. 11 Bi puobac moko n yaa tie bi niba n jigindi yaaba, ki da tie tingbangbaaba, ki yaa kubi bi yula, ki tie bi niba n fidi ki dugi yaaba po li bonla kuli nni. 12 Kilisiti n yini yaaba todika n yaa pia poyendo bebe ki gobidi o bila leni o diegu bonŋanla. 13 Yaaba n tie Kilisiti n yini yaaba todikaaba ki tuuni laa tuonli bonŋanla baa baa ti jigidi leni ti dugiciandi li dandanli Jesu Kilisiti nni. 14 N diani apo line ki sugini ke n baa cua a kani ke li kan waagi. 15 Ama n yaa fidi ki cua tonma, n bua ŋan bandi ŋan baa tiendi maama U Tienu diegu nni, lani n tie U Tienu yua n fo n yini yaaba, bani yaaba n tie i moamoani benjielu leni yi dasaali. 16 Oba kan nia ke U Tienu sanŋoadima bondoaginkaala ñua boncianla. Laa bondoaginkaala tie wani, Yua n den doagidi o yuli ti gbanandi nni. U Tienu Fuoma den saa opo i moamoani, Malekinba den laa o, Bi den wangi o maama i nibuoli nni, Bi den daani o ŋanduna nni, O den goa ki doni ti kpiagidi kaanu nni.
