1 TIMOTE 1

1Mini Polo, n tie Jesu Kilisiti tondo kelima U Tienu ti Candaano yaa ñoabonli po, leni Jesu Kilisiti yua n tie ti suginma yaa po. 2N diani apo li tili, fini Timote, yua n tie n bimoanga li dandanli nni. U Tienu yua n tie Baa leni ti Diedo Jesu Kilisiti yaa ŋanbili leni o niñingbadima leni o yanduanma n yaa ye leni a. 3N bua ki tiadi a min den puogi a yaala min den baa fii ki gedi Maseduana diema yaa yogunu, ke ŋan yaa ye Efesa ki tundi bi nitianba ke ban da bangi bangitoama. 4Ŋan go yie bipo ke ban da pa bi yula i telimi togida, leni bi yaajanba togida ya n kaa pia gbenma nni. Kelima laa bonla kuli fiindi mi niama ki naa todi ke U Tienu tuonli suagi liiga li dandanli nni. 5Laa tundi n baa cuani yaala tie yaa buama n ña yaa pali n pieni niinni, leni yaa pali siedi n ŋani, leni li dandanmoanli. 6Bi nitianba lebidi ki ŋa laa bonla, ki yaadi ki ŋua mi mafanma. 7Bi bua ki yaa tie li balimaama bangikacianba, ama baa bani ban maadi yaala leni ban bangi yaala leni li papaali yeni n bua ki yedi yaala. 8To, ti bani ke U Tienu balimaama ŋani, li yaa tie ke o nilo ŋua ma nani lan bili maama. 9Ti go bani ke baa bili li balimaama yeni o niteginka po, ama bi bili ma bi nibiadiba leni yaaba n yie li bali leni U Tienu yiekaaba leni ti tuonbiadi danba po, leni yaaba n kaa ŋua U Tienu sanu kaa fangi o mo yaa po, leni yaaba n ku bi baanba leni bi naanba, leni nikpalo kuli po, 10leni mi conconma danba leni yaa jaba n taagi leni biyaba po, leni yaaba n kuadi bi niba, leni bi tuofaadanba leni yaaba n tiendi mi siedifaama po, leni yaala n nia leni bangiŋanma po kuli. 11Laa bangiŋanma ŋua o Laabaaliŋamo, U Tienu yua n pundi ki yaa baadi ti kpiagidi ki go pia mi yemanmoanma n piani nni yua. 12N tuondi ti Diedo Jesu Kilisiti yua n puni nni u paalu, ki sua ke n tie nidugika ke o kuani nni o tuonli nni, 13mini yua n den kpa sugidi o, ki wangi o fala, ki tiendi o yaala n bia. O den gbadi npo mi niñima kelima n den tiendi yeni n yanpiima po leni n dandanluoma po. 14Ti Diedo den ŋanbi npo hali ke li kandi, ki puni nni yaa dandanli leni yaa buama n ñani Jesu Kilisiti kani. 15Yaa maama n tie na tie mi madugikaama, ki pundi ke bi niba n ga ma cain ke Jesu Kilisiti den cua ŋanduna nni ki baa tindi ti tuonbiadi danba. Bi siiga nni mini n cie. 16Ama o den gbadi npo mi niñima line yaa po: Jesu Kilisiti cili ki doagidi o juunli mini yaa kani, ke min tua li bontogidikaala yaaba n baa daani o ki baa yaa miali n kan gbeni kuli yaa po. 17U Tienu, yua n tie o Badiciamo hali yaa yogunu kuli kaa pia kuuma, tin ki nua yua, wani yua bebe n tie U Tienu n yaa baadi ti jigidi leni ti kpiagidi yaa yogu n tu yaa yogu. Amina. 18N biga Timote, n teni a yaa ñoabonli n tie na, nani ban den kpa pua apo yaa sawali ki yedi maama lani n tie ŋan yaa koani li dandanli koanŋanli, 19ki yaa kubi li dandanli leni yaa pali siedi n ŋani. Bi nitianba den ŋa laa bonla ke bi dandanli bodi. 20Imene leni Alesanda tie laa niba siiga yaaba. N den teni ba Sutaani, ke lan bangi ba ban da go sugidi U Tienu.

will be added

X\