1 TESALONIKA YAABA 5

1Ti kpiiba, yaala n tie li yogini leni li dana po, laa go tie tiladi ke min diani yipo. 2Kelima yi bani bonŋanla ke o Diedo daali yeni baa cua nani li conconli yene ku ñiagu. 3Yaa yogunu ke bi niba baa tua: «Mi yanduanma leni laafia ye,» lanyogunu yo ke mi bolinma baa ludi ba nani u maditugukoanu n yen ludi yaa pua n baa maa yeni. Bi kan fidi ki sani ki cia. 4Ama yinba, ti kpiiba, yii ye li biigili nni ke laa daali baa ludi yi nani li conconli yeni. 5Yikuli tie mi yenma yaaba leni u yensiinu yaaba. Tii tie ku ñiagu yaaba leni li biigili yaaba. 6Lani yaa po tin da goa mani nani yaaba n sieni yeni, ama tin yaa nua ki kubi ti yula ki gu. 7Kelima yaaba n goa, goa ku ñiagoe, yaaba n ñu ki gaadi mo ñu ki gaadi ku ñiagoe. 8Ama tinba, yaaba n tie u yensiinu yaaba, tin yaa kubi ti yula. Tin yaa laa li dandanli leni mi buama yaa kudiliadili, ki go ciibi mi tindima yaa suginma nani li kusanli yeni. 9Kelima U Tienu naa den bili ke tin baa o pabienli nni ka, ama ke tin baa mi tindima kelima ti Diedo Jesu Kilisiti yaa po. 10Wani Jesu n den kpe tipo ke tin ye ki fo leni tin kpe kuli, tin taani ki yaa ye leni o. 11Lani yaa po yin yaa paagidi mani yiyaba pala, ki yaa todi yiyaba ke yikuli n suagi liiga ti Diedo sanŋoadima nni, nani yin mali ki tiendi maama. 12Ti kpiiba, ti mia yi yin yaa jigindi yaaba n tuuni o Diedo tuonli yi siiga, bani yaaba n gobidi yi o sanŋoadima nni ki tuodi ki tundi yi. 13Yin yaa pia bipo li faadili leni mi buama hali bonŋanla kelima bi tuonli yaa po. Yin yaa mani leni yiyaba. 14Ti kpiiba, ti go tundi ki mia yi yin tuodi ki yaa tundi yaaba n ye sindisindi yema, ki yaa paagidi yaaba yaa gbani n wudi, ki todi yaaba n tadigi, ki yaa pia li juunli leni bi niba kuli. 15Yin fangi mani yi yula ki da guani oba kuli o biadima panpaani. Ama yogunu kuli yin moandi mani ki yaa tiendi yaala n ŋani yiyaba po leni bi niba kuli po. 16Yaa mangidi mani yi pala yogunu kuli. 17Yaa jaandi mani yogunu kuli ki da cedi. 18Yebuoli kuli nni, yin yaa tuondi mani U Tienu, kelima lani n tie U Tienu yanbuama yipo Jesu Kilisiti nni. 19Yin da gbindi mani U Tienu Fuoma fantama. 20Yin da fali mani sawali maama kuli. 21Yin yaa bigidi mani li bonla kuli ki yaa kubi yaala n ŋani. 22Yin foagidi mani leni biadima buolu kuli. 23Mi yanduanma Tienu, wani oba n yaa gagidi ki ŋanbidi yi cain yi pala nni, yi yantiana nni leni yi gbanandi nni kuli, ke yin da pia tagiliba kuli ti Diedo Jesu Kilisiti cuama daali. 24Yua n yini yi tie dugika, wani n baa tieni la. 25Ti kpiiba, yin yaa miadi mani U Tienu tipo. 26Fuondi mani ti kpiiba kuli ki gobini ba leni mi buamoanma. 27N puogi yi o Diedo yeli po ke yin cogi yaa tili n tie na ti kpiiba kuli po. 28Ti Diedo Jesu Kilisiti ŋanbili n yaa ye leni yi.

will be added

X\