1 PIELI 5

1Lanwani, mini yua moko n tie o nikpelo, ki go tie siedi Kilisiti falaciamo po, ki go baa taani ki baa U Tienu n baa doagidi yaa kpiagidi, mia ki go tundi yi siiga yaaba n tie bi nikpeliba line: 2Yin yaa kpaa mani U Tienu yankulu, yu n ye yikani. Yin da tiendi la nani li tie tiladi ka, ama lan yaa tie yi yama po, nani U Tienu n bua maama. Yin da tiendi yeni kelima yi bua ki baa i ligi ka, ama yaa tiendi mani la ke yi yama ye lienni moamoani. 3Yin da gobidi ban piani yaaba leni u paalu, ama yin yaa tie li bontogidikaala u yankulu po. 4Lanwani o yankpaaciamo yaa doagidi o yuli yaa yogunu, yi baa baa yaa kpiagidi n kan yindi yaa badifogiliga. 5Yinba bi jawaaba mo, yin yaa miindi mani yi yula bi nikpeliba kani. Yikuli n yaa miindi mani yi yula yiyaba kani, ki yaa laa li yumiinli ki yaa todi yiyaba kelima li diani: «U Tienu yiedi bi japaadanba, Ama o puuni bi yumiindanba o ŋanbili.” 6Lanwani yin yaa miindi mani yi yula U Tienu nuu yu n pia u paalu kani, ke u yogunu yaa pundi wan kpiagi yi. 7Yin tuni mani wani U Tienu yi yanyagidi kuli kelima wani oba n kubi yi. 8Yin yaa kubi mani yi yula ki yaa faami, kelima yi yibali Sutaani, goadi nani yaa yangbanlo n duni ki lingi wan baa cuo yua ki ŋmani yeni. 9Yin yaa se ke li pa yi dandanli nni ki yie opo, kelima yi bani ke yi kpiiba yaaba ye ŋanduna nni kuli mo laadi laa fala buolu. 10U Tienu yua n die li ŋanbili kuli, yini yi Kilisiti nni, ke yin taani leni o ki baa yaa kpiagidi n kan gbeni, yi yaa den laa fala u yogunu waamu po. Wani oba n baa ŋanbi yi cain, ki teni yin yaa se bonŋanla, ki paagi yi pala ke liba kuli kan fidi ki lengidi yi. 11Wani U Tienu n yaa die u paaciamu hali yaa yogunu kuli. Amina. 12Silasa, o nidugika, min nua yua ke o tie ti kpiilo, wani n todi nni ke n diani yipo yaa tijenjenga n tie na. N bua ki paagi yi pala, ki tieni yipo siedi ke yi se bonŋanla U Tienu ŋanbili yaali n tie i moamoani. 13U Tienu n gandi yaa nitaanli yaali n ye Babilona nani wan gandi yinba maama fuondi yi. N bijua Maka moko fuondi yi. 14Yin fuondi mani yiyaba ki gobini yiyaba leni mi buamoanma. Mi yanduanma n yaa ye leni yinba yaaba n ye Kilisiti nni kuli.

will be added

X\