1 PIELI 4

1Lanwani, kelima Kilisiti n den laa fala o gbanandi nni yeni, yi mo n bogini ki sedi leni laa yantiali, kelima yua n laa fala o gbanandi nni paadi leni ti tuonbiadi. 2Lani yaa po, yaa dana n sieni yipo hali yi miali bianu, yin da go ye ki ŋua ti gbanandi bonbuakaala ka, yin yaa ye ki tiendi U Tienu yanbuama. 3Kelima yaa yogunu n pendi yi den taa yaa yogunu n dagidi ki tiendi bi nilanba yaa yanbuama, ki puuni yi yula mi conconma, yi gbanandi bonbuaka-biadila po, li dañogaadili, ki di ki go ñu ke li pendi leni ti cagindi yaa buŋoadima po. 4Li paki ba ke yii go yegi leni ba ki kuani yi yama laa cagindi nni. Lani yaa po bi sugidi yi. 5Ama bi baa togidi bi tuona kuli wani yua n bogini ki baa jia ti buudi leni yaaba n fo leni yaaba n kpe kuli. 6Li tie lani yaa po ke bi den waani yaaba n kpe o Laabaaliŋamo, ke ban fidi ki yaa pia U Tienu miali kelima mi Fuoma po, baa ke ti buudi den cuo ba nani bi nisaaliba kuli yeni. 7Li bonla kuli juodima nagini. Yin faami mani ki yaa kubi yi yula, ke yin fidi ki yaa jaandi. 8Yaala n cie likuli tie ke yin yaa bua mani yiyaba leni yi pala kuli, kelima mi buama doagini ti tuonbiadi boncianla. 9Yin yaa gaani mani yiyaba cangu ki da yenbidi. 10Yi siiga yua kuli n yaa todi o lieba leni wan den baa U Tienu kani yaa ŋanbili-paabu buolu. Yeni, yi baa yaa tie U Tienu naacen-juoginkaaba leni wan puni yua kuli yaa paabu buolu po. 11O nilo yaa maadi, lan yaa tie ke wangi U Tienu maama. Yua n tuuni U Tienu tuonli, wan yaa tuuni leni U Tienu n puuni o yaa fidu. Yin yaa tiendi yeni ke wani U Tienu n yaa baadi ti kpiagidi li bonla kuli nni kelima Jesu Kilisiti po, wani yua n die ti kpiagidi leni u paalu kuli hali yaa yogunu kuli. Amina! 12N buakaaba, lan da paki yi leni yaa falaciamo n tie nani mi fantama ki ye yi siiga ki baa biigidi yi nani li tie yipo boncanla yeni. 13Ama yin yaa mangidi mani yi pala leni yin taani leni Kilisiti o fala nni, ke o kpiagidi yaa doagidi yaa yogunu yi moko n yaa ye leni li pamankandikaali. 14Bi yaa sugidi yi kelima Kilisiti yeli po, li pamanli ye leni yi kelima ti kpiagidi Fuoma, wani U Tienu Fuoma yeni ye leni yi. 15Ama yi siiga nni oba kuli n da le fala kelima o tie nikpalo, yaaka conconli, bi kelima o tieni biaditoama po, bi kelima o kua yaa maama n kaa pundi o yaa niinni. 16Ama o yaa laa fala kelima o tie Kilisiti yua, wan da jie i fe lipo, wan kpiagi U Tienu leni ban yini o laa yeli. 17U yogunu pundi ke ti buudi baa cili leni U Tienu diegu. Lanwani li yaa tie ke ti buudi cili leni tinba, yaaba n yie kaa tuo ki tiendi U Tienu Laabaaliŋamo n yedi yaala mo yaa juodima baa tie lede? 18Nani i Diani n yedi maama: «O niteginka yaa tindi leni fala, yua n yie U Tienu ki tie ti tuonbiadi daano mo te?” 19Lanwani li pundi ke yaaba n laadi fala kelima U Tienu yanbuama po n suagi ki yaa tiendi yaala n ŋani, ki teni bi yula wani o Tagido yua n tie o dugika.

will be added

X\