1 PIELI 1

1Mini Pieli, Jesu Kilisiti tondo, n diani li tili yinba U Tienu n gandi yaaba ke bi yayadi ki ye ku cangu Ponta, Galati, Kapadosi, Asi leni Bitini diema kuli nni. 2U Tienu yua n tie Baa den gandi yi nani wan den tuodi ki bani ki jagi maama, ki teni ke o Fuoma gagidi yi ke yin yaa tuodi ki tiendi Jesu Kilisiti n yedi yaala, ke o soama mo n mii ki ŋanbi yi. Li ŋanbili leni mi yanduanma n yaa pugidi yipo boncianla. 3U Tienu ti Diedo Jesu Kilisiti yaa Baa n baa ti pagidi! O niñingbadicianma po teni ke ti pia li miapanli, leni yaa suginma n fo kelima Jesu Kilisiti fiima bi tinkpiba siiga yaa po. 4Ti gu U Tienu n bili tipo yaa ŋalimani tanpoli po, yi n kan bodi ki kan joagini, ke yi ŋamu mo kan yindi. 5O bili la yinba yaa po, wani U Tienu paaciamu n kubi yaaba kelima li dandanli po, yaa tindima n baa yuandi ki doagidi mi juodima yogunu po. 6Lanwani mangi mani yi pala boncianla, baa li yaa tie tiladi ke moala po biigima buoli boncianla teni ke yi ye leni li pabiidili u yogunu waamu po. 7Laa bonla cua ki baa doagidi yi dandanli n moani maama. Wula, baa ke o tie bonmoanla, baa fidi ki biidi, ama bi yen biigi o leni mi fantama. Li tie yenma leni yi dandanli, yaala n tie bonmoanla ki cie wula ban baa biigi yaali ki bandi lin moani maama, ke yin baa ti pagidi leni ti kpiagidi leni ti jigidi Jesu Kilisiti n baa doagidi yaa yogunu. 8Baa ke yi daa laa o, yi bua o. Baa ke moala yii nua o, yi daani o, ki pia yaa pamancianli n pia ti kpiagidi, ki pendi bu ñoabu yedima, 9kelima yi baa yi dandanli panpaani, lani n tie yi tindima. 10Bi sawalipuaba yaaba n den pua sawali U Tienu n den bili yipo yaa ŋanbili po, den lingi ki buali ki bua ki bandi laa tindima maama fuuli. 11Kilisiti Fuoma yaama n den ye bi niinni den tuodi ki waani ba Kilisiti n baa le yaa fala leni wan baa yuandi ki baa yaa kpiagidi. Bi den moandi ki bua ki bandi lankuli n baa tieni yaa yogunu leni li yogunu n baa tie maama. 12U Tienu den doagidi ki waani ba ke ban soagindi yaa maama yeni ki tie bani biba po ka, li tie yinba yaa po. Moala yi gbadi laa bonla maama yaaba n wangi yi o Laabaaliŋamo kani. Bi den baa o U Tienu Fuoma Yua paalu, U Tienu n soani yua ke o ñani tanpoli po ki cua ŋanduna nni, ki wangi yi la. Baa malekinba bua hali boncianla ki diegi ki bandi laa bonla n tie yaala. 13Lani yaa po yin bogini, yi yantiana mo n yaa se kaanyendu, ki bili yi suginma yin baa baa yaa ŋanbili nni Jesu Kilisiti n baa doagidi yaa yogunu. 14Yin yaa tie yaa bila n tuodi ki tiendi U Tienu n yedi yaala, ki da go ŋua yin den kpa pia yaa bonbuaka-biadila, yi yama n den pii yaa yogunu. 15Ama, nani yua n yini yi n gagidi ki ŋani maama, yi mo n gagidi ki yaa ŋani yeni yi tagi kuli nni. 16Kelima li diani ki yedi: «Yin gagidi ki yaa ŋani, kelima mini n gagidi ki ŋani.” 17Li yaa tie ke yi miadi U Tienu ki go yini o yi Baa, wani yua n ja nilo kuli ti buudi nani o tuona n tie maama, ki naa tiendi gagidima bi niba siiga, lani yaa po yin yaa ye mani leni li fangili o nintuali yin ye ŋanduna nni ki tie canba yaa yogunu bianu kuli. 18Kelima yi bani ke U Tienu ki den taa yaa bonla n baa bodi nani ŋanjilifa leni wula yeni ka, ki da ki faabi yi leni yaa yema n tie fanma fanma, yin den baa yaama yi yaajanba kani. 19Ama, o den da ki faabi yi leni Kilisiti yaa soama, yaama n pia mayuli hali boncianla ki tie nani ban padi yaa pebiga n ki pia poadoba kuli yaama maama yeni. 20U Tienu den tuodi ki gandi wani Kilisiti lankuli po hali ke ŋanduna daa tagi, ki doagidi o ŋanduna juodima yogunu yinba yaa po. 21Li tie kelima wani Kilisiti yaa po ke yi daani U Tienu wani yua n den fiini o bi tinkpiba siiga ki puni o ti kpiagidi, ke yin yaa pia li dandanli leni mi suginma wani U Tienu po. 22Moala yi ŋanbi yi yula leni yin ŋua i moamoani ke yin fidi ki yaa pia yaa buama n kaa pia tuonanma yi kpiiba po. Lanwani yin yaa bua mani yiyaba hali boncianla leni yi pala kuli. 23Lani yaa po yi pia li miapanli. Yii pia li ke li ŋua leni yaa bonbuoli n baa bedi ka. Ama leni yaali n kan bedi. Lan tie U Tienu maama yaama n fo ki baa ye hali yaa yogunu kuli po. 24Kelima li diani: «Bi nisaaliba kuli tie nani ti muadi yeni, Bi kpiagidi kuli moko tie nani ti muadi puuma yeni. Ti muadi kuodi ke ti puuma mo suodi, 25Ama o Diedo maama baa ye hali yaa yogunu kuli.” Laa maama tie ban den wangi yi yaa Laabaaliŋamo.

will be added

X\