1 Moala yaala n tie ti padinandi po. Yi tua: «Tikuli pia mi bandima.» Mi bandima kpendinni ti japaadi, ama mi buama todi mi kpedima li dandanli nni. 2 O nilo yaa tama ke o bani li bonla, o daa bandi nani lan pundi wan bandi maama. 3 Ama yua n bua U Tienu kuli, U Tienu mo bani wane. 4 To, moala n baa maadi ti padinandi maama. Ti bani ke bulo naa ye ŋanduna nni se U Tienu yendo bebe n ye. 5 Kelima baa ke ban yi yaala i buli yaba lan tie tanpoli bi tinga nni, li tie moamoani ke i buli yaba ke bi diediba moko yaba. 6 Ama tinba yaa po wani Tienyendu bebe n ye, yua n tie Baa. O den tagi li bonla kuli, tinba mo ye o yaa po. Diediyendo bebe moko n ye, Jesu Kilisiti, li bonla kuli den tagi kelima o yaa po, ti moko ye kelima wani yaa po. 7 Ama bi niba kuli daa pia laa bandima. Bi nitianba n den maani i buli ŋoadima maama teni ke baa moala bi yaaŋmani laa nandi bi di nua ti ke ti tie padinandi o bulo po. Lanwani bi pala siedi ya n tadi yen joagini lienni. 8 To, laa tie mi jiema ka baa teni tin nagini U Tienu. Ti yaa dini, li kan wadi tipo liba, ti yaa dini mo, li kan pugini ti liba. 9 Ama yin fangi mani yi yula ke yin pia u sanu ki tieni yaala n da tua tantuudikaali yaaba n tadi yaa po. 10 Kelima o nilo yaa laa ke fini yua n pia mi bandima ka li budieli nni ki ŋmani ti padinandi, wani yua yaa pali siedi n tadi, li kan teni wan baa li papaali ki ŋmani ti padinandi yoo? 11 Lanwani a kpiilo yua n tadi, wani Kilisiti n den kpe yua yaa po, baa bodi kelima a bandima yaa po. 12 Yi yaa tudi yi kpiiba po yeni, ki lengidi bi pala siedi yaali n tadi, yi tudi Kilisiti po. 13 Lanwani jiemaba yaa baa guli n kpiilo, n kan go je laa jiema hali abada, ke min da guli n kpiilo.
