1 KOLINTA YAABA 7

1Moala n bua ki maadi yin den diani ki buali nni yaa maama. Li ŋani ke o ja n da taa pua. 2Ama kelima mi conconma n yaba maama, li pundi ke ja kuli n yaa pia o pua, pua kuli mo n yaa pia o calo. 3O ja n yaa tiendi o pua po yaala n pundi, o pua moko n yaa tiendi o calo po yeni. 4O pua ki die o gbanandi, o calo n die, o ja moko ki die o gbanandi, o pua n die. 5Yin da yie mani yiyaba po, kali yikuli yaa juogi ki tuo ki bili u yogunu waamu i jaandi po. Lani yaa pendi, yin goa ki taani leni yiyaba ke Sutaani n da tulini yi kelima yi gbali yi gbanandi kubima. 6Min maadi yeni, laa tie ke n bili yipo yin baa tiendi yaala ka, li tie sanbili yo. 7N bi bua ke nilo kuli n yaa tie nani min tie maama na. Ama nilo kuli baa U Tienu kani yaa paabu n ki taa leni o lielo, niyendo baa ki baa fidi ki tieni line, nitoa mo line. 8Moala n maadi yaaba n daa tieni ñiigili, bi jaba leni bi puoba, leni a kpepuona mo po, li baa ŋani bipo ban yaa tie ban tie maama, nani n moko n tie maama. 9Ama bi yaa kan fidi ki kubi bi gbanandi, ban tieni li ñiigili, kelima bi yaa tieni li ñiigili ŋani ki cie bi gbanandi n yaa fiidi bipo nani mi fantama n co yeni, ki paadi ba. 10N bili mi naa maama yaaba n tieni li ñiigili po. Mini ka bili ma, o Diedo n bili ma. O pua n da ña o calo kani. 11O yaa ñani o kani wan da go kuni jatoa, wan yaa ye obebe, yaaka wan go mangi leni o calo ki goa o kani. Ja mo n da ñani o pua. 12Moala n maadi yaaba n sieni po, mini n maadi, o Diedo ka. Ti kpiilo yendo yaa pia yaa pua n ki daani, ama ki tuo ki ye leni o, wan da ñani o. 13Yaa pua n pia o calo ke waa tuo ki daani, ama ki tuo ki baa ye leni o, wan da ña o kani. 14Kelima yaa calo n ki daani baa mi gagidiŋanma kelima o pua po. Yaa pua n ki daani mo baa mi gagidiŋanma kelima o calo po. Lani yaaka yi bila bi baa joagini, ama lan tie maama yeni, bi gagidi. 15Ama yua n ki daani yaa bua ki ña, ban cedi wan ña. O yaa ñani, ti kpiiba, lan tie ja bi pua, faabi leni laa lolima, kelima U Tienu yini ti ke tin yaa ye leni mi yanduanma. 16Fini o pua, a bani lede a yaa baa faabi a calo? Fini o ja mo, a bani lede a yaa baa faabi a pua? 17Lanwani bonyenla bebe n ye, yua kuli n yaa ye nani o Diedo n puni o maama, ki ŋoadi wan den tie maama U Tienu n yini o yaa yogunu. Lani n tie min biliti yaala Kilisiti n yini yaaba i kaani kuli po. 18O nilo yaa den kua ku koanciagu U Tienu n yini o yaa yogunu, wan da lingi ki bolini ku koanciagu maalima, o nilo yaa den kua U Tienu n yini o yaa yogunu, wan da kua. 19O nilo yaa kua leni o yaa kua, laa tie pu, ama U Tienu mabilikaama kubima n tie li kuli. 20Nilo kuli n yaa tie wan den tie maama U Tienu n den yini o yaa yogunu. 21A yaa den tie yonbo U Tienu n yini a yaa yogunu, lan da yagi a yama. Ama a yaa baa fidi ki faabi, ŋan moandi. 22Yua n tie yonbo o Diedo n yini o yaa yogunu, o Diedo faabi o ke o tua o yua. Yua n die o yuli mo U Tienu n yini o yaa yogunu tua Kilisiti yonbo. 23U Tienu den da yi yaa dunga n pa, lanwani da tua mani bi nisaaliba yaa yonbi. 24N kpiiba yua kuli n yaa tie U Tienu kani wan den tie maama U Tienu n den yini o yaa yogunu. 25Yaala n tie yaaba n kaa tieni ñiigili nani yin den buali nni maama po, mii pia o Diedo mabilikaama laa maama po. Ama n baa waani yi min sua yaala, mini yua ke o Diedo teni ke n tua nidugika kelima o niñingbadima yaa po. 26Kelima yaa fala n kpendi yaa po, n sua ke li baa ŋani o nilo n yaa tie wan tie maama. 27A pia pua bi? Ŋan da moandi ki bua ki ñani o. Ŋaa pia pua? Da lingi ki taa. 28Ama a yaa taa pua, ŋaa tieni tuonbiadi. O jafaano mo yaa kuni ja, waa tieni tuonbiadi. Ama yaaba n tieni li ñiigili baa laadi fala u naa yogunu yema nni, li tie lani yaa po ke n bua ki todi yi yin da kua laa fala nni. 29N kpiiba min bagi yaala tie ke yaa yogunu n sieni koabi. Lanwani dinla liiga yua n pia pua n yaa ye nani waa pia yeni. 30Yaaba n buudi n yaa ye nani baa buudi yeni. Yaaba n pia li pamancianli n yaa ye nani baa pia yeni. Yaaba n da bonla n yaa ye nani baa die ban da yaala. 31Yaaba n pia i ŋantaadi leni ŋanduna bonla n yaa ye nani laa bonla ki tie bipo tiladi, kelima ŋanduna yua n ye moala na pendi ki baa juodi. 32N bua yin yaa ye ki da pia yanyagidi. Yua n kaa pia pua kuandi o yama o Diedo ŋantaadi nni, ki lingi wan baa mangidi o Diedo pali maama. 33Yua n pia pua mo kuandi o yama ŋanduna na ŋantaadi nni ki lingi wani baa mangidi o pua yaa pali maama. 34Lani n teni ke o podaano yama boagidi kaani lie. O pua moko, yua n kaa pia ja, leni yua n daa bani ja, bi moko kuandi bi yama o Diedo ŋantaadi nni, ki moandi ki gagidi bi gbanandi nni leni bi yantiali nni kuli. Yua n kuni o ja kuandi o yama ŋanduna ŋantaadi nni ki lingi ki baa mangidi o calo pali. 35N maadi lankuli ki bua ki todi yi. Laa tie ke n bua ki dia ku diagu ka. N bua yin yaa ŋua o Diedo nani lan pundi maama, ki bua o ki taabi o leni payenli. 36O nilo yaa pia o toginaa ke o dagidi li calinkpenli ke o sua ke li pundi wan kuni o ja mo, ke o sua ke o tudi leni wan yie opo, wan tieni wan sua maama, waa tieni tuonbiadi, wan cedi wan kuni. 37Ama yua n den jagi ki bili o yama po ke o baa kubi o toginaa wan da kuni ja, o yaa sua ke o baa fidi ki tieni nani wan den jagi maama, o ŋanbi leni wan teni ke o toginaa kan kuni ja. 38Lanwani yua n cedi ke o bisalo kuni, o tieni yaala n ŋani, ama yua n kubi o bisalo ke waa kuni, wani n tieni yaala n ŋani ki cie. 39O pua luo leni o calo, o calo n ye yaa banlu kuli, ama o calo yaa ti kpe, o pua yeni faabi ki baa fidi ki kuni wan bua yua kuli, ama kali wan yaa tie o Diedo yua. 40O yaa tie wan tie maama kaa go kuni jatoa n baa mani opo ki cie. Lani n tie mini n sua maama, n tama ke n pia U Tienu Fuoma moko.

will be added

X\