1 KOLINTA YAABA 3

1N kpiiba mii den fidi ki maadi leni yi nani yi tie U Tienu Fuoma n die yaaba, ama n den maadi leni yi nani yi da ŋua li nisaali-yantiali, nani a canpanda yeni Kilisiti nni. 2N den ñundi yi mi naaŋanma yeni, ki naa tendi yi yaa jiema n juagi, kelima yi kan den fidi ki ga ma. Baa moala yi daa fidi ki ga ma, kelima yi da ŋua li nisaali-yantiali. 3Nani li nunponli leni li koanli n da ye yi siiga yeni, laa doagidi ke yi ŋua li nisaali-yantiali, ki tiendi nani bi nisaaliba n tiendi maama kaa? 4Yaa yogu ke yi siiga one tua: «Mini wani n ŋua Polo,» ke one mo tua: «Mini wani n ŋua Apolosa,» 5yii ŋua li nisaali-yantiali kaa? Apolosa tie ŋme? Polo tie ŋme? Ti tie o Diedo naacenba bebe, yaaba n den cuani yipo o Laabaaliŋamo, ke yi daani nani o Diedo n puogi yua kuli maama. 6Mini n den buli ke Apolosa mo den kpidi. Ama U Tienu n teni ke li kpedi. 7Lanwani yua n buu ki tie pu, yua n kpidi mo ki tie pu, kali U Tienu yua n tendi ke li kpedi, wani n tie likuli. 8Yua n buli leni yua n kpidi kuli de yenma, yua kuli baa baa o panpaani nani o tuonli n tie maama. 9Kelima ti taa ki tuuni leni U Tienu. Yinba n tie U Tienu kuanu. Yi go tie U Tienu diegu. 10Nani U Tienu n puni nni yaa ŋanbili po, n den pu li tanpuuli nani o diemaa-yanfodaano yeni, ke nitoa mo ŋuandi lipo. Die yua kuli n fangi o yuli leni wan ŋuandi lipo maama. 11Kelima oba kuli kan go puu tanputoali, ke laa tie yaali n mali ki puu, lani n tie Jesu Kilisiti. 12O nilo yaa ŋuani laa tanpuuli po wula, yaaka ŋanjilifa, yaaka yaa tana yaa dunga pa, yaaka ti daadi, yaaka ti muadi, yaaka a kankaga, yua kuli tuonli n tie yaali baa doagidi, 13kelima ti buudi daali baa waani la. Mi fantama baa doagidi yua kuli n soani yaala. Mi baa biigi yua kuli tuonli ki waani lan tie yaala. 14Yua kuli n ŋuani yaala li tanpuuli yuli po yaa fidi ki ñani mi fantama biigima nni kaa buodi, o baa baa i panpaani. 15Ama yua yaa tuonli n buodi, o baa luo i panpaani. O baa faabi, die nani yua n sani ki ñani mi fantama nni ki cia yeni. 16Yii bani ke yi tie U Tienu diegu ke o Fuoma ye yi niinni yoo? 17Yua n bolini U Tienu diegu kuli, U Tienu baa bolini o. Kelima U Tienu dieli gagidi ki ŋani, yinba n tie laa dieli. 18Oba kuli n da boandi o yuli. Yi siiga oba yaa tama ke o tie o yanfodaano nani ŋanduna n nua maama, wan tua yanluodaano ke wan baa ki tua o yanfodaano. 19Kelima ŋanduna na yaa yanfuoma tie yanluoma U Tienu po. Li diani yeni ki yedi: «O co bi yanfodanba bi nunfanbu nni.» 20Li go diani ki yedi: «O Diedo bani bi yanfodanba yanmaalima. O bani ke mi tie fanma fanma.» 21Lanwani oba kuli n da jigini o yuli bi nisaaliba po. Kelima li bonla kuli tie yi yaa yaala. 22Li yaa tie Polo, li yaa tie Apolosa, li yaa tie Sefa, li yaa tie ŋanduna, li yaa tie li miali, li yaa tie mi kuuma, li yaa tie yaa yogunu n tie na, li yaa tie yaa yogunu n baa ti cua, likuli tie yi yaa yaala. 23Yi mo tie Kilisiti yaaba. Kilisiti mo tie U Tienu yaa yua.

will be added

X\