1 KOLINTA YAABA 16

1Yaala n tie mi ligitaanma bi nigagidiŋanba yaa todima po, yi moko n tieni nani min den bili Kilisiti n yini yaaba, yaaba n ye Galati diema nni maama. 2A ŋada daali kuli, yi siiga yua kuli n yen bili o denpo wan fidi yaala nani o bonpiakaala n pundi maama, ki da guudi n cuama yogunu ki tieni mi ligi taanma. 3N yaa cua, n baa diani a tila Jelusalema yaaba po, ki teni yin gandi yaa nidugikaaba, ki soani ba ban gedini yi paabu Jelusalema. 4Li yaa pundi mini nba n gedi, bi baa yegi leni nni. 5N yaa poandi Maseduana diema, n baa cua yikani. Kelima n jagi ke n baa poandi Maseduana nni. 6Daalinba n baa waagi leni yi, li fidi min pundi ti wadi yogunu, ke yin todi nni leni n cenli, min baa gedi naankani kuli. 7Kelima mii bua ki le yi moala ki pendi tontoni, ama o Diedo yaa tuo, n sugini ki waagi leni yi waamu. 8Ama n da baa ye Efesa na hali li Dapiimuuli jaanma n pundi, 9kelima u sanu luodi npo yaala n tie n tuonli po, ama yibalinba moko yaba. 10Li yaa tie ke Timote cua yikani yin ga o cangu bonŋanla ke wan da bangi liba yi siiga, kelima o tuuni o Diedo tuonli nani mini yeni. 11Oba kuli n da fali o. Yin todi o o cenli nni ki cabi o leni mi yanduanma wan goa ki cua n kani. Kelima n gu wan taani leni ti kpiiba ki cua. 12Ti kpiilo Apolosa yaa maama po, n den tigini o ke wani leni ti kpiiba n yegi ki gedi yikani, ama waa bua ki cua yikani moala, o yaa baa u sanu o baa cua. 13Yin yaa gu mani, ki yaa se ke li pa li dandanli nni, tua mani jaba, paagi mani yiba. 14Yi siiga li bonla kuli n yaa tiendi leni mi buama. 15N kpiiba n go pia mayenma. Yi bani ke Sitefana leni o deni yaaba kuli tie yaaba n den kpa daani Jesu Akayi diema nni. Yi go bani ke bi puni bi yula ki todi bi nigagidiŋanba. 16Yin miini mani yi yula laa nibuolu kani leni yaaba n kuani bi yama ki tuuni o Diedo tuonli kuli. 17N pali mangi leni Sitefana leni Fotunata leni Akayikusa cuama, bi tieni n po yin bi baa tieni n po yaala kuli. 18Bi duani n yama ki mangi n pali ki go tieni yeni yi moko yaa po. Yin pagi mani laa nibuolu po. 19Kilisiti n yini yaaba Asi diema nni kuli fuondi yi. Akilasa leni Pilisila, leni Kilisiti n yini yaaba, yaaba n taandi bi diegu nni, fuondi yi o Diedo nni. 20Ti kpiiba yaaba n ye nekanba kuli fuondi yi. Fuondi mani yiyaba ki gobini yiyaba leni mi buamoanma. 21Mini Polo n diani n fuondi na leni n nuceli. 22Yua n kaa bua o Diedo kuli, wan tua ti solindi yua. Ti Diedo, ŋan cua. 23O Diedo Jesu yaa ŋanbili n yaa ye leni yi. 24N buama ye leni yikuli, Jesu Kilisiti nni.

will be added

X\