1 KOLINTA YAABA 15

1N kpiiba n bua ki go tiadi yi min den kpa waani yi yaa Laabaaliŋamo, yin den ga yua, ki se lienni bonŋanla. 2Yi tindi kelima o Laabaaliŋamo yeni yaa po, li yaa tie ke yi kubi o nani min den waani yi maama. Yeni yaaka yi dandanli moko tie fanma fanma. 3N den kpa waani yi mini nba n den baa yaa bangima, lani n tie ke Kilisiti den kpe ti yaa tuonbiadi po nani i Diani n yedi maama, 4ke bi den piini o, ke li dataali daali o den fii bi tinkpiba siiga, nani i Diani n yedi maama. 5O den doagidi o yuli Sefa po, ki go doagidi bi piiga n niliediba po. 6Lani n pendi o go den doagidi o yuli ti kpiiba yaaba n den taani ki cie niba kobimuu po. Bi siiga boncianla da ye, ama bi tianba wani kpe. 7Lani n pendi o den doagidi o yuli Jaka po, ki yuandi ki doagidi li bi tondiba kuli po. 8O den juodi ki doagidi o yuli mini mo yaa po, mini yua n tie nani ki bikaaga yeni. 9Moamoani n tie Jesu tondiba kuli siiga puoli yua, mii pundi ban yini nni Jesu tondo moko kelima n den wangi U Tienu n yini yaaba fala. 10Kelima U Tienu ŋanbili po yo ke n tua min tie yua na. O ŋanbili npo naa tua fanma, li teni ke n soani ki cie Jesu tondiba kuli. Laa tie mini nba ka soani yeni, ama U Tienu ŋanbili n tuuni leni nni. 11Lanwani lan tie mini, lan tie bani, tikuli wangi yi laa Laabaaliŋamo, yi mo den tuo ki daani wane. 12Lanwani, li yaa tie ke ti wangi ke Kilisiti fii bi tinkpiba siiga, li ga lede ke yi siiga tianba nia ke bi tinkpiba fiima ki ye? 13Bi tinkpiba fiima yaa ye, Kilisiti moko naa den fii bi tinkpiba siiga. 14Kilisiti yaa den fii mo, ti mawangima tie fanma fanma, yi dandanli moko tie fanma fanma. 15Yeni moko ti tie siedi tuofaadanba U Tienu po, kelima ti tieni opo siedi ke o fiini Kilisiti bi tinkpiba siiga, ke o naa fiini o, li yaa tie ke bi tinkpiba kan fii. 16Kelima bi tinkpiba yaa kan fii, Kilisiti moko naa den fii bi tinkpiba. 17Kilisiti mo yaa den fii bi tinkpiba siiga, yi dandanli tie fanma fanma, yi da ye yi tuonbiadi nni, 18yaaba n daani Kilisiti ki kpe moko bodi. 19Li yaa tie ke ti suginma Kilisiti po tie o naa jamaano bebe po, ti yema pia mi niñima ki cie bi niba kuli. 20Ama moamoani, Kilisiti fii bi tinkpiba siiga ki tie o kpialo ki tie siedi ke yaaba n kpe kuli baa fii. 21Lanwani kelima mi kuuma n den cua kelima o nisaalo yaa po, yeni moko bi tinkpiba fiima cua kelima niyendo yaa po. 22Nani bi niba kuli n kpe kelima Adama po maama, yeni bi niba kuli go baa baa li miali kelima Kilisiti yaa po. 23Ama yua kuli o kaanu, Kilisiti o kpialo, li yaa puoli, wan cua yaa yogunu, yaaba n tie o yaaba baa fii. 24Li yaa puoli mi juodima yogunu baa cua. Kilisiti baa paadi ki bolini batoali kuli leni paato kuli leni paacianto kuli ki teni U Tienu yua n tie Baa mi diema kuli. 25Kelima li tie tiladi ke Kilisiti n yaa die hali U Tienu n teni wan ŋmaa o yibalinba o taana tiipo. 26Wan baa juodi ki bolini yaa yibali tie mi kuuma. 27Moamoani U Tienu den teni ke Kilisiti die li bonla kuli ki ŋmaa la ki diedi likuli. Ama lan yedi ke o teni ke Kilisiti die li bonla kuli yeni, li doagidi ke yua n teni ke o die li bonla kuli naa taa laa bonla nni. 28Li yaa tie ke Kilisiti diedi li bonla kuli yaa yogunu, wani U Tienu Bijua baa miini o yuli ki tuo ke yua n den teni ke o die likuli yeni n yaa die o, ke U Tienu n yaa tie likukuli li bonla kuli nni. 29Bi tinkpiba fiima yaa ye, yaaba n batisi kelima yaa niba n kpe yaa po baa baa lipo be? Li yaa tie moamoani ke bi tinkpiba kan fii, be yaa po ke nitoaba batisi bani yaaba n kpe yaa po? 30Tinba mo, be yaa po ke ti ye mi yebiadima nni yogunu kuli? 31N kpiiba li tie moamoani ke n ye mi kuuma nni daali kuli nani lan tie ke n pia li pamancianli ti Diedo Jesu Kilisiti kani kelima yi yaa po maama. 32Li yaa tie ke bi niba n nua maama bebe yaa po ke n den koani leni ti moayandi Efesa po, n den baa be ñuadi lienni? Li yaa tie ke bi tinkpiba kan go fii, lanwani: Tin je mani ki go ño, kelima saala ti baa kpe. 33Lan da boani yi: "U yeginbiadu n baa biidi li yantiaŋanli". 34Yin go baa mani li yantiaŋanli nani lan pundi maama, ki cedi ki da go tiendi tuonbiadi, kelima yi siiga tianba naa bani U Tienu. N maadi yeni ke i fe n cuo yi lipo. 35Daalinba niloba baa buali: «Bi tinkpiba baa fii lede? Bi baa goa ki cua leni be yaa gbananbuolu?» 36Fini o yanpiidaano, ŋan buli yaala yaa kpe, li kan pudi. 37Ŋan buli yaala ke li tie bonbibu, bi dibima, bi bonbuotoe, laa tie ŋan go baa le yaala. 38U Tienu puuni bonbibu kuli wan bua yaa gbanandi buolu. O puuni bonbibu kuli bu gbanandi buba. 39Ti gbanandi buoli kuli naa tie yenma. Bi nisaaliba gbanandi ye tiba, ti yandi gbanandi ye tiba, ti bonyugiditi gbanandi ye tiba, i jami yaa gbanandi mo ye tiba. 40Tanpoli yaa yaadi ye, ki tinga mo yaa yaadi ye. Tanpoli yaa yaadi kpiagidi naa taa leni ki tinga yaa yaadi yaa kpiagidi. 41U yienu pia u kpiagidi uba, o ŋmaalo pia o kpiagidi oba, a ŋmabila pia a yaa kpiagidi aba. A ŋmabila moko naa taa kpiagidi buolu leni aya. 42Bi tinkpiba fiima mo baa tie yene. Bi buli ti gbanandi ke ti tie bonbedikaadi, ama ti go baa fii kaa go pia bedima. 43Bi buli ti ke ti gundi, ama ti baa goa ki fii ki pia ti kpiagidi. Bi buli ti ke ti tadi, ama ti baa goa ki fii ki pia u fidu. 44Bi buli ti ke ti tie nisaali gbanandi, ama ti fii leni U Tienu Fuoma yaa miali. Li yaa tie ke ti nisaali gbanandi ye, yaa gbanandi n pia U Tienu Fuoma miali moko ye. 45Li tie yeni ke li diani ki yedi: O nikpialo Adama den tua yaa milai n fo. Ama Adama juodika tie yaa Fuoma n puuni li miali. 46Laa tie tanpoli yua ka den kpia, ama ki tinga yua, ke tanpoli yua yuandi ki cua. 47O nikpialo den ñani ki tinga tama nni ki tie ki tinga yua, o nilielo ñani tanpoli. 48Tinga nni yua n tie maama, tinga nni yaaba mo kuli tie yeni, tanpoli po yua n tie maama, tanpoli yaaba mo kuli tie yeni. 49Nani tin pia ki tinga yua yaa nannanli yeni, ti go baa baa tanpoli po yua yaa nannanli yene. 50N kpiiba, min yedi yaala tie ke ti gbanandi leni mi soama kan je li faali U Tienu diema nni, yaala n baa bedi mo kan je yaala n kan bedi faali. 51Diidi mani, n baa doagidi yipo li bondoaginkaala. Tikuli ka baa kpe. Ama tikuli baa lebidi. 52Li baa tieni yenma nani ku nungbangu kabima yeni, o kakaci-juodika yaa piebi yaa yogunu. Kelima kakaci yaa piebi yaaba n kpe baa fii ki kaa go pia mi bedima, lani ti mo baa lebidi. 53Li tie tiladi ti naa gbanandi yaadi n baa bedi n lebidi ki tua yaadi n kan bedi. Li tie tiladi ti naa gbanandi yaadi n baa kpe n lebidi ki tua yaadi n kan kpe. 54Lanwani yaa gbanandi n baa bedi yaa lebidi ki tua yaadi n kan bedi, ke yaa gbanandi n baa kpe mo lebidi ki tua yaadi n kan kpe, laa yogunu yaa maama n diani na baa tieni ki dudi: Bi paadi mi kuuma ki bolini ma cain. 55Mi kuuma, a paani be? Mi kuuma, a bonjunkaala go ye le? 56Mi kuuma bonjunkaala tie ti tuonbiadi, ti tuonbiadi paalu mo tie li balimaama yaa po. 57Ama tin tuondi mani U Tienu yua n teni ke ti paani li bonla kuli kelima ti Diedo Jesu Kilisiti po. 58Lanwani n kpibuadiba yin yaa se mani bonŋanla ki da lengidi. Yin yaa suagi mani liiga o Diedo tuonli nni yaa yogunu kuli, ki bani ke yi tuonli o Diedo po kan tua fanma.

will be added

X\