1 KOLINTA YAABA 11

1Yin yaa ŋua mani n fuuli nani min ŋua Kilisiti fuuli maama. 2N pagi yi kelima yi tiani npo li bonla kuli nni, ki go ŋua min den bangi yi yaa bangima mo. 3Baa yeni n bua yin bandi ke Kilisiti tie ja kuli yudaano, o ja mo tie o pua yudaano, U Tienu mo tie Kilisiti yudaano. 4Yaa ja n jaandi bi ki wangi U Tienu maama ki ciibi kuli, o jigidi o yudaano. 5Ama yaa pua n jaandi bi ki waani U Tienu maama ki naa yili, o jigidi o yudaano. Likuli yenma leni wan kuo o yudi. 6O pua yaa kan yili, wan moagi o yudi. Ama i fe yaa pia o pua wan kuo o yudi, bi wan moagi ti, li pundi wan yili. 7Laa pundi o ja n yaa ciibi, kelima o tie U Tienu nannanli leni o kpiagidi. O pua mo n tie o ja yaa kpiagidi. 8Moamoani, o ja naa den ñani o pua niinni, ama o pua n den ñani o ja niinni. 9U Tienu naa den tagi o ja kelima o pua po ka, ama o den tagi o pua kelima o ja yaa po. 10Lani yaa po, leni malekinba yaa po, li pundi o pua n yili. 11Yaala n tie o Diedo nni yaa po, o pua yema kan dagidi se ja n yaa ye, o ja mo yema kan dagidi se pua n yaa ye. 12Kelima nani o pua n den ñani o ja niinni maama, likuli tie yenma leni moala, ja kuli mali kelima o pua po, ama li bonla kuli ñani U Tienu kani. 13Yinba yiba n biigi mani ki le li yaa ŋani ke o pua n jaandi U Tienu kaa yili. 14Naani mi tagima mani miba ki wangi ke o ja yaa pia ti yuciandi, ke li pia i fe? 15Ama o pua wani yaa pia ti yuciandi, li tie opo ti kpiagidi, kelima U Tienu puni o ti yuciandi tin yaa tie opo nani li cabiyilikaali yeni. 16O nilo yaa bua ki nia laa maama, wan bandi ke tinba leni U Tienu n yini yaaba kuli siiga, tii pia laa bogidili. 17Yaa maama n baa ŋua yaa po, mii pagi yi ba, kelima yi yaa taani laa ŋanbi yipo liba, li biidi yi bebe. 18Min da baa kpa maadi yi yaala tie ke n gba ke yi yaa taani mi paadima ye yi siiga. N daani li waamu 19kelima li tie tiladi ke mi paadima n yaa ye yi siiga, ke yaaba n se i moamoani nni n doagidi. 20Yi yaa taani, li naa tie o Diedo jiema po ka ke yi taani. 21Kelima yi yaa kali ki baa je, yua kuli yen cili ki yaa di wani oba yaa jiema kaa gu o lieba, ke mi koma pia tianba, ke tianba mo ñu hali ki gaadi. 22Yii pia yi denpo yin baa di ki go ñu naani yoo? Bi yi fali U Tienu n yini yaaba, ki fiagi bi siiga yaaba n ki pia liba yoo? Min yedi yi lede? Min pagi yi bi? N kan pagi yi lani yaa po. 23Kelima n den baa o Diedo kani min bangi yi yaala. Ban den janbi o yaa ñiagu, o den taa dupen 24ki tuondi U Tienu, ki cabidi ki yedi: «Line n tie n gbanandi yaadi n cabidi yipo. Yaa tiendi mani yeni ki tiani npo.» 25Ban den dini ki gbeni yaa yogunu, o den taa ki tadiñokaaga ki yedi: «Yaa tadiñokaaga n tie na tie o ŋantaadipaano yua n kua kelima n soama yaa po. Yaa tiendi mani yeni ki tiani npo yin baa ñu yaa yogunu kuli.» 26Lanwani yaa yogunu kuli ke yi ŋmani dupen ki go ñuni ki tadiñokaaga nni na, yi wangi o Diedo kuuma, hali wan go baa cua. 27Lani yaa po yua n ŋmani o Diedo dupen ki go ñuni o Diedo tadiñokaaga nni kaa dagidi, o pia i tagili o Diedo gbanandi leni o soama po. 28Lanwani nilo kuli n kpa biigi o yuli, lani yaa puoli wan ŋmani laa dupen ki go ño laa tadiñokaaga. 29Kelima yua n ŋmani ki go ñuni ki naa laa ke o Diedo gbanandi ye lienni ŋmani ki go ñuni o yuli po ti buudi. 30Lani n teni ke a yiama leni a tadima yaba yi siiga, ke niba boncianla kpe. 31Ti yaa den biigi ti yula, U Tienu kan bi bu leni ti. 32Ama o Diedo bu leni ti ki tundi ti leni fala yeni, ke wan da ti taani ki bu ki cuo ti leni ŋanduna. 33Lani yaa po n kpiiba yi yaa taani ki baa je o Diedo jiema, yin guudi mani yiyaba. 34Mi koma yaa pia yua, wan kpa je o denpo ki nan cua, ke yin da taani yi nitaanli nni ki cuani yi yula po ti buudi. N baa ŋanbi yaa maama n sieni kuli n yaa ti cua yaa yogunu.

will be added

X\