1 KOLINTA YAABA 10

1N kpiiba mii bua ke yaala n den tieni ti yaajanba n yaa boani yi: Ku tawaligu den yiini bikuli po, bikuli den duodi mi ñincianma. 2Bikuli den baa mi batisima Musa niinni ku tawaligu nni leni mi ñincianma nni. 3Bikuli den di jeyenma yaama n ña U Tienu kani, 4ki go ñu bonñokayenla yaala n ña u Tienu kani, kelima bi den ñu yaa tangu yaa ñima n ñani U Tienu kani, yaagu n den yegi leni ba. Laa tangu den tie Kilisiti. 5Ama bi siiga boncianla ki den mangidi U Tienu pali, lani n teni ke bi den kpe mi fanpienma nni. 6Lankuli tie tipo li bonbangikaala, ki bua ki tuodi ki bangi ti ke tin da bua yaala n bia nani bani yeni. 7Yin da ŋoadi i buli nani bi siiga bi tianba n den tieni maama. Nani lan diani maama: «Bi den kali ki dini ki go ñuni, lani n pendi bi den fii ki jeli ki ciaga.» 8Tin da pa ti yula mi conconma mo nani bi siiga bi tianba n den puni bi yula mipo maama, ke piilie n niba tudataa (23,000) den kpe dayenli. 9Tin da biigi o Diedo nani bi siiga bi tianba n den tieni maama ke i we ku ba. 10Yin da yenbidi mo nani bi siiga bi tianba n den yenbidi maama, ke mi kuuma maleki den ku ba. 11Laa bonla kuli den baa bipo ki baa tie bi niba kuli po li bonbangikaala. U Tienu den teni ke likuli diani ki baa tie tipo i tundi, tinba yaaba n ye ŋanduna juodima dana siiga. 12Lani yaa po yua n tama ke o se wan fangi o yuli ki da baa. 13Tulinmaba kuli kan cua yi kani kaa tie yaama n kpendi bi nisaaliba kuli po. U Tienu tie dugika, o kan tuo yaa tulinma n cie yi fidu bianu n cua yi kani. Ama mi biigima yaa cua yi kani, o baa ŋanbi yipo u sanu ke yin fidi ki juuni ki ña lienni. 14Lani yaa po n buakaaba, yin sani mani ki foagidi leni i buli ŋoadima. 15N maadi leni yi kelima yi tie yanfodanba, yin biigi mani min maadi yaama na. 16Li seli tadiñokaaga tin tuondi U Tienu yaaga yaa po, naani kaa tie mi taanyenma leni Kilisiti soama po kaa? Tin cabidi yaa dupen, naani tii tie mi taanyenma leni Kilisiti gbanandi po kaa? 17Dupen tie yendo, tinba yaaba n yaba moko tie gbananyendi, kelima tikuli taani ki boagidi laa dupen yendo. 18Kpaagi mani Isalele yaaba po. Bi yaa dini ti padijiedi, naani baa pia taanyenma leni U Tienu kaa? 19N bua ki yedi be? Ke o bulo tie bonmoanla bi? Bi ke ban padi yaala o bulo tie bonmoanla bi? Kalam. 20N bua ki yedi ke yaaba n padi i buli yeni padi mu cicibiadimu po yo, baa padi U Tienu po ka. Mii bua ke yin yaa pia ŋantaado leni mu cicibiadimu. 21Yi kan fidi ki ño o Diedo tadiñokaaga, ki go ño mu cicibiadimu yaa tadiñokaaga. Yi kan taani ki je o Diedo jiema, ki go taani ki je mu cicibiadimu mo yaa jiema. 22Ti baa tieni yeni ki ñuni o Diedo li mutuoli bii? Ti pia u fidu ki cie o bi? 23Yi tua: «Liba kuli ki go kua» yeni, ama li bonla kuli ka ŋani, «Liba kuli ki go kua,» ama li bonla kuli ka todi. 24Oba kuli n da lingi o yuceli bebe yaa ŋamu, ama wan yaa lingi yaala n tie o lieba moko yaa po. 25Yi pia u sanu ki ŋmani yaa nandi n kuadi ki daaga nni kuli, ki da tuo yi pali siedi n yaa bangi liba kuli po, 26kelima li diani ki yedi: «O Diedo die ki tinga Leni yaala n ye ki niinni kuli.» 27Yua n ki daani yaa yini yi ke yin cua ki je leni o, ke yi bua ki gedi, je mani wan teni yi yaa jiema kuli, ki da buali kelima yi pali siedi po. 28Ama o nilo yaa yedi yi: «Yaa nandi n tie na tie padinandi,» da je mani kelima yaa nilo n waani yi la po, leni li pali siedi po. 29N baa yaa nilo n waani yi yeni yaa pali siedi, mii maadi yi yaa pali siedi ka. Be yaa po ke nitoa pali siedi baa bu leni min pia u sanu ki tieni yaala yaa po? 30N yaa tuondi U Tienu n jiema po, be yaa po ke bi baa jaligidi nni min tuondi U Tienu yaa jiema po? 31Lani, yi yaa baa je, leni yi yaa baa ño, leni yin baa tieni yaala kuli, tieni mani likuli U Tienu yaa kpiagidi po. 32Yin da tieni mani yaala n baa teni ke Jufinba leni yaaba n kaa tie Jufinba leni U Tienu n yini yaaba kuli n tuudi ki baa ti tuonbiadi nni. 33N moko moandi ki tiendi yeni ki baa dagidi leni bi niba kuli min tiendi yaala kuli nni. Mii tiendi yeni ki bua ki lingi n yuceli ŋamu ka, n lingi yaaba n yaba yaa ŋamu po, ke ban baa ki tindi.

will be added

X\