1 KOLINTA YAABA 1

1Mini Polo, U Tienu n den yini yua kelima o yanbuama po, ke min tua Jesu Kilisiti tondo, n taani leni ti kpiilo Sositena 2ki diani li tili U Tienu n yini yaaba, yaaba n ye Kolinta dogu nni po. O den gagidi ki ŋanbi yi Jesu Kilisiti nni, ke yin yaa tie o nigagidiŋanba. N fuondi yi leni yaaba n jaandi ki miadi ti Diedo Jesu Kilisiti i kaani kuli, wani yua n tie bi Diedo leni ti yaa Diedo. 3Ti Baa U Tienu leni o Diedo Jesu Kilisiti n pa yi li ŋanbili leni mi yanduanma. 4Yogunu kuli n tuondi U Tienu yipo kelima yin baa yaa ŋanbili o kani Jesu Kilisiti nni. 5Kelima o yaa niinni, yi den baa li seli li bonla kuli nni, lan tie mi maama po leni mi bandima kuli po. 6Lan tie ke yin den gbadi yaa siedi Kilisiti po den pu ki go se yi siiga ki pa. 7Yeni U Tienu paabu kuli siiga, baa bonyenbu ki poadi yipo yin gu ke U Tienu baa doagidi ti Diedo Jesu Kilisiti yaa yogunu. 8Wani U Tienu n baa teni yin yaa se ki pa hali mi juodima yogunu, ke bi kan fidi ki kuli yi liba kuli ti Diedo Jesu Kilisiti cuama daali. 9U Tienu tie tin fidi ki dugi yua yaa po, wani yua n den yini yi ke yin yaa pia yanyenma leni o Bijua Jesu Kilisiti ti Diedo. 10N kpiiba, n mia yi ki tundi yi kelima ti Diedo Jesu Kilisiti yeli po ke yikuli n yaa mani leni yiyaba, ke paadimaba kuli n da ye yi siiga, ke yin yaa taa yenma yi yantiana leni yi yanjaga kuli nni. 11N kpiiba, Kilowe diegu yaaba den waani nni ke mi niama ye yi siiga. 12Min bagi yaala tie ke yi siiga one tua: «Mini wani n ŋua Polo,» one: «Mini wani n ŋua Apolosa,» one: «Mini wani n ŋua Sefa,» one mo: «Mini wani n ŋua Kilisiti.» 13Naani Kilisiti boagidi yoo? Naani bi den kpaa Polo yo li dapoanpoanli po ki baa faabi yi? Bi, bi den batisi yi Polo yeli nni yoo? 14N tuondi U Tienu ke mii den batisi yi siiga oba kuli, kali Kilisipusa leni Gayusa. 15Lanwani oba kuli kan yedi ke bi den batisi o mini yaa yeli nni. 16Moamoani, n den batisi Sitefana leni o deni yaaba moko, mii tiani n yaa go den batisi nitoa. 17Kilisiti naa den soani nni ke min yaa batisi bi niba ka. Ama o den soani nni ke min yaa wangi o Laabaaliŋamo, ke laa tie min yaa wangi leni mi yanfodanmaama ka ke Kilisiti dapoanpoanli n da tua fanma. 18Kelima li dapoanpoanli yaa mawangima tie yanluoma yaaba n baa bodi po. Ama tinba yaaba n tindi po, li tie U Tienu paaciamu. 19Li diani ki yedi: «N baa bolini bi yanfodanba yanfuoma, Ki biani bi nunfandanba nunfanbu.» 20Lanwani o yanfodaano ye le? Li balimaama bangika go ye le? U naa yogunu nianiado go ye le? Naani U Tienu ki doagidi ke ŋanduna yanfuoma kuli tie mi yanluoma ka? 21Kelima bi nisaaliba leni bi yaa yanfoceli naa fidi ki bandi U Tienu leni wan doagidi o yanfuoma maama. Lanwani U Tienu den jagi ke o baa faabi yaaba n daani leni o Laabaaliŋamo wangima yaama n tie nani mi yanluomaama yeni. 22Jufinba miadi mi bancianma, Gilekinba mo lingi mi yanfuoma. 23Ama tinba wani wangi Kilisiti, ban den kpaa yua li dapoanpoanli po. Laa maama tie tingbali bonla Jufinba po, mi go tie yanluoma bi nilanba po. 24Ama U Tienu n yini yaaba po, ban tie Jufinba bi ban tie Gilekinba, Kilisiti tie U Tienu paaciamu leni U Tienu yanfuoma. 25Kelima U Tienu yanluoma fani ki cie bi niba yanfuoma, U Tienu tadingu mo pa ki cie bi nisaaliba yaa paalu. 26N kpiiba, kpaagi mani U Tienu n den yini yaaba n tie maama. Yi siiga yaaba n tie yanfodanba naa yaba, yaaba n tie paatieba leni yaaba n tie bulicinba moko naa fuu. 27Ama U Tienu gandi bi nisaaliba n nua yaala ke li tie yanluobonla, ki baa waani bi yanfodanba i fe. O go gandi bi nisaaliba n nua yaala ke li tie tadinbonla, ki baa waani bi paatieba i fe. 28O go gandi bi nisaaliba n nua yaala ke li tie bonfanla ki fali la, leni yaala n ki tie pu, ki baa bolini ban nua yaala ke li tie bonmoanla. 29O tieni yeni ke nisaaloba kuli n da kpiagi o yuli wani U Tienu kani. 30Ama yinba, U Tienu teni ke yi ye Jesu Kilisiti nni. O go teni ke Jesu tie tipo mi yanfuoma, leni mi teginma, leni mi gagidiŋanma, leni mi daafaabima. 31Lanwani, nani lan diani maama: «Yua n bua ki jigini o yuli, Wan jigini li o Diedo nni.»

will be added

X\