San Mateo 1

1Jesucristo a yanowamöblou showao mlao däjä, bada ebä cuo lä balöono wei, ei lä tä a̦. Jesucristo a lä cui, David e li nodiwä cuoma, Ablaamö nodiwä e ca̦i. 2Ablaamö bä ijilubö, Isaacö e cuoma. Isaacö bä ijilubö, Jacobo e cuoma. Jacobo bä ijilubö, Judawä ebä mashi ca̦i cuoma. 3Judawä bä ijilubö, Fale e cuoma, Sala e ca̦i, Damala nija cäcöbö lä taqueno wei cäcöbö lä cui. Fale bä ijilubö, Esomo e cuoma. Esomo bä ijilubö, Alamö e cuoma. 4Alamö bä ijilubö, Aminadaba e cuoma. Aminadaba bä ijilubö, Naasono e cuoma. Naasono bä ijilubö, Samono e cuoma. 5Samono bä ijilubö, Booso e cuoma, Laaba nija a lä taqueno wei a lä cui. Booso bä ijilubö, Obede e cuoma, Ludi nija a lä taqueno wei a lä cui. Obede bä ijilubö, Isai e cuoma. 6Isai bä ijilubö, David e cuoma, a bada bälöo lä dodijiono wei a lä cui. David bä ijilubö, Salomo e cuoma, Ulia bä suwäbö e nija a lä taqueno wei a lä cui. 7Salomo bä ijilubö, Loboama e cuoma. Loboama bä ijilubö, Abiasi e cuoma. Abiasi bä ijilubö, Asa e cuoma. 8Asa bä ijilubö, Josafada e cuoma. Josafada bä ijilubö, Jolamö e cuoma. Jolamö bä ijilubö, Usia e cuoma. 9Usia bä ijilubö, Jodamö e cuoma. Jodamö bä ijilubö, Acasa e cuoma. Acasa bä ijilubö, Esequia e cuoma. 10Esequia bä ijilubö, Manasesi e cuoma. Manasesi bä ijilubö, Amono e cuoma. Amono bä ijilubö, Josia e cuoma. 11Josia bä ijilubö, Jeconia ebä ca̦i mashi cuoma. Babilonia jamö bä ca̦i jubeje, Isaeli ebä lä däalalefälöno wejei däjä, ö̦jö bä li bälöo balöoma. 12Babilonia jamö bä ca̦i jubeje, Isaeli ebä däa waiquialalefälöno wejei ja, ei bä lä cui bä bälöo nodiablalou juoma. Jeconia bä ijilubö, Saladiele e cuoma. Saladiele bä ijilubö, Solobabele e cuoma. 13Solobabele bä ijilubö, Abiudu e cuoma. Abiudu bä ijilubö, Eliaquimi e cuoma. Eliaquimi bä ijilubö, Asolo e cuoma. 14Asolo bä ijilubö, Sadocu e cuoma. Sadocu bä ijilubö, Aquimi e cuoma. Aquimi bä ijilubö, Eliudu e cuoma. 15Eliudu bä ijilubö, Eleasala e cuoma. Eleasala bä ijilubö, Madana e cuoma. Madana bä ijilubö, Jacobo e cuoma. 16Jacobo bä ijilubö, José e cuoma. Ö̦jö a José bä suwäbö e nija, Jesús a oshe wawäblaliyoma, Cristo a wa̦fa lä jilabou wejei a lä cui. 17¿Ö̦jö tawä? Ablaamö nodiwä bä bälöablalou fa cuaanö, cuaanö, cuaanö, ya̦cumö David a bälöo nodioma. Ö̦jö däjä, David nodiwä ebä bälöablalou cuaaö fa nomöjöofälönö, ya̦cumö Jeconia a bälöo nodio nomöjöoma. Ö̦jö a lä bälöono wei däjä, Babilonia jamö bä ca̦i jubeje, wayu bänö Isaeli ebä däalalefälömaje. Ö̦jö bä bälöablalou nomöjöo fa cuaanö, cuaanö, ya̦cumö Cristo a oshe wawäa nomöjöa nodilayoma, Yai Bada tänö a shömabä a lä yaileno wei a lä cui. 18Jesucristo a oshe lä wawäblaliyono wei däjä, abinaja tä cublaliyoma. Bä nöö María e lä cui, Josénö a wa̦fa boma ma cui, a quilii showao däjä, Yai Bada a Bufi lojodenö, a shöbönabölayoma. A shöbönabö fa damolalunö, 19bä fe̦yalobö Josénö a nia däanomi majöwä. ¿Ö̦jö tawä? José showadi a dodijama. A nö quilili bleaamaö bufionomi. Ö̦jö cudeenö, a wa̦ lafujou mlai ja, mamicai a nia daaö bädaoma. 20Ö̦jö ma cui, a nia lä joyaö wei tä ja, a bufi dayäo showao däjä, Bada etä a̦jele majali damolaliyoma. José abinaja a nowa majali tama. —David nodiwä José wa e lä cuinö, suwäböfä María a däaö quilii dicoo dijä. Bä ijilubö e lä didibole, Yai Bada tä Bufinö a li fa dobälönö, a li shöbönabö. 21Ijilu wa̦lo a nia tablaö. Cama ebä lä cui, bä doblou ma mlai ma cui, etä nowa nia mladamaö. ¿Ö̦jö tawä? Etä nowa nia mladamaö cudeenö, Jesús wa wa̦fa nia jilaö —a nowa majali tama. 22Yai Bada a wa̦no wäyälewä a nija, Bada tä jaba cuu lä balöono wei etä a̦ bejedi wawäblobä, inaja tä bluca cublaliyoma. Abinaja Yai Bada tä a̦ cuu balöo showaoma. 23Moco a jubamou dao lä mlai, a nia shibönabölayou. Bä ijilubö e nia tablaö. Emawele e a̦fa nia jilabouje. Einaja tä a̦ cuu. ¿Ö̦jö tawä? “Emawele”, bä cuu ja, “Yai Bada tänö bämalecö ca̦i cua”, bei bä cuu. 24Ö̦jö däjä, José a jocäblou fa fenalonö, bä suwäbö e nacaa fenalema, Bada etä a̦jelenö a nowa lä tano weinaja showawä. 25Ö̦jö ma cui, Maríanö bä ijilubö e tablaö showao mlao däjä, a jubaö mlai ja a tabou balöoma. ¿Ö̦jö tawä? Bä ijilubö e fa tablalönö, Josénö a wa̦fa Jesús jilaquema.

will be added

X\