Zepania 3

1Yele boe teŋsɛka n namehere nɛreba wa zuo, teŋsɛka n de pobiregadoma teŋa wa, teŋsɛka n de ganlom ganlom teŋa wa zuo. 2Ka ka nane se'em, ka ka sakere pa'alegɔ. Ka ka dekɛ ka mɛŋa delom Na'ayenɛ, ka ka vurugere ka mɛŋa lɛna ka Na'ayenɛ la. 3Kpɛ'ɛndoma la n boe ka poan la dela gbegema, sɛba n behere ka la dela sanhe, ne kɔ'ɔn obe ge ka gɛta sɛla biŋera beere zuo. 4Ka nɔtɔgɔheba la dela pobirega. Ba dela ganlom ganlom doma. Ka malemadoma ganlom la toolom zen'an la ka dɔla pa'alegɔ la. 5Na'ayenɛ se'ere n boe la, dela fa'a Na'ayenɛ, a ka toonɛ be'em. Beere n yelegere woo a pa'ale la a som, dabaherɛ woo a ka malom ve'era a som la, ge la bala zan'an be'emdaana zuo ka zɛɛre. 6Mam ŋma teŋhe mɛ bahɛ, sagom ba panhe zan'an. Mam sagom teŋhe te sɛsɛla ka dɔla ba sɔya la zuo, nɛra ka boe wa doohe ba sɔya la zuo. Ba teŋkanra la zan'an sagom mɛ, te nɛra ka gee, nɛra la a yentɛ me ka gee. 7Mam yele teŋa la yeti, La dela pɛnregerɛ te ho zɔta mam, ge tɔ'ɔha pa'alegɔ. Te n de ŋma ho bɔŋa zen'an wa bahɛ, bii n bahɛ te namehe kanra wa sige ho zuo na. Ge a kan kelehe, ba nini kɔ'ɔŋ mɔ'ɛ mɛ la ganlehe tooma. 8Bala zuo la, Na'ayenɛ yele ya, gura ma de daarɛ, gura ma daanse'ere daarɛ te n ze'ele te n tɔgɛ la. Mam eŋɛ n potɛn'ɛre te a lagahɛ teŋhe wa zan'an mɛ ze'ele, mam maahom mɛ te n lagahɛ teŋkanra wa zan'an na la n ka'aɛ n sunsunyiim wa bahɛ ba zuo. Mam nyuunre sunsunyiim wan di teŋa wa zan'an wo bugum la. 9Ge te a nya dunhe a nɛreba wa nɔya, te ba zan'an nya yi'ira a yu'urɛ, ge la ba naa taaba tona bɔ'ɔra en. 10Mam nɛresɛba n po'ohere mam la n yeregɛ bɔna zen'an woo la, la sɛba n yeregɛ bɔna Kus kolaa yakene ha la, ba zan'an wan ze'ele ba bɔŋa zen'enhe mea ha tare bo'olom na bo mam. 11De daarɛ han ta paɛ, n ka bahɛ te nyanɛ kan bahɛ te nyanɛ di ho la be'em sebo te ho pon tom bo mam la, se'ere zuo, n yehe nɛresɛba n pa'ale ba mɛhe teŋa wa poan la bahɛ. Ho kan le malom tara pa'ale mɛŋa ho poan mam fa'a zoore la zuo le yɛ'ɛha. 12Ge n wan bahɛ nɛresɛba n de ninbɔn'zɔrɛdoma, la nɛresɛba n sigehe ba mɛŋa ge dɛna sɛba n delom Na'ayenɛ la, te bama bɔna teŋa la poan. 13Israel nɛresɛba n gee la kan le malom tom be'em. Ba kan le parona, bii pan'ahegɔ zɛ'ɛta ba nɔɔrɛ poan yɛhera na. Ba wan di tegɛ ge gan'arɛ ginhɛ ban bote se'em te sɛla ka bɔna wan daam ba. 14Teŋsoŋa pɔyɔa wa, yoon hom bote se'em, Israel teŋa wa, yoon popeelom yooma. Yerusalem pɔyɔa wa, bahɛ te ho poorɛ pee, ge te ho la'ara la ho suunre zan'an. 15Na'ayenɛ gu' namehe seko n ye' ne ho zuin na la bahɛ mɛ, a dige ho diŋdaana la te a lebe mɛ. Na'ayenɛ se'ere n de Israel Naba la boe mɛ la hɔ, ho paleŋa kan le ɛngera la daanseko. 16De daarɛ ba wan yele Yerusalem yeti, Zion wa, da bahɛ te ho paleŋa ɛngera, da bahɛ te ho giinla kɔ'ɔhɛ. 17Na'ayenɛ ho Yenɛ la boe mɛ la hɔ, a tare paŋa wan fan' hɔ bahɛ. A suunre n kɛn' hɔ, a wan dekɛ a nɔŋerɛ ma'an bogelɛ ho suunre, a puurɛ wan pee te a dekɛ yooma yoona hom zuo. 18N wan foe ya ninbɔn'ɔn de'eŋɔ la bahɛ, ba dela zeero la nyaane bo ya. 19Saŋkaŋa poan la, nɛresɛba woo n daa daam ho la, n wan tulugɛ ba, n wan fan' wɔbehe bahɛ, ge kan'ahɛ mam nɛresɛba te ba yeregɛ ba bahɛ la lebena. N wan bahɛ te pɛnka, la na'ahegɔ bɔna la ba teŋsɛka woo poan te ba zuo daa fakɛ la. 20Saŋkaŋa poan n wan kan'ahɛ ya na, saŋkaŋa poan n wan tare ya lebe yire na. N han ta malom sɛ ya ze'ele ba'ahɛ, n wan bahɛ te pɛnka, la na'ahegɔ dɔla ya teŋa wa woo nɛreba teŋasoka te ya nini nyɛta. Na'ayenɛ n yele.

will be added

X\