Zepania 2

1Lagahɛ ya taaba, nyanɛ teŋhe wa, lagahɛ ya taaba na, 2ge te saŋa la nya paɛ, la wan te'ele piihe ya wo sabeeo n piihe sɔgɔrɔ yɛ'a la, ge te Na'ayenɛ sunsunyiim dabaherɛ la nya sige ya zuo na. 3Yamam sɛba woo n de birikindoma bɔna teŋa la poan dɔla a nɔbiŋ'a la, mo'ɛ ya nini la ya ɛ Na'ayenɛ. Ɛ ya tontɔɔ bɔŋa, la sirige n mea bɔŋa, ya han eŋɛ bala ge te Na'ayenɛ sunsunyiim dabaherɛ la paɛ na, daanse'ere a wan zɔ ya ninbɔn'ɔn. 4Ba wan zɔ ge bahɛ Gaza teŋa, ge sagom Askelon teŋa. Wontɛɛŋyeŋɔ poan te ba wan sagom Asdod teŋa ba'ahɛ, ge tun Ekron teŋa voon ka lobe bahɛ. 5Yele boe yamam sɛba n kɛn'ɛre mɔgɔrɛ nɔgbɛma la zuo, Keret teŋa nɛreba wa, Na'ayenɛ yetɔgom la zaberɛ me la yamam, Pilistidoma teŋa Kanaan wa, N wan sagom hɔ, se'em kan gee. 6Teŋsɛka n lɛm mɔgɔrɛ nɔɔrɛn te Keretdoma wa kɛn'ɛra ka poan la wan lebege sɛnka te duŋkeema gura ba nii la piihe bini. 7Ka wan lebege Yuda yiredoma sɛnka te ba kena bilam gu'ura ɔbera yaama. Yenɛ ne han lu, ba wan kɛn' Askelondoma yiya la te ba yehe ge bahɛ la poan gan'an. Na'ayenɛ ba Yenɛ la wan behera ba, a wan lebehe sɛ ba ze'ele. 8N wom to se'ere, la namehe seko te Moab teŋa, la Ammon teŋadoma dekɛ to mam nɛreba la, ge vuunha ba te ba to'e ba teŋa la. 9Bala zuo la, Pɛɛntɛɛnreba Na'ayenɛ Israeldoma Yenɛ la yeti, Mam n kɔ'ɔn bɔna ka tara ba'ahegɔ wa, n wan eŋɛ Moab teŋadoma wo mam n eŋɛ Sodom teŋadoma se'em la, ge eŋɛ Ammon teŋadoma la me wo Gomora teŋadoma la. Ba teŋa la wan lebe mɔɔ zen'an, ge dɛna yaarom ma'an, ka wan lebege teŋa te sɛsɛla kan yɛhera bini kɔ'ɔn yɛ'ɛha. Mam nɛresɛba n gee fiin la wan fan' ba. Mam nɛresɛba n gee ka ki la, wan sɔe ba teŋa la sɔna. 10Ba pa'ale mea la, la ban toore, ge kɛhera mam Pɛɛntɛɛnreba Na'ayenɛ nɛreba la yɔɔrɛ n bala. 11Na'ayenɛ han sagom teŋhe la baga la zan'an ba'ahɛ, a nya wan dɛna Na'ayenɛ kantɛ bo ba, te ba po'ohera en. Teŋse'ehe woo n boe mɔgɔrɛ yekenɛ ha la wan po'ohera en, nɛra woo wan po'ohera Na'ayenɛ a teŋa poan. 12Hom Kus teŋa me, ba wan kɔrɔge hɔ la so'a. 13A wan tɛɛn a nu'o zabɛ la zanɔɔrɛ tontɔɔ bɔba teŋa wa, la a sagom hom Asiria teŋa, a wan sagom Nineveh teŋa, te ka lebege teŋpɔgɔtia. 14Piihe, la nii wan kaahena bilam, dunhe yema yema wan kena kaahena bilam. Viinɔ la yu'uŋɔ niihe wan kena yageta a dangɔɔma la zuo. Niihe wan ɛngera yageta a deto la kolehe la takɔla zuto, ba dɔɔ mɔlɔsomɔ kanra la te ba dekɛ kpa' la wan aanhom lu na. 15Teŋsɛka n daa boe la popeelom la n wan ta ana se'em n bala. Behɛ n ba' sagom paɛ se'em, a nya dela mɔen dunhe gan'an zen'an. Sɛba woo n dole bini tɔla nya ne lɔbera la ba zuto ge ge'era nu'uhe.

will be added

X\