Zepania 1

1Saŋsɛka te Amon dayɔa Yosia dɛna Yuda teŋa naba la, te Na'ayenɛ dekɛ yetɔgom wa bo a nɔtɔgɔha Kusi dayɔa Zepania, Kusi sɔ dela Gedalia, te Gedalia me sɔ dɛna Amaria, te Amaria sɔ me dɛna Hezekia. 2Na'ayenɛ la yeti, N wan piihe sɛla woo n boe teŋa wa zuo wa bahɛ. 3N wan piihe nɛresaaleba, la dunhe ta' taaba bahɛ. N wan piihe niihe n ɛngere saazuo, la zim n boe ko'om poan bahɛ. N han ŋmaɛ nɛresaala teŋa wa zuo bahɛ, sɛla te potɔpa la tara la, wan dɛna la sɔgɔrɔ ma'an. Na'ayenɛ la n yele. 4N wan tɛɛn n nu'o zabɛ la hom Yuda, ge zabɛ la yamam sɛba woo n kɛn'ɛre Yerusalem teŋa poan la. N wan ŋma' Baal baga la zan'an teŋa wa poan bahɛ, te n wan saalom baga la sɛba n kaanbere baga la yu'ura bahɛ. 5N wan saalom sɛba n po'ohere ŋmarebibihe la sɛba n ne tara mam yu'urɛ wa pɔta la me pɔte Molek yu'urɛ la 6sɛba n zagahɛ Na'ayenɛ dɔlɔga ge lebe pooren ta bɔna ba ma'an ge ka ɛɛra en bii ba sɔkera en beha la yu'ura bahɛ. 7Ana baanlam Daana Na'ayenɛ wa nɛŋan. Se'ere n sɔe la, Na'ayenɛ dabaherɛ la pɔnre. Na'ayenɛ maahom la kaanbegɔ te a pee nɛresɛba woo te a yi ba te ba wa'an kaanbegɔ la poan la na mɛ. 8Kaanbegɔ dabaherɛ la poan n wan namehɛ nabiihe la, la sɛba n behere teŋhe la a dayɔɔhe la, la sɛba woo n yɛ teŋhe sese'ehe lɔgɔkanra la. 9De daarɛ n wan namehɛ sɛba woo n nɛɛre kura wa kɛn'ɛra mam yire wa poan na la, tara ba baga na perɛ ba daana wa yire la poan, ge perɛ mam yire wa la gbirigere la pan'ahegɔ la. 10Na'ayenɛ yeti, De daarɛ, kaahe dɔɔ wan ze'ele Zim Nayaŋa la poan yehe na, ge te fabelegɔ ze'ele Zen'paalega la poan yɛhera na, ge te dam kantɛ. 11Yamam sɛba n kɛn'ɛre lɛm da'ahe wa, kaahɛ ya mɛ, ba wan ŋmɛ' ya n da'are sanlema la kuto la, ba wan sagom ba. 12Saŋkaŋa n wan laŋɛ bugum behɛ Yerusalem paɛ paɛ la n namehɛ sɛba n boe bini nɔŋɛ nyɔyɔm la, sɛba n ane wo daam n yee danbino poan sɔna bo mea se'em la, sɛba n tɛn'ɛhere yeti, Na'ayenɛ kan eŋɛ to som, a me kan eŋɛ to be'em la. 13Ba wan fan' ba lɔgɔrɔ, ge saalom ba yiya bahɛ. Ba wan mɛ yiya ge kan kɛn' a poan, ba wan sɛ tan'anhe, ge kan paɛ se kaam di. 14Na'ayenɛ dabaherɛ kantɛ la pɔnre na, de kanbele me na. Kelehe soŋa soŋa, kaahe sɛka n daa wan kaahɛ de daarɛ la dela kaahe sɛka n tɔe, daanse'ere daarɛ te zabɛ zaberɛ ba la wan sakɛ zaberɛ sakerɛ la, la kan dɛna fiin. 15De daarɛ yeti de dɛna la sunsunyiim dabaherɛ, de yeti de dɛna la sunsagaŋɔ dabaherɛ, de yeti de dɛna la daaŋɔ, la sagaŋɔ dabaherɛ, de dela lika la tuuŋɔ dabaherɛ, de dela saŋgbana la lika dabaherɛ, de dela daanse'ere te, 16ba wan peebe zaberɛ yia, ge sakɛ zaberɛ sakerɛ bahɛ teŋkanra zuo, la kenkɛlehe teŋkanra la zuo. 17N wan tare namehegɔ wa'an nɛreba wa zuo na, te ba tuuna wo fɔɔhe la. Se'ere n sɔe la ba tom la be'em bo Na'ayenɛ. Ba wan ka'ahɛ ba ziim baha wo nɛra n yeele urugo a ki poan baha se'em la, ge te ba ko ba te ba gan'an wo nɔɔhe la. 18Ba sanlema la, bii ba ligiri la kan ta'an fan' ba Na'ayenɛ sunsunyiim dabaherɛ wa poan bahɛ. Teŋa wa zan'an wa lu a nini tɛnrega bugum la poan te bo de ka kaanbɛ kaanbɛ. Se'ere n sɔe la, a wan go'e sɛla woo n vɔe teŋa wa zuo wa vom, te vom dan le bɔna.

will be added

X\